Secret Heartbeats

Kabanata 6

Kabanata 6

Hessa

Mag-aalas otso na pero wala pa rin si Ma'am Legarda o Ma'am Lulu, teacher namin sa English. Nakaupo kami sa aming sari-sariling upuan. Mukhang busy ang mga classmates ko sa kani-kanilang ginagawa. Hindi naman masyadong maingay kaya ayos naman.

May ibang nagsa-sound trip; may nag-gigitara sa bandang likod; may naglalaro ng chess; at may ibang nakikipagdaldalan sa katabi.

Itinuon ko ang pansin ko sa sketch pad na nasa table ko. Isa sa hobby ko ang pagguhit, nagpipinta rin ako at ang madalas kong subject ay tungkol sa nature. Nagpa-practice na rin ako ng mga portraits ngayon pero bumabalik pa rin ako sa mga nakasanayan kong bulaklak at halaman.

Nang matapos ay tinago ko na rin ito. Sa bahay ko na lalagyan ng kulay para magkaroon ito ng buhay. Bumaling ako sa katabi kong Jekka. Hindi ko namalayan na lumipat pala ito ng upuan.

Hindi ko naiwasang hindi makinig sa pinag-uusapan nila ni Barbie. Wala naman kasi akong maggawa. Tinatamad naman akong mag-phone kasi wala akong dalang powerbank, low bat na pa naman ako.

"Nakakapagtaka naman at wala pa si Ma'am Lulu, 'no? Never kayang na-late 'yon," sabi ni Jekka.

"Yup! Pero buti na lang wala siya. Dumudugo talaga ang ilong ko tuwing class niya, e. Sino ba naman kasi ang nagpauso ng english policy na 'yan. Ano 'yon feeling nasa America tayo gano'n?"

"Gaga ka! Syempre, 'di mo ba alam na english is the — ano nga ba 'yon? Univer — University Language ba 'yon?"

"Anong university? School ba 'yon? Wait... alam ko 'yon eh... nasa dulo na siya ng dila ko." Napapakamot na lang si Barbie sa ulo niya.

Hindi ko na napigilan na sumali sa usapan nila. "English is the universal language," tamad kong saad. Nakakatamad ang araw na ito tapos wala pang teacher, gusto ko na tuloy umuwi.

Napahampas pa si Jekka sa table niya.

"Ang galing mo talaga bessy, 'yon nga ang ibig kong sabihin. Oh ayan Barbie alam mo na, English is the universal language. Magagamit natin 'yon sa mga bansang pupuntahan natin dahil marami ang nakakaintindi ng english."

Tumango-tango naman si Barbie.

"Kung sabagay may point ka naman do'n kaya lang aminin mo, ang dami rin talagang arte ng english. Ito pa, kapag hindi ka magaling sa english bobo ka na kaagad. Kaya tuloy madalas tayong asarin ng taga-star section kasi nga magagaling sila mag-english."

"Hindi naman batayan ang wika para masabing magaling ka o matalino. May mga taong magagaling na hindi naman bihasa sa salitang english. Sabi nga nila, 'English is not a measure of someone's intelligence'. Being fluent in english is a skill that you can learn overtime. You can read english books, watch international films to improve your vocabulary."

"Tama si bessy! Skill ang pag-i-english kaya dapat mag-practice na tayo habang maaga pa. At saka huwag mo nang isipin 'yong mga taga-star section. Masama lang talaga ang ugali ng mga 'yon. Ang papangit nila lalo na 'yong napakagaling kong pinsan."

Sa pagbanggit ni Jekka ng star section, naalala ko na naman ang pagligtas sa akin ni Chino. Malinaw na sa akin ang lahat. Siguradong-sigurado ako na siya 'yong lalaking nagbukas ng pinto bago ako nawalan ng malay. Nakakalungkot lang na hindi na niya akong naantay na magising. Personal sana akong nakapagpasalamat sa kanya.