زواجي المدبر (بالدارجة المغربية)

الجزء الثاني عشر

رجعنا لدار تغدينا النسا فصالة و الرجال فصالة الدار عمرات ومع العرس قرب جاو شي ناس من العائلة بعاد وصداع دراري بغيت غير نريح مخي شوية.
مشيت نجلس شوية تحت الظل فجردة وهو يتبعني عمر ماحسيت بيه حتى وقف فوق راسي..
أنا:باسم الله الرحمان الرحيم هذا انت؟
جلس حدايا وقال وهو كيضحك
عمر:كنت باغاه يكون حد أخر؟
أنا:لا غير فجأتيني وصافي..وهذاك لاخر مشغول كاع مادايها فيا كيما كتشوف.

عمر:لالالا شكون هاد العمى لي ماغيديهاش فختي أمل..أمولة ختيتو عندي ليك طليبة.
أنا:فاش كتقول هاد أمولة كنعرف كاينة شي حاجة..أش باغي؟
قاد الجلسة وقال
:شوفي بغيت ندير شي مقلب فمحمد وبغيتك تعاونيني.
:أشنو انت مسطي ياك قولتي غتنسى عليك هاد البسالة..
عمر:كنواعدك هذا أخر مقلب نديرو فيكم..أوزايدون راه فصالحك حتى انت.

شفت فيه بغير فهم وقلت
:كيفاش؟
عمر:شوفي أنا نقدر نقول بلي علاقتك انت ومحمد حاس بيها فيها إن.. و راه عرفت بلي زواجكم كان مدبر من طرف واليديكم قلت مع راسي بلي تقدرو تكونو غير كتمتلو علينا دور التنائي المحب ولا كدبت؟

حدرت راسي وجاوبتو
_بصح أنو زواجنا كان مدبر وتقليدي ولكن اعمر دابا نقدر نقولك بلي كولشي تبدل..و وداكشي لي كتشوف ماشي تمتيل..على الأقل من جيهتي أنا.

عمر_واش ماباغاش تعرفي مشاعرو من جيهتك؟؟
أنا:شوف هو فعلاً ماكرهتش نسمعها منو قبل عرسنا ولكن بغيتها تجي من قلبو ماشي من ورا مقلب اعمر.
عمر:اوا انا كنقولك بلي خاصك ديري شي حاجة لي تخليه يعرف قيمتك.. انا متأكد بلي كيبغيك شفت هادشي فعينو فنظراتو ليك وتصرافاتو معاك..

ضورتها فراسي مزيان واش زعما غتكون هادي هي الطريقة المناسبة باش نوصل لغاييتي فأني نسمع منو كلمة كلمة كنبغيك؟علاش مانمشيش ونصارحو نيشان علاش هاد اللف و الدوران كولو.. ولكن تقدر تكون طريقة  غير تقليدية طريقة لي عمرنا نساوها لي ليها ليها اش غيوقع گاع؟؟

:أنا موافقة نعاونك غير باش نحسسو بداكشي لي حسيت بيه فالمقلب لي درتي ليا ولكن كولشي يكون فخباري متافقين؟
تافقنا على المقلب لي غيكون غدا فالعشية ولكن فهاد اللحظة كانت مقالب أخرى كيتخطط ليها..

دوزت نهار مع بنات العائلة مجمعين وكنعاونو فالتحضيرات ديال العرس فالليل تعشينا بحدنا وماسهرناش يعني بقية النهار ماتلاقيتش بمحمد كاع.
نعست وربالي مشغول مع داك المقلب لي عاود لي عمر زعما غينجح والا مشات الأمور بطريقة اخرى .و الا عرفت بلي ماكيحس بوالو من جيهتي وبلي إحساسي من لول كان غلاط.. عادي ديك ساعة بعدا غنلقى سبة باش نحبس هاد زواج.الله يا ربي ترونت.

صبح الصباح والخوف مسيطر عليا فطرت بزربة وخرجت من الصالة بغيت غا نشوف عمر نقولو صافي حبس كولشي ولكن مابانش ليا مشيت لبيت فين دايرين الدراري حوايجهم دقيت فتح ليا محمد غير شافني بدا يفرنس..
محمد_امل بغيتي شي حاجة؟دخلي بعدا ماتوقفيش فالباب..
دخلت و انا كنفكر اشنو غنقول ليه دورت عيني على البيت مابان لي حتى واحد من الدراري و انا نسولو
_انت بحدك هنا؟فين عمر؟
سد الباب من وراه و مشا جلس على واحد الكرسي قدام واحد الطاولة فوق منها بزاف ديال الكتب وجاوبني ببرود