زواجي المدبر (بالدارجة المغربية)

الجزء الثالث عشر

فيقني صوت محمد وهو كيهضر :امل نوضي ماتخلعيناش عليك..واش كتسمعيني؟
فتحت عيني بشوية كنلقى راسي على الأرض وراسي على صدرو شفت فعينيه ودمعو عيني مرة اخرى قربني ليه وعنقني..بعدت منو شوية وسولتو:

-أشنو وقع؟واش أنا كنحلم؟محمد ماشي انت لي طحتي فلبير؟انا كان سحابلي بلي انت..

_ششش ماتخافيش ماطرا والو..هانتي كتشوفي انا حداك.
شفت فالدراري كيضحكو وعمر جالس مربع رجليه كيشوف فينا وساكت
أنا_ولكن انت طحتي فالبير ولا لا؟

محمد:لا!هاديك غير حجرة يا امل.. بصراحة قلت نتعشى بيكم قبل ماتفطرو بيا ساعة انت على سبة غيبتي بين بيدي بعد ماكنتي غتقجيني
أنا_(باستهزاء)هي هي هادشي كيضحك..طيحتي مني النص والله.

عمر:أمل كولشي مشا فالزيرو أختي..دارها بينا هاد المرة..
مريم كضحك_ أمل بقيتي فيا أصحبتي ولكن انتوما لي بديتو اللعب ومحمد غير رد الصرف..
فاطمة بقات كتشوف فينا انا ومحمد و هي مبتسمة بادلتها الإبتسامة وحسيت بالراحة..

فرحت حيت محمد ماطرات ليه والو وبلي داكشي كان غير كدوب هادشي خلاني نعرف مرة أخرى شحال كنبغيه وشحال وجودو مهم بالنسبة ليا ولكن واش ذاك الكلام لي قال لعمر عليا بصح؟

مشاو الدراري والبنات كيلعبو الكورة وأنا مازال جالسة فبلاصتي مع محمد باقي ماستوعبتش هادشي لي طرا وبغيت نسولو باش نفهم منو
أنا:محمد كيفاش عرفتي بداك المقلب لي كان عمر مخطط ليه؟

محمد:صدفة..البارح فاش كنتي كتهضري مع عمر سمعت لهضرتكم وعرفت بداكشي لي ناويين ديرو ليا اليوم..درت راسي ماعارف والو وكملت الدور حتى ليوم.. ولبارح ملي جيتي لعندي لبيت وكنتي باغا تهضري مع عمر لاحظت من خلال تصرافتك بلي باغا تراجعي على المقلب ولكن انا كنت باغي يكمل هاد المقلب لي قدر يخلينا نعترفو بمشاعرنا لبعضنا وهذا هو المهم.

شفت فالسما وابتسمت وانا كنتفكر كلماتو ليا قلت ليه
_ما عندي مانسالك عرفتي كيفاش تمتل الدور مزيان..ولكن وخا هاكدا حشومة عليك ضربتي المقلب فزيرو

ضحك وقال ليا
_من حفر حفرة لأخيه وقع فيها ياك بعدا؟
:أه ولكن انت عارف علاش أنا وافقت على هادشي..غير باش نشوف أش كنعني ليك و واش وجودي فحياتك عندو شي أهمية ولا لا..

محمد_ممم اوا اشنو عرفتي دابا واش انا كنهتم بيك ولا لا؟
ضورت راسي عيني ماعرفت باش نجاوبو هزيت كتفي زعما مانعرف رهو يكمل
محمد:امل عرفتي ديك الهضرة لي قلت لعمر كلها بصح..وخا داكشي كان غير كذوب ولكن حطيت راسي فذاك الموقف لو كان طرا بصح مانقدرش نتخيل راسي خسرتك..مانقدرش نخسر البنت لي لقيت معاها راحتي وقدرات طيحني فحبها وخلاتني نحس بداك الإحساس لي عمري ماحسيتو..

ابتسمت ورجعات فيا الروح وخليتو يكمل هضرتو و عيني مفيكسين على عينيه لي غير نظرة منو خلاتني نحس بداكشي كولو لي مخبيه..