انتقام بريئة

البارت 33

البنات لي ضيعهم و محمد و فيصل لي راحو في الجرة فقرر ينتحر و يتهنى قبل ما ينتحر كتب رسالتين واحدة لنور و الاخرى لباباه... نتاع نور كتب فيها :" " اذا قريتو هذه الرسالة يعني راني ميت انا رضا الهاشمي نطلب السماح من كل بنت خدعتها و دمرتلها حياتها و خاصة نور حبيت نقول انو حبيت نور بجنون كنت نشوف وجها في كامل البنات انا يوم لي مات باباها انا كنت معاه يعني هو كي جا يشوف بابا انا كنت تما في الشركة محبيتش بابا يوريه الفديو و لكن بابا سرقهلي و غلق عليا في احد البيرويات في الشركة و ما فتح عليا الا لما باباها مشا انا لحقتو كي خرجت برا لقيت الناس دايرة بيه و هو شاد في قلبو انا حملتو و ديتو السبيتار و في التراجي طلبت منو السماح كنت نبكي نبكي بحرقة خفته يموت و انا سبابو من كثرة الدموع معرفتش نصوق معلاباليش كفاش حتى وصلنا للصبيتار شديت في يدو و طلبت السماح دخلوه الانعاش و انا ستنيت برا حتى قالولي الاطباء راه يلغالك رحت عندو خزر فيا و قالي مسامحك و تهلى في نور و مات و انا من يومها و انا ندمان و رحت قعدت نستنى كل يوم عند دار نور بالتخبية كنت نحب نشوفها ونحكيلها و لكن خفت تروجيتيني و تبعدني اكثر عليها و نهار مشات فرنسا انا طلعت حتى لفرنسا نحوس عليها و لكن دون جدوى فاميلتها مكانتش حتى تقبل تنطق باسمي بالنسبة ليهم انا وحش ودمرتهم و عندهم الحق لانو انا اصلا مش حامل نفسي و نكره روحي و اليوم بعدما شفت نور في هذيك الحالة تألمت و مقدرت نعملها والو باباها لي وصاني عليها مقدرتش نلبيلو امنيتو الاخيرة سامحيني نور.....اعشقك بجنون.
و في الرسالة الثانية كتب لباباه:
"بابا تشفى نهار انتحرت ماما قدامي و قدامك قاتلك وقتها يا تحبس اهاناتك و الذل و خيانتك و قسوتك عليها يا تنتحر انت قتلها انتحري انت ما تنفعي لحتى شيء موتك احسن من حياتك هي تما قطعت شرايين نتاعها و انا اليوم عملت نفس الشيء انا موتي احسن من حياتي انا كيما ماما مننفع لشيء كنت تقولهالي ديما و لكن انا اسؤء من ماما انا نضر كل شيء حوالي ندمرو و نخسرو ..تشفا يا بابا اليامات كنت صغير و نتوحش ماما و نبكي عليها وقتها كنت تضربني و تقولي الرجال ميبكوش ميضعفوش كبرتني على اساس هذه القاعدة يعني ملازمش نضعف لازم نكون قوي في هذا المجتمع لي القوي ياكل الضعيف كبرتني على القسوة على كنت تقولي ديما لازم منرحمش الناس و قلبي يكون حجر و لكن يا بابا هذي العقلية راها دمرتني و دمرت بزاف ناس و عائلات معايا مقدرتش نستحمل اكثر بابا كنت ديما تقولي يا ريتك مت مع امك ووتهنيت منك اليوم رح ترتاح مني و نهنيك مل المشاكل لي عملتهملك سامحني بابا لتعبتك معايا انا كنت ندير المشاكل بلعاني باش نتلاقو اليوم عندي سنتين مشفتنيش منهار طردتني من دارك محوستش عليا و لا سقسيت كيفاش راني انا مفهمتش حتى انك دزوجت و معرضتنيش لعرسك و زاد عندك طفل و انا كنت اخر من يعلم  لغيتلك شعال من خطرة و مكنتش ترفد عليا كنت نقارعلك عند الشركة بالتخبية باش نطمن عليك كنت نتوحشك ونتمنى نعانقك مي الله غالب نتمنى برك كي تسمع بموتي دجي تسلم عليا و تعانقني و تقولي نحبك لأول و اخر مرة قبل ما يدفنوني و اذا دفنوني و مشفتنيش و لي راني شاك يصرى هكذا فمتنسانيش و رواح زورني في قبري باش نطمن عليك ياك يقولو الموتى يشوفو لي يزورهم ترحم عليا و دعي ربي يغفرلي بلاك يتقبل منك ومتنساش دزور يما لاني كل يوم كنت نزورها و نخاف حتى واحد معاد يزورها بعدي نحبك بابا 😢 "
خلاصت الحكاية النهاية مأساوية باش ناخذو العبرة منها نور غلطت كي قرت تنتقم لنفسها و لباباها و هي مش متأكدة من معلوماتها دمرت اشخاص كانو بريئين بسبب جرحها و محمد.  فيصل.  إياد و رضا مكانش حق عليهم يعملو من البنات لعبة تسليهم لانو كما تدين تدان كيما تسلو بالبنات جا نهار و بنت تسلت بيهم و دمرتهم كيما دمرو بزاف بنات بالرغم من انو إياد كان ضد هذه اللعب و لكن هو ايضا تضرر حتى و لو انو ضررو صغير بالنسبة لاصحابه و لكن عاش حياتو يحب طفلة مهبولة ايييه إياد قعد يحبها و يروح كل يوم يشوفها بالتخبية هو مكانش علابالو انو حتى نور حباتو قربها و حبها ليه مكانش مجرد انتقام  و تمثيل و لكن شكون يقولو هي هبلت و مراحش يعرف انو احساسها كان حقيقي تجاهه ...................... النهاية .