#قدري

البارت التاسع

البارت التاسع ..
#قدري
بقلمي #شمس
رجعت للبيت واني فرحانه واخيرا قدري حيتغير وحكمل دراستي ..
وبدت مشاعري تتغير من ناحيه امير .. لان كل يوم يتصل ويسأل ونبقى نسولف شويه بحجه يسألني ع وضعي .. وعمتي كل اسبوع لو اني اروحلهم لو هي تجينا وممقصرين عليه
حتى رحمه تغيرت من ناحيتي .
لان گمت انطيها فلوس وغراض وكل الي يجيبوه عيالي انطيهيا من غراض وحلويات ماعدا ملايس البيبي ..
احس حياتي تغيرت بطني كبرت وحملي ثگل ..
وبدأت امتحاناتي ..
وامير اجرلي خط ياخذني ويجيبني لان رفضت هو ياخذني من كلام الناس وهو هم مسؤوليات عنده ميصير يعوفهن عمودي ..
امتحنت والله وفقني وكل ماده ماافهمها يجي امير يدرسني لان عبقري بشكل ..
ويفهمني الماده بطلاقه .. شرحه حلو ووافي ..
بهاي الفتره تقربنا البعض وواحد عرف بعض .. وتعودت عليه حتى گمت اتحجج واسوي نفسي مافاهمه سؤال حتى اتصل عليه ..#شمس

كملت الامتحانات واني دخلت بشهري .. جهزت غراضي ولان تعبت حيل بحملي وبالدراسه گمت احس بآلام ببدايه شهري بس مااعرف شنو هاي اگول الرحمه تگولي تقلصات وانتي بكر تتأخرين يالله تولدين ..
اشو لليل بعد مااتحمل الالم زاد . وبس ابجي واصيح ماما بيبي ساعدوني .. الم مشايفته بحياتي حسيت هاي نهايتي .. وخف ع ابني يصير يتيم الاب والام ..
ماصار ببالي بس امير ..
اتصلت عليه هاي الساعه 2 بالليل
امير .. اني نايم وتعبان مشاكل العشيره هدت حيلي .. وسمعت موبايلي يرن مابيه حيل ردت اغلس..  بس شفت الاسم .. طفرت واستغربت اسى متتصل بهيج وقت
رديت الو اسى خير شبيج ..
سمعت اسى تبجي وتگلي حموت امير الالم يموت هاي نهايتي .. ابني امانه عندك اذا صار بيه شي . #شمس
اني تخبلت وبقيت افتر بالغرفه ادور ع ملابسي بس البس نسيت مكانهن .
وگلتلها .. حبيبي لتخافين اني وياج ومااعوفج گعدي ابوج وطلعوا للمستشفى واني وامي نطلعلكم منا ..
يالله ياعمري لتخافين بسرعه .. وسديته واني ناسي نفسي شأحجي طلعت الكلمات بصوره عفويه من گلبي من غير مااحس ..
بسرعه گعدت امي .. ورحنا امي خطيه الطريق كله تدعي وتسبح حتى يگومون بالسلامه ..
وصلنا ولگيناهم گبالنه بسرعه دخلوهه الغرفه التوليد وهي عينها عليه عبالك تذكرني بوصيتها ..
اني خفت عليها وبقيت ادعي .. تطلعلي بالسلامه ماصدگت لگيت الانسانه الي دگ گلبي الها .
وصدوگ الله استجاب دعائنا .. وطلعت هي والطفل بالسلامه ..
وتصدگون طلع الطفل يشهني حيل عبالك ابني .. حبيته من اول لحظه شفته بيها وحسيته ابني مو ابن عادل ..#شمس

امي .. اسى يمه حمدا لله ع سلامتكم بس عندي طلب منج ..
اسى .. تفضلي عمه گولي
امي .. ابن عادل منتضرته صار سنين وفرحتي من شفته واريد اني اسميه ..
اسى .. من حقج عمه  سميه انتي الخير والبركه ..
امي .. ادري بيكم راح تستغربون بس اريد اسميه عادل على اسم ابوه ..
اسى .. صحيح استغربت بس من حقها ماتريد اسم ابنها ينسي .
وسميناه عادل وركض امير سوه البيان وكمل كولشي وطلعنا للبيت عمتي رادت فتره النفاس اني يمها عمود هي تعتني بعادل وتشبع منه .. #شمس
وماگدرت ارفضلهه طلب ..
ورحنا البيت عيالي .. اول مادخلت تلگتنا جنان واخذت عادل وبقت تشم بي وتبجي تشتم. بي ريحه عادل اول مره تقهرني ودخلوني الغرفه جوه مجهزيها سرير الي والابني غرفه كامله ..
يعني ممقصرين علينا بشئ عمتي گالت الامير اذبح طليان ووزعهن وراح نسوي عشا الوجه الله ..
ثاني يوم اجه امير طاير من الفرح ..
اسى عندي بشاره الج ..
اسى .. اي ياربي كثر البشاير گول
امير..  طلعت النتائج ..
اسى .. لابربك ناجحه وشگد معدلي دگول لتخوفني
امير .. هههههه لتخافين انتي شاطره مااتوقعت تطلعين هيج معدل ..#شمس
اسى .. شگد دگول امير لتلعب بأعصابي ..
امير .. 98 %
اسى .. من گال امير المعدل ماحسيت ع روحي الا واني حاضنته وحاضنه عمتي واگولهم لو ماانتو جا اني ماعشت هاي اللحظه .. وشلت ابني وابوسه واگوله حبيبي وجهك خير عليه ..
امير .. من حضنتني اسى .. بقيت جامد جسمي كوله خدر .. بقيت بس اضحك ..
اسى .. حسيت السعاده ماليه حياتي واخيرا حكمل طموحي عمتي گلتلي انتي كملي جامعه وعادل يبقى عندي ..
امير بدا يجهزلي القائمه ويرتبلي الجامعات الي ممكن تقبلني .طلع الاربعين مالتي وكبر عدولي ودنفش وهو ابيض حيل حبيبي يخبل ..
امير بهذي الفتره اتقرب هوايه من عادل ويلاعبه وذاك الملعون يناغي الامير ههه وتعلق بي حيل عباله ابوه من يشوفه يبقى يضحك ..
#شمس
يتبع… .