#قدري

البارت السادس

البارت السادس
#قدري
بقلمي #شمس
كنت ادري اخويه متزوج بس مامعقوله ماخذ وحده صغيره هيج ..
والمشكله اول ماشفتها عجبتني .. شلتها وخليتها بالسياره كانت مرت ابوها بالبيت راحت ويانا ..
وصلنا سوينا تحاليل وخلولها مغذي ..

ورى شويه طلعت التحاليل اخذتهن ورحت لگيت الدكتوره يمها .. نطيتها التحاليل ..
ابتسمت ..
وگالت .. اسى مبروك حامل يتربى بعزكم بس عندج فقر دم لازم تتغذين حتى مدوخين وتوگعين ..

اسى .. من گالتلي انتي حامل .. بقيت ابجي ماردت ابني يطلع يتيم واني مااعرف مصيري ..
كنت فرحانه لان راح ارجع الاهلي واكمل دراستي وهسا هذا الطفل حيربطني .. وانقهرت ع عادل خطيه مات وكان امنيته الطفل ..

امير .. من گالت الدكتوره حامل .. انخطف لوني اتباوعتلهه تبجي .. عبالك مارايدته او من الفرح او لان ابوه متوفي مافهمتهه
گلتلها .. مبروك بس ليش تبجين احمدي الله لان اكو شي حيذكرج بعادل وهاي امنيته ..
اسى .. بقيت ابجي وگتله انت كولشي ماتعرف عن حياتي وشلون عانيت وشلون جبروني اتزوج وحطموا مستقبلي ..
رحمه .. الي يسمعج يگول وديناج اعدام دگومي جهزي نفسج يالله حتى نطلع ..
امير .. من گالت هيج عرفتها مجبوره ومرايده الطفل بس هاي امنية عادل وامي ولازم احافظ عليها وافرحه بقبره ..
رجعنا للبيت لگينه الناس ماكو بس جنان واخواتهه وامي وخالاتي ..
تلگتني امي هايمه شبيها .. واسى دخلت ورايه هي ومرت ابوها ..
گلتلها خير ان شاء الله وصعدت الغرفتي ارتاح لان ناس جايين بالليل والاستقبال مگلوب بعمامي واهلي ..
واني دا اصعد سمعت مرت ابوها گالتلها عيني ام عادل الله عوضج بمكان عادل ابنه الله ماياخذ اذا ماينطي ..

واسمع جنان وگعت وامي تحمد الله وتشكره وتبوس بأسى ..
نزلت اشوف جنان مكتوب عليه اليوم ماارتاح كل ساعه واگعه وحده ..

هدأ الوضع .. صعدت الغرفتي .. وافكر بأسى اسمها يشبهها بعيونه حزن ..
وتالي استعاذيت من الشيطان مرت اخوي وحامل بابنه شلون افكر بيها ..
مرت الايام وخلص الاربعين وجنان تحارب بيه انگلبت عدوه الي وتسوي كولشي حتى تأذيني والكل صاف وياهه واخواتهه كل يوم عدنا ومره منهن دا امشي ووحده من اخواتهه خلت رجليهه گدامي حتى اوگع بس الله ستر وذابات الشغل كوله عليه ..
عذبني حتى اخوات عادل المزوجات يباعن ويغلسن لان بنت عمهن وهم عندهم ترابط قوي بيناتهم عبالك كولهم اخوه مو بنات عم ..
بس عمتي خطيه وياي .. بس ماتگدر تسوي شي ..
اجيتها وگولتلها عمه اريد احجي وياج .
عمتي .. اي يمه گولي بس قبل كولشي دايره بالج ع نفسج تاكلين هذا امانه عادل يمه لاتحرميني منه ..
اسى .. اني زينه عمه لتخافين بس اريد اروح الاهلي اخلص العده هناك مال عادل لان هنا دا اتعب وتشوفين جنان شلون تعاملني كلها اربعه اشهر على تستقر حالتي والي ببطني يثبت ..
عمتي .. اي يمه اني هم خايفه عليج بس تخلصين العده وترجعين لان اريد ابن عادل ينولد هنا بيت جده وابوه ..
اسى .. ان شاء الله عمه بوست راسهه وطلعت اجهز غراضي ..
وخابرت ابويه اجو اخذوني اني ورحمه ..
امير .. اني دخلت لگيت امي تبجي .
هايمه خيرج اكو شي يوجعج لو فراك عادل الي عمى عيونج يمه ميصير هيج ادعيله لتبجين عليه يتعذب بگبره ..
امي .. شأسوي يمه وفوگ كل هذا اسى عافتني واخذت ريحه عادل وياهه ..
امير . وين راحت
امي .. راحت تخلص العده عند اهلها بس اخاف ماترجع بعد من عمايل جنان  .
امير .. الله كريم يمه خلي تخلص العده واني ارجعها ابن عادل مايربى بعيد عن اهلهه ..

اسى .. رجعت الاهلي ونور فرحانه وبابا هم زين وياي ووصى رحمه عليه وگالهه لا تعبيهه. .
وكل يوم تكبر بطني احب ابني او بنتي اكثر احس شي داخلي محتاجني ولازم اكون قويه .. واتحدى كولشي عموده ..
مرت خمس اشهر ع حملي واني ممراجعه دكتوره .. خلصت العده مالتي وخابرت عمتي گولتلهه اريد اروح للدكتوره واصرت تمر عليه وهي تاخذني ..
جهزت نفسي وبطني كبرانه لبست جبه وشال حسيت نفسي صدوگ ام .
مرت عليه هي وامير وهاي اول مره اشوفه من بعد فتره طويله لايگتله الملابس الخليجيه شيخ مو صدوگ
صعدت للسياره سلمت وهو رد السلام ..
رحنا للدكتوره احنا حاجزين مطولنا بسرعه دخلنا اني وعمتي وهو بقى ينتضر ..
امير .. من شفتها احس روحي رجعتلي مشتاق لعيونها صح راح الكل ينتقدني لان مرت اخوي بس اني انعجبت بيها من اول لحضه ومن غير مااعرف هي مرت اخوي ..
والحمل لايگ عليها ورغم مالابسه اسود بس تخبل وجهها صافي وبريئ ..
اسى .. فحصتني الدكتوره وگالت حيجيكم ولد وماشاء الله صحته زينه وسليم .
عمتي حضنتني وتبجي .. وطلعت تبشر امير ..
امير فرح كولش . 
گالتلي عمتي .  هسا نروح البيت اهلج انلم غراضج ونرجع للبيت .
اسى . اعذريني عمه مااگدر ارجع عود من اولد الله كريم حاليا مااگدر ..
عمتي ضاجت وگالت احسبي احسابج اسى ابن عادل مايربى بعيد عني ..
امير . يمه ع كيفج مو هيج الحجي خلونا نصعد للسياره ونسولف ..
صعدنا التفتت عليها .. اسى . من الفظ اسمها اتلعثم مااعرف ليش. ..
اسى اسمعيني روحي البيت اهلج كم وبعدين انفكر ونشوف حل ..
#شمس
يتبع…