كان عندي 15 سنة لما اهلي قرروا اننا نسيب بيتنا القديم و نروح لبيت جديد و لدولة تانية جديدة ونستقر فيها ، قرارهم كان صعب جدًا عليا و على اخواتي لأني و بكل بساطة كنت متعلقة ببيتنا القديم و دا شئ طبيعي لواحدة قضت سنين عمرها في البيت دا ، عايزة اقولكم اني لحد دلوقتي معرفش سبب قرارهم المفاجئ دا لكني كنت حاسة ان اختي الكبيره عارفة السبب بس الصراحة مفكرتش اسألها..
كنا في امريكا و استقرينا في بريطانيا
بريطانيا دولة جميله فعلا، مش هكدب عليكم في اني من صغري كان نفسي اروحها و لكن دا ميمنعش اني عندي انتماء لبيتي اللي اتربيت فيه اكتر و قرار اننا هنستقر في بريطانيا كان صادم بس اتعودت علي الوضع في النهايه * بريطانيا دوله جميله زي ما قولتلكم *.
اسمي بيلا ، ماما هي اللي سمتني لكن بابا كان طول عمره نفسه لو جاب اخر طفل بنت يسميها ايما فا قرروا ان اسمي الحقيقي يكون بيلا و انهم ينادوني دايماً ' ايما ' بما اني البنت الصغيرة و صحابي من صغري وهما بيقولولي ' اماندا ' ، مم الصراحه اسم اماندا كان عاجبني اوي و لما حد كان بيسألني على اسمي كنت بقوله اماندا و تقريبا كل الناس بقت تقولي اماندا معادا اهلي كانوا دايمًا بيقولولي ' ايما '، اعتقد ان اسم بيلا دا متسجل في شهاده الميلاد و بس لأن محدش خالص كان بيناديني بيه لدرجه اني نسيت ان اسمي الحقيقي بيلا.. اسم ايماا و بيلا حلوين لكني فضلت اماندا اكتر بعيدا عن اهلي اللي كانوا كارهينه و مش عارفة السبب بردو،
اختي الكبيرة ' صوفيا ' اكبر مني بخمس سنين، كانت دايمًا بتتجاهلني و علاقتنا ببعض مش كويسه لكن معقولة كأخوات ،
اختي الوسطانية ' لونا ' اكبر مني بسنتين كانت علاقتي بيها اكتر من كويسه و فاهمين بعض و دايمًا مع بعض، كانت صوفيا بتغير من علاقتنا ببعض لكن هي مكانتش مديالنا مجال حتي اننا نكلمها.
بعد 4 سنين من انتقالنا لبريطانيا * لندن بالتحديد *
كانت صوفيا اتجوزت شاب اتعرفت عليه من لندن و كان بيحبها و بتحبه خلفت منه بنت و ولد ، كنت فرحانه بيها جدًا بالرغم من علاقتنا اللي مكانتش كويسة طول عمرنا لكن بعد جوازها بقينا نقرب انا و لونا منها اكتر بسبب اولادها
كنت بحب جدا بنتها ايلزابيث وبفضلها عن اخوها اليكس ولما كانت اختي بتزورنا كنت بقضي الوقت كله مع ايلزابيث، الصراحة البنت تتحب.
لما بقت ايلزابيث عندها سنتين كانت بدأت تتكلم كلام بسيط زي' ماما ' ' بابا ' و اوقات مش كتير كانت بتنده اختي بأسمها، كانت بتقول 'ثوفيا' كنا معتقدين انها ك طفله طبيعي تقول كلام غلط و تلغبط في الحروف، لكن للأسف مكانتش ملغبطه في الحروف بس نسيت اقولكم ان اول كلمه قالتهاا كانت اسمي!
كانت اسمي الحقيقي، قالت ' بيلا '
في اليوم دا كلنا استغربنا الموضوع لكن الكل تقبله معادا انا كنت دايماً بفكر فيه ، انا و ايلزابيث كنا قريبين وكانت بتحبني جدًا و بنقضي الوقت كله سوا و بلعب معاها و بجيبلها اللي هي عايزاه لكن حقيقي مفيش اي حد ذكر قدامها اسم بيلا ابدًا ! ولا حتي مرة واحدة بس، زي ماقولتلكم اهلي كانوا دايماً بيقولولي ايما و صحابي بيقولوا اماندا و الكل كان ناسي اسم بيلا دا خالص و متذكرش قدام ايلزابيث ابدًا ، اهلي كانوا متقبلين اللي حصل لأن من كتر ما كنت قريبة من ايلزابيث كانوا فاكرين اني قولت قدامها اسمي الحقيقي ولما كنت بقولهم اني مقولتش كانوا بيقولوا اني يمكن ناسيه لكن انا مكنتش ناسيه، انا فعلا مقولتش!
على قد ما كنت فرحانة جدًا ان ايلزابيث اول كلمة نطقتها كانت اسمي علي قد ما كنت خايفة لدرجة اني من وقت الموقف بعدت عن ايلزابيث، كانت بتعيط عشان العب معاها وانا مكنتش بقربلها ، بعدت عنها شهر كامل
في الشهر كانت بدأت تلعب مع اخوها اليكس اللي اكبر منها بسنة، و في يوم كانوا اهلي و اهل ' ادوارد ' جوز اختي قاعدين كلهم مع بعض و انا و لونا في المطبخ و اليكس و ايلزابيث بيلعبوا مع بعض في اوضتهم ، بعد تقريبا نص ساعه سمعنا صوت اليكس بيعيط روحت انا و لونا نشوف في ايه ، لقينا اليكس واقع من على السرير بيعيط جامد كأنه شاف حاجه خلته يترعب و كان بيشاور علي اخته ايلزابيث بس المشكلة اننا لقينا ايلزابيث نايمه! مع اني كنت سامعه صوتهم بيلعبوا قبل ما اسمع اليكس بيعيط اكيد ايلزابيث ملحقتش تنام بالسرعة دي و اكيد بردو طفله عندها سنتين ونص مش هتعرف تمثل انها نايمه مثلا!
استغربت من الموقف انا و لونا و خدنا اليكس و طلعنا برا و سيبنا ايلزابيث نايمه، و بعد عشر دقايق سمعناا كلنا صوت حاجه جامده وقعت من اوضه ايلزابيث و جرينا عشان نشوف في ايه ، و اللي شوفناه كان صدمه كبيره اوي بالنسبالنا..
