ورد جوري

جزء بلا عنوان 13

#ورد_جوري

بقلمي السيدة العلوية

الجزء 13

اني ادري راح تنزعجون من تصرفي وراح تحملوني الخطأ .. بس مااعرف هي لحظة سذاجة ام ماذا .. ثاني يوم كعدت وبديت اهتم بالبيت .. واشتغل من غرفة لغرفة وخلصت شغلي .. وفطرنا اني وعمتي وبشار .. والساعة 10 ونص اجت خالته ووياها بس رسل وكالعادة هي راح تبات واني راح اضل مترقبة اي مغثة او اي خباثـة من عدهم

سهام: شلونج يمة وشخباركم

الخالة : بخير وين جهالج خلي اشوفهم

الام : بعدهم نايمين خية مايكعدون هسة

رسل :والله مشتاقتلهم .. بشار وين لعد

الام : بغرفته هسة نروحله

رسل : اهو هسة اشوف البومة مرته

سهام : معليج قابل بيت الخلفهـا ..

كنت احلق لحية بشار وارتبهـا واندك باب غرفتنا ودخلوا ..

بشار : هلة والله بخالتي شلونج

الخالة : هلا بيك ياعيوني .. صحتك شلونهـا شخبارك

جوري : بخير عمة صحته .. جاي يتحسن

الخالة : هااااا .. جوري هاشلونج

جوري : الله يسلمج عمة بخير .. ارتاحي كعدوا

سهام : رسولة تعالي ..

رسل : اجيت ..

سهام : ماكلتيلي

رسل : على شنو ..

سهام : شبيج شنو الخطة مالتج

رسل :باعي .. انتي مو تكولين هم ماصار عدهم طفل !!

سهام : اي واذا ؟؟

رسل : بسيطة نحط هاي بغرفتهـا ..

سهام : ايا داهية شلون فكرتي بيها ..

رسل : هههه هينة علية

كان وقت الغداء والكل مشغولين بغرفه عمتي ويسولفون وبعدين تذكرت سالي .. جبت تلفوني وكلت خلي اتصل بوائل بكلت اكدر اقنعة يعوف سالي بحالهـا ..

جوري : هلوو ابو ريتاج شلونك

وائل : هلووو جوري شلونج .. عاش من سمع صوتج

جوري : بخير .. ان شلونك

وائل : الحمدلله .. بخير بهالدنيا

جوري : عفية جايتك بسالفة واريدك ماتفشلني

وائل : اذا اكدرلهـا ..

جوري : علمود سالـي

وائل : جوري اني اعزج واحترمج اطلعي من السالفة حبابة

جوري : الخاطري وائل عفية امسح الصور بدون فضيحة

بهالاثنـاء واشوف رسل وسهام يباوعن علية ويضحكن .. اني رأسا انهيت المكالمة وردت اكمل تحضير الاكل .. ومامنتبهـة للناس شكد تحب تفهم خطأ وتخرب بيوت ..كانما كانت وضيفة سهام هي كرهـي .. مااعرف ليش !! هالكره والحقد ليش ..

سهام وهي تدخل لغرفه خالتهـا :نايمين بالعسل انتوا والهانم كاعده وتخابر ولد

ام سهام : شبيج يمة مسودنه منو وشكو

رسل : يمة لو تعرفين الصار جان انصدمتي

الام : تسولفن لو لا

سهام : خالة بشار ليش مايصير عنده ضنة .. هو مو رجال .. مسألتي نفسج ليش

الام : احجي بدون لف ودوران

رسل : خالة جوري سمعناها تخابر رجال وتكله لاتفضحني وامسح الصور وفوك هذا شفنا هالحبوب بغرفتهـا

الام : شنو صخام الصخمني .. جوري !! قامت الام من غرفتهـا للمطبخ حيت كانت تحضر الطعام .. بعصبية وعيون مملوءة بالغضب .. توجهت الى جوري لتسحبهـا من شعرهـا نحو غرفة بشار ..

جوري : ااااااااااااخ عمة شكو

الام : انلصمي لفيناج من الشارع تالي تطلعين هيج ام الزلم

بشار وهو متفاجأ : شكو يمة عوفي جوري ليش هيج

الام : اي ضل ضل تصدك بيهـا مو .. بعدها فارة عقلك مو .. هالسحارة المكارة هاي ..

جوري : عمة والله مامسوية شي شصار

الام : ليش ما حبلتي صارلج سنة ونص هسة ..

بشار : يمة شبيج ماجاي تشوفين ؟؟

الام : لا يمة انته الغشيم مرتك ام الدرابين مصادقة رجال ووياها بالتلفون والبنات سمعوهـا ..تكله لاتفضحني .. احجي لو هم جذب

جوري : عمة والله موهيج والله

بشار وهو محمر العين : جوري !! صدك هالحجي

جوري : وداعتك حبيبي والله وشدتك هاي ماكو هيج شي

الام : زين وحبوب منع الحمل ليش موجودات بغرفتج ؟؟ ليش عود ..

بشار : يمة منيلج هالحجي هذا

الام : سهـام يمة سهام تعالن هنا

جنت واكفة واسمعهم .. معقول يوصل السواد بالانسان لهاي الدرجة .. ﴿ يَا أَيُّهَا الَّذِينَ آَمَنُوا إِنْ جَاءَكُمْ فَاسِقٌ بِنَبَأٍ فَتَبَيَّنُوا أَنْ تُصِيبُوا قَوْمًا بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ (6) ﴾

( سورة الحجرات)