يوماً ما

Chapter 6

• One Day •
6 ..
_____________

" صحيت من النوم دخلت الحمام و خلصت و خرجت لبست بسرعة و عملت شاي بلبن و خدت كتبي و نزلت الجامعة .. دخلت روحت خابطة في واحد " ..

رناد : اسفة اوي !

: ولا يهمك محصلش حاجة ! بت يا رناد انا مهند !😂

رناد : اه ازيك يا مهند معلش مبصتش خبطت في مين

مهند : عادي ولا يهمك .. صحيح انتِ تيليفونك فين ؟ روان عمالة تتصل بيكي و مش بتردي ..

رناد : ثانية ..

" طلعته و لقيتني عملاه سايلنت من ساعة الجلسة بتاعت امبارح .. ف اتصلت بروان .. "

رناد : طبعاً لو حلفتلك ان الموبايل كان سايلنت مش هتصدقي !

روان : الاهتمام مبيتطلبش يا رينو لا !

رناد : بس يا روان يا حبيبتي بس يا ماما .. انتِ فين ؟

روان : في الكافيتريا .. تعالي مستنياكي

رناد : بيس ..

" قفلت و مهند مشي و انا روحت لروان .. حكيتلها اني شوفت مهند و كدة و قعدنا نتكلم كتييييير جداً .. اتفقنا اننا كل يوم خميس هنتقابل و كل يوم في الجامعة هنتقابل و كدة يعني💃🏻.. كنت فرحانة اني اتعرفت علي ناس جديدة هما مش كتار زي ما كنت اعرف الاول بس اهوه بدل ما كنت وحيدة يعني ..
جه معاد اول محاضرة و قمت دخلت .. خلصتها و روحت البيت .. هو انا ليه منزلش اسلم علي طنط حنان و عمو عماد بابا مهاب ؟؟ بقالي كتير منزلتش سلمت عليهم ! لما بشوفهم في الشارع صدفة بسلم ! غير كدة مبنزلش ليه !! يمكن عشان خايفة يطلع بيكلمهم و اضعف و ابقي عايزة اكلمه !! سنة مسمعتش صوته و مشوفتش شكله اتغير ولا لا !! طب و طنط مامت هبة و عمو كمان !! بس هما نقلوا !! ليه ؟ قمت لبست و نزلت خبطت علي طنط حنان .. فتحت الباب و فضلت بصالي كتير و بعدين حضنتني جامد " ..

حنان : اهون عليكي كل ده متجيش تشوفيني ؟؟ فاكرك اخر مرة شوفتك فيها امتي ؟؟ لما جيت قلتلك انه سافر و عايز يكلمك ! متخدنيش بذنبه هو !! انا مربياكي مع امك الله يرحمها ! كذا مرة ابقي عايزة اطلع اخبط عليكي و اقعد معاكي او تنزلي تقعدي معايا و اخاف تعامليني وحش بسببه !! اتصل كذا مرة و كذا مرة يسأل عليكي و يقولي عايز يكلمك و انا ارفض ! زي ما وعدتك !! كل مرة يتصل اول كلمة يقولهاا " اتخطبت او عريس جالها ولا لا ؟؟ " و لما اقول لا يتنهد و يفضل يقول الحمدلله !! كذا مرة يقولي و يقول لأبوه "وحشتني اوي يا بابا" عايز يحقق حلمه !! حلمه انه يتعلم برة و حلمه الي هنا انه ميخلفش بوعده و يجي يخطبك ! طب سيبك من مهاب و عارفة انه مكنش ينفع الي عمله ! بس انا ؟؟ يرضيكي ابقي خايفة اطلع اخبط عليكي عشان خايفة تعامليني وحش ؟؟ بعد ما كنتِ بتعامليني كأني ماما التانية ! ده انا كنت بحبك زيه ! سنة مشوفكيش ؟؟ عارفة كنت بعمل ايه ؟ كنت بشوفك وقت ما بتنزلي الجامعة و ابص من العين السحرية عشان اشوفك كويسة ولا لا ! ينفع الي عملاه في نفسك ده ؟؟ ينفع تقفلي كل الsocial media و تمسحي كل البرامج من علي الموبايل و لبسك يبقي غامق و مش مهتمية بنفسك و اكيد كل اكلك قرف من الشارع ! عارفة ؟ انا الي غلطانة دلوقتي ! كان لازم ادوس علي نفسي و اطلع اخبط عليكي حتي لو هتعامليني وحش ! كان لازم اخد بالي منك !! من النهاردة هحط قوانين و تمشي عليها ! هننزل نشتري لبس و هتنزلي البرامج تاني و تتصوري و تنزليها علي الانستجرام و تنزلي بوستاتك الي علي الفيس و تكلمي مع اصحابك الي ميعرفوش عنك حاجة ! و هننزل دلوقتي بعد ما نتغدي مكرونة بشاميل نشتري هدوم ليكي ! و بوصي هنخربها النهاردة مفهوم ؟؟