انا قبل ان التقيك

البارت 1

بقلمي الاميره الموسويه 👑

ما احلل لاي شخص ياخذ كتاباتي وينشرهم (ذمه)

قصتي .. عباره عن مأساة مختاريتهاا اني لكن الله سبحانه وتعالى هو الي كتبها عليه والقدر اكيد لعب دوره ..
اول شي حعرفكم عليه .. اني اسمى (سلار) اكيد حتستغربون الاسم !!
اني امي كورديه وبابا عربي لذلك اسمي كوردي ومعنى (جبل الثلج )❄
اني متوسطه الطول بشرتي بيضه عيوني كبااااار ولونهم نرجسي
شعري اسود ليل ملامحي هادئه وحلوه وزني طبيعي مو سمينه ولا ضعيفه ..

عمري حاليا 25 سنه لما صارت احداث قصتي عمري بوقتها كان 19 سنه .

حبدي وياكم من بداية حياتي..اني ولدتني امي للدنيا سليمه والحمدلله طفله طبيعيه ما اعاني من اي مشكله
ماما كانت دائما تحجيلي عن طفولتي ، كانت تكولي انو اني كنت طفله نشيطه وذكيه وحركه وعقلي سابق سني حتى لما بديت امشي كان عمري 9 اشهر ومشيت ومواجهتني اي مشكله بهذا الخصوص!
بعد مصار عمري سنه امي اخذتني حتى تلقحني لقاحات عاديه ينطوها لاي طفل ..
بوقتها كان اللقاح الي اخذته ضد مرض
(شلل الاطفال)..

طبعا امي اتكول بيومها الممرضه الي تنطي اللقاح للاطفال مقبلت انو تلقحني لانوو كان ازدحام وهوسه والجو صيف وحاره فصارت مشكله وتعاركت ويا امي وكالتلها شيلي الطفله وروحي ما القحها !!!

امي اصرت وعاندت الا اخذ اللقاح المهم بعد نقاش وصياح وهوسه وتدخل الدكتور المسؤول انطتني اللقاح .
طبعا الله سبحانه وتعالى يدفع عنه هواااااي بلاء بس احنا نصر ع الغلط.

ومثل مكلتلكم القدر يلعب دور بس تبقى حكمة رب العالمين فوووك كولشي .

اخذت اللقاح ورجعت نيمتني امي .. بعدها بساعات كعدتني شافت حرارتي مرتفعه
طبعا هذي الاحداث بزمن النظام السابق يعني العنايه الطبيه والوعي عند الناس اثنينهم قليلات والناس يلا يلا مدبره عيشتها يعني محد عنده يروح للطبيب ومراجعات الدكاتره فأغلب الاحيان يعتمدون ع الادويه البسيطه والاعشاب وهذي سوالف البيبيات والاشياء المتعارف عليها ببيئتنه
وماكوو اهتمام بالجانب الطبي وعنايه بالمريض ..

من شافت امي درجة حرارتي ارتفعت سوتلي كمادات وحاولت تخفض الحراره بلا متاخذني للدكتور او تشوف حالتي ع بالها شي طبيعي !

المهم فعلا بعد كم ساعه نزلت حرارتي ومثل مكلت اني كنت حركه ونشيطه فأمي شافت عندي خمول وما اتحرك حاولت اتكومني اتمشيني ماكووو شافت رجليناتي ميتحركون وبالتحديد رجلي اليمين !!!