انا قبل ان التقيك

البارت 13

بقلمي الاميره الموسويه 👑

ما احلل لاي شخص ياخذ كتاباتي وينشرهم (ذمه)

*التفاصيل لازم بالتسلسل .. اتمنى تطولون بالكم وياي 🙏🏻

قصي..

قبل 9 أشهر وبيوم عرسي اكتشفت صدمتي بسلار .. وكنت ناوي اقتلها خلاص لحظتها ..!
بس لما فكرت لكيت الموت راحه الها ... واني اريدها تتعذب وتدفع ثمن الي سوته بيه .. لذلك ـقررت انتقم منها بطريقتي
بالبدايه مردت اعوفها واروح .. لانه مهما يكون هاي دكه ناقصه
ميصير اسويها ببنيه (هم زين تعرف 😒).

خصوصاً بيوم العرس ..  تعرفون مجتمعنا ونظرته لهيج مواضيع!!
فكلت اكمل العرس يعني اتزوجها عادي .. وبعدين انفذ انتقامي ،اذلها اكرها بحياتها .. ادفعها ثمن كذبها والي سوته بيه واطلكها.

بس اتراجعت عن هذا القرار لان مكدرت اتحمل اشوف وجها كبالي .. فكرة انو اكمل زواجي منها وابقى ساكت ماكدر اتقبلها...
رغم اني كنت فعلاً احبها وممصدك اشوكت يجي اليوم الي تصير بي مرتي بس .. مكدرت استمر بالتمثيل نفسها واتجاهل انو هي دمرت حياتي!
مااكدرت اتقبل فكره اتزوجها واحقق الي تريده  .. بدون اي وعي وأي تفكير مني
اخذت سيارتي القديمه وطلعت من البيت ... مااعرف وين اروح بس المهم انهزم .. حسيت نفسي مخنوووووك مثل واحد ديحتضر (ديموت)

بقيت افتر بالسياره لحد ماتعبت من التفكير.. رحت حجزت غرفه بفندق .. ذبيت روحي ميت من التعب والقهر مااعرف شسوي.. بقيت على هذا الوضع 3 ايام متصلت بأهلي ولا يعرفون عني اي شي .. واصلا اني موبايل ماعندي حتى اتصل موبايلي عفته بالبيت .. اخذت بس موبايلها القديم ابو البلاوي .. واصلاً شامره ما الي جرئه افتحه واشوف الي بي!
ثالث يوم تعبت كلش لا اكل ولا راحه بس قهر وتفكير
وضعي تعبان ومااكدر ابقى هيج اكثر .. طبعاً اني كنت شايل فلووس ابويه انطاني مبلغ اشتري سياره جديده هدية عرسي
بس اني كنت مقرر ورا العرس اغيرهاا ع اساس ابيع هاي سيارتي واكملها واشتري جديده !
فضمين الفلوس بالسياره محد يدري بيهن تقريبا 5 ملايين حولتهم ورق وضميتهم
بعد الي صار متحملت ابقى بالبيت ولا اكدر ابقى بفندق احس نفسي اتبهذلت وخفت اهلي يدورون عليه ويلكوني!!
واكيد اذا لكوني ابويه راح يجبرني غصباً عني اجيبها من بيت اهلها واكمل العرس بعتبارها فضيحه بنظره ، وع الاغلب يتحول الموضوع لكعدات عشاير وفصول ، لان بأعرافنا هذي تعتبر جنحة صح ميعاقب عليها القانون بس تقاليدنا مترحم لانها تمس الشرف !
المهم ... بعد تفكيييييير طويييييل اجتني فكره .. قررت اترك العراق ماكو !!غير هذا الحل هذي الطريقه الوحيده حتى اخلص منها ومن كلام اهلي .. رحت لولد صديقي من ايام الكليه اسمه سرمد ..طبعاً اغلب اصدقائي من ايام الجامعه انقطعت اخبارهم عني بعد الي صارلي الا كم صديق مقرب .. وسرمد كان من الي انقطعت عنهم يعني ماكو تواصل بينا بس كانت تجمعني بي صداقه طيبه .. لكن الظروف بعد حكمت ولهذا اختاريته لانه اولاً يتيم الام وابو ميسأل عنه الا بالمناسبات فأكيد يروح وياي واشكد مااطول يبقى عادي .. وثانياً .. لانه ع الاغلب ميعرف بموضوع زواجي حتى ميبقى يحقق وياي او يتصل بأهلي !