من متى و الغصـن يختـار الطيـور..!!

20

20))من متى والغصن يختار الطيور؟!!
،

‏مآ گسر ضلع الثقه غير الظنون ،
ومآ حفر قبر الودآع إلآ التغلي ..!!
،
،
،
"خوف من المجهول"..
كل شي مظلم حولها ..وماتقدر تشوف مستقبلها بعد اللي صار لها.. كل شي تغير.. هي ماعادت "لوجين" الأوليه..و اللي صار لها هدم ثقتها بنفسها وخيّب أملها..
حتى الحُب اللي كانت تظنه بيخلي مشعل يدور عليها تبخر وانتهى كل شي بالنسبه لها بعدما عرفت ان مشعل استعاد عافيته وما سأل عليها!! ... ضلت حبيست غرفتها من الليله الماضيه... من بعدما سمعت صوت مشعل بالتلفون ضاقت بها الوسيعه..
،،
في منزل الجد في "حي النهضه"..،
ام لوجين دخلت وتنادي/لوجييين،حبيبتي.. أنا جيت وينك؟
مافيه رد!!
هدى خافت وراحت تدورها بالمطبخ وبالغرف والمجالس اللي تحت ومالقتها.. وقررت تصعد فوق تدورها/لووجيييين
ام لوجين اتجهت لغرفة لوجين وهي مستعجله وفتحتها بسرعه وارتخت اعصابها/لوولوو.. انتي هنا!! خوفتيني يا شيخه.
لوجين جالسه بنص سريرها وتضم رجليها لصدرها وساكته وكأنها سرحانه/..!
ام لوجين اتجهت لها وجلست عندها وربتت على كتفها/لوجين وش فيك؟ ..قلت لك لا تهملين اكلك.. و شكلك للحين ما افطرتي!! ..ناسيه انك حامل!! "
لوجين تتكلم بوادي ثاني/مشعل ما سأل عني.
ام لوجين/هو بغيبوبه يا بنتي شلون يسأل عنك لا توسوسين
لوجين بقلب محروق/بس أنا اتصلت فيه بدون اكلمه
ام لوجين/وش قصدك؟..يعني هو اتعافى و صحى من غيبوبته؟!!
لوجين وهي موجوعه نزلت دموعها/مشعل معاد يبغاني يمه اتصلت على جواله و رد علي بنفسه..هو صحي من غيبوبته ويرد ع الاتصالات و ماكان فيه شي..مشعل خلاص نساني يمه.. ويمكن اللحين يخطط يتخلص مني بعد آه يمممه
ام لوجين ضمت بنتها وتهديها/خلاص يا بنتي وكلي ربك.. يمكن هو مابعد عرف شي عن موضوعك..وبعدين لا تخافين لو فعلاً مشعل يحبك ما راح يقتلك حتى لو أمره ابوه..
لوجين مو مرتاحه ابد وضلت تبكي بقهر/اقولك رد علي بنفسه يممه رد علي بنفسه.وكان صوته طبيعي، ليه للحين ما سأل عني ودور علي لييه
ام لوجين حست ان لوجين منهاره فعلاً من رعشة يدينها وهي تضم راسها بيدينها وتضغط عليه بقوه/لوجين اذكري الله.. لا تخوفيني عليك،لا تنسين انك حامل وسبق ونزفتي.
لوجين كرهت سالفة انها حامل، تركت أمها وهي ساكته واتجهت للحمام.!!
ام لوجين قامت واتجهت لها/لوجين لا توججعي قلبي،لا تسوين بنفسك شي، انتي مو لوحدك ..أمك معك
لوجين ضلت جالسه على طرف البانيو و محتفظه بسكوتها وهي تحس انها خلاص خسرت كل شي،..
/
/
/
/
/
الجنوب**
رجع اليوم للبيت وكان ما وده انه يرجع البيت،لكن لأنه مريض ومحتاج رعايه لازم يرجع للبيت ويستريح..
دخل مشعل البيت ويادوب يمشي ،بجبيره في يده اليسار و جروح طريه بجسمه، وقف وهو مايبي يطالع بالاماكن اللي جمعته في لوجين"/السلام عليكم
ام مشعل استقبلته بالاحضان/هلا يا ولدي هلا.. توو ما نوور البيت يا بعد هلي وناسي انت
مشعل ابتسم ابتسامه خفيفه واختفت بسرعه/الله يبقيك يمه..
زينه باسة راسه/الحمدلله ع السلامه يالغالي
مشعل/الله يسلمك زينه
ام مشعل/يلا روح غرفتك ارتاح.. اللحين تعبان ولازمك راحه.
مشعل/لا خليني شوي
زينه/اللحين روح ارتاااح لأن بالليل جايين خواتك يتحمدون لك بالسلامه وبكره عندنا استقبال وعزيمه علشان حضرتك..يعني اليوم اخذ راااحتك
مشعل اصلاً حاس بتعب ووده يتمدد لان رجله ملفوفه بسبب تمزق عضلي ورضوض من السقوط عليها وقت ما أُصيب...
ام مشعل/يلا يا ولدي ادخل ارتاح.. وعلى هونك لا تضغط على نفسك واجد..
زينه قربت منه/انا بساعده.. هات يدك
مشعل مشى وتركها/ما يحتاج... انا اعرف امشي لحالي..
زينه رحمته وهو يكابر على جروحه/براحتك
ام مشعل/اتركيه وروحي جهزي القهوه لابوك وعمك في المجلس..
زينه/طيب..
/
،
مشعل صعد للدور الثاني بصعوبه.. و اتجه للجناح حقه هو ولوجين وقف وهو يتذكرها و تمر صورتها قدام عينه..
اتجه للجناح ودخل لغرفتهم وناظرها بنظره بانوراميه وتذكر كل شي صار بهالغرفه.. ابتساماتها ونظراتها الناريه وشكلها وهي تصرخ عليه وشكلها وهي تطرده من الغرفه وشكلها وهي كاشخه وواقفه هناك عند التسريحه وتتعطر..
وشكلها وهي تحاول تتقرب منه وهو يتركها ويمشي..!!
وهو ياما تقرب لها وصدته!!
أصلا علاقتهم كانت مضطربه من بدايتها!!
وآخر شي تذكرها وهي تلبسه الكبك في أكمامه ونظراتها الدافيه له.. استغرب من هذيك النظرات وماعرف وش تفسيرها.. وبالوقت نفسه كره هالنظرات اللي كانت آخر نظرات و من بعدها هربت...