فيك وجدتُ ذاتي

البارت الرابع

صح مكان الوقت كافي حتة نتعرف على بعض
بس ماادري اشو گلبي نقبض ليش مادري
وكنت حابة اتعرف عليه اكثر حتة لااستعجل
باتخاذ قراري كنت اريد اتعرف عليه عن قرب
بس ولو هو اليعرفون بعضهم عن قرب وتحت سقف علاقة كمايسميهة البعض ويتفاجئون بعد الزواج من اخلاق واطباع بعضهم
ممايؤدي الى التنافر واحياناً الى الانفصال
بعد ماراحوا صاحلي والدي اني جنت بالغرفة وية حوراء داتسألني عن امجد
واني مااقبل احجيلهة لان استحي
وهي ساعة تدفعني ساعة
تتودد حتة احجي اخر شي زهكت وعافتني
فرحت اشوف والدي كال هااا فطومتي
شنو رأيج باستاذ امجد
اني خجلت ودنكت راسي
كال معقولة فطومة الدرست عندي
كتب الفقه وغيرهة من الكتب والكانت
تحاورني وتناقشني عن مواضيع حساسة
هسة مدنكة خجلانة
كتلة لا لا شيخنة ااوكف ذاك درس
وعلم ولاحياء بالعلم
وهذا زواج و واقع فاكيد اظهر بعض الخجل
جان هو يضحك هههههه يعني دتظهرين
مو هذا حالج
هسة عوفج من الخجل شنو قرارج
كلت بكيفك يابة قراري بايدك
وشدكول اني موافقة
كال اسمعي بنيتي الزواج حياة طويلة
قد تكون سعيدة وقد تكون العكس
بس اكلج شي خلي دائماً باوليات تفكيرج
الانسان هو اليصنع السعادة
السعادة متصنع الانسان
والسعادة لا بالاموال ولا بترف
ولا بالامور المادية
السعادة من تجدين شخص يماثلك الدين
والخلق  والفكر وتصلين وياه حد الانسجام
الفكري والروحي
اني اضمن الج استاذ امجد بكل الامور
الا ان تصلين وياه حد الانسجام
هذا انتي وياه تحددوه لاغير
ومتعرفين هلشي الا بالعشرة
وهسة نكول على بركة الله لو شنو
رغم كلامة ظل صداه يدوي براسي
بس هزيت راسي بالقبول
ورحت الغرفتي
العرفتة بعدين ان استاذ امجد ابدى
قبوله وموافقته بااكمال اجرائات الخطبة
وكان مبين قبوله وحماسه اليه
مشت الايام وصار موعد الخطبة وهو في نفس الوقت العقد
اجن خالاتي عماتي كانن مزوجات بغير محافظات
لكن اثنين من خالاتي كانن ساكنات بالنجف
فاجوي خطية من الصبح
نظفوا وهيئوا وياي البيت والدي مقبل
يتعبهم جاب الكيك والحبشكلات جاهز
واخذوني خالاتي للصالون وجهزوني
اني مقبلت احف بس سويت
تعديل للحاجب ومكياج جداً خفيف
وفستان بصلي طويل اني وخالتي اشتريناه
ومقبلت تسريحة مجرد تسريح شعري وخليتة
مفتوح شي على شي طلعت حلوة
رجعنة لكيت عمامي موجودين لبست
شال جداً طويل ابيض ورحت سلمت عليهم
باركولي وكالوا سبقنة الاستاذ الة احنة
جنة نتمناج الواحد من اولادنة بس
بعد كلشي قسمة ونصيب
ويارب تكون قسمة زينة وحظ سعيد
صار العصر اجوا اهل امجد امه مرة طيبة
وكانت عدهة حالة نفسية بعدين عرفت
ساعة تصير طبيعية وساعة تبقة بس صافنة
عبالك بغير عالم طبعاً هيج صار بيهة من
اتوفة اسعد اخو امجد اغتالوا نظام البعث
بسبب نشاطه السياسي فبقت على هذا الحال
كل هاي المدة
دخلت اختة كانت لابسة ومتأنقة كان جمالهة
متوسط بس ينقصهة تواضع وطيب كلام
هي مدرسة لكن مطلقة لذلك كانت عدهة عقدة
هيج جنت اشوف من خلال تصرفاتهة وكلامهة
كعدوا الزلم وتفقوا بعدين والدي اخذ امجد
بغير غرفة حتة يعقدلنة
ودز خالاتي صاحني اني جمدت
بس هنة هدئني جان تنب اختة ديلة ياعيني
قابل راح يذبحوج هي هنيالهة تصير
زوجة استاذ امجد
اني سكتت وطلعت لبست احرام الصلاة
وغطيت وجهي لان مكيجة فمن نعقد اشيلة
دخلت وكعدت بصف والدي وتلة علينة صيغت
العقد بس كان صوتة مخنوك ومبحوح
باين عليه الحزن اني ضعت بصوته ونسيت
كل الموضوع ماصحيت الة من صاحلي والدي
فطومتي جاوبي
يلة عرفت انه كمل صيغة العقد  ومكررهة اكثر من مرة ومنتظر ردي
فجاوبت بالقبول وبارك النة وقبل جبيني من
ورة الحجاب وكال اخذوا راحتكم
وباركوا البعضكم
من طلع والدي جنت مجمدة من الارتباك
شلون بية ياربي انطيني الجرأة
حتة انزع حجابي
مااحس الة صوت امجد كال هاا فطومة
لو اصيحلج فطومتي مثل الشيخ ههههه
شنو راح اظلين هيج مبوشاية
يمعودة اني صرت زوجج بعد اكيد
الشيخ شرحلج طبيعة علاقتنة
يتصور اني مااعرف بهاي الامور وميدري
بكم المعرفة العندي بس مشكلتي مااعرف اظهرهة
كال يلة يمعودة هسة منحس الة الشيخ
كال خلص الوقت
عاد اني كلت مامنهة مفر خل انزع الحجاب
نزعتة وفتحت الحرم بس مو  كلش عالنص
جان هو يكول ماشاء الله تبارك الخالق
مبروك فاطمة ويارب حياة سعيدة
تسعديني واسعدج
اني نتبهت قدم سعادته على سعادتي
بس مجبيت اعلق
كتلة الله يبارك بيك وان شاء الله اكدر اسعدك
كال كل هذا الجمال ومسعديني مستحيل
كام من مكانة واقترب علية
ولزم ايدي جانت ايدة باردة محسيت بدفو
بس جفلت كال بعد ماكو جفلة انتي زوجتي
شاسوي وياج عادي واريدج تبادليني
اني بقيت صافنة هذا شديحجي
هستوني شفتة يريدني ابادلة
بعدين وهي ايدي بايدة بدة يسحبني شوية شوية
الة وهو يحجي ماادري اني انصطرت
كمت ماافهم الكلام هم رجل كاعد بصفي
وهم لازم ايدي حيل وهم يتغزل
حتة مكمت اركز على حركاتي او كلامي
بس حسيت على نفسي من صارت انفاسة
الدافية قريبة على وجهي
عاد ابتعدت وسحبت نفسي
اشو هذا ضاج كال هاا خير شكو

ولحكايتي تتمة