فيك وجدتُ ذاتي

البارت الثامن

ان ذيج الشغلة ميتركهة ولا مرة صايرة عندة
لا نوب اني المبادرة اكيد عندة امر
شاغلة ويارب يكون حدسي خاطئ
ثاني يوم كعدت ملكيتة
نزلت تريكت وريكت عمتي وسويت غدة
ولملمت البيت وصعدت بغرفتي اطلع
واقرأ بعض الكتب بس مرات
اسرح وافكر بشنو شاغل بال امجد
معقولة بحياتة وحدة
زين اكيد كل اسراره بالحاسبة
اروح افتح الحاسبة واشوف
لا لا شنو افتح الحاسبة هاي اني
شجاي افكر وين اخلاقي وين وصلت بيه
اخليهة على الله هو حسبي و وكيلي
نزلت على صوت الباب لكيت نجوى
جاية من الدوام سلمت كالت شمسوية
غدة طبعاً ماعدهة غير صيغة الامر
كتلهة برياني وسوب لحم
كالت اي هم خوش اكو شي عاد فالحة بيه
كانت دائماً تعيرني وتحاول تستصغرني
لان ماعندي شهادة مرة ولان مصار عندي
طفل مرة ثانية
على الرغم شغلة الطفل مو بيدي اني رحت
الدكتورة مع خالتي وجيكت وضعي كالت كلة
تمام وماكو اي مشكلة
كلت لعد لو عندي مشكلة شجان سوت بية
نجوى الله العالم
ثواني ودخل امجد مبتسم كعادة هالايام
المضت سلم وكال الله الله شنو هلروائح
الطيبة كلتلة اي همزين عاد مدبرة الطبخ
هو بتسم وصعد مرد شي على كلامهة
ولا حاول يدافع عني
اني بقيت ساكتة بس كلش مجروحة
حسيت خطوات رجليه نزل من الدرج
كال صدك نسيت باجر عدنة خطار
عالغدة اريد غدة مرتب
كلتلة اخته خيار منو جاينة
كلهة زميلة الي بالعمل جاي تساعدني
بتكميلة بحثي وعزمتهة عالغدة
اني مثل الطابوكة وكعت على راسي
حسيت خلاص كل شكوكي ثبتت
بس مبينت شي حاولت اكون طبيعية
جان نجوى تباوعلي صفح كالت اي ليش
لا حبيبي من عيوني لاتخاف راح ارفع
راسك وباجر اخذ اجازة حتة اتفرغ
كالهة كفو منج حبيبتي وصعد
صار ثاني يوم طبعاً مخلو شي مجابوه
اشكال الاكل والحلويات واغلب الاصناف
من طبخي ونجوى بس تتأمر اطبخي
وسوي هسة دكلولي ليش معندج راي
اني ممتعودة على هيج حياة
صح كنت بيت والدي مدللة بس مكنت اعرف
كلمة لا مجانت واردة بقاموس كلماتي
مو لان اخاف او والدي صارم
لا بس كل الامور اليطلبهة مني المصلحتي
والتعليمي وهماتين مكنت اعرف اعارك
او اتناكر اني وحوراء كنة كلش هادئات
وماعدنة مشاكل بحكم تربينة وية رجل
رزن وهادئ ومكان عدنة اختلاط مع احد
فكتسبنة منة هواي من صفاته فدوة العمره
صار وقت الضحى وحسيت اجة امجد
صاح تفضلي تفضلي ست نادية
وينج نجوى فاطمة تعالوا استقبلوا ست
نادية اني كنت متحضرة
لابسة فستان طويل وحاطة مكياج خفيف
وفاتحة شعري طبعاً
طول بهذي الفترة صار الخصري
بس مصابغتة مابالي اصبغة او اسوي
كصة تجذب جديدة ولا امجد كان يطلب مني
من طلعت شفت وحدة نهاية الثلاثينيات
اقصر مني جسمهة لاسمين ولا ضعيف
سمرة معانيهة جداً عادية كانت تلبس
تنورة وسترة لبس رسمي
من شافتني منزلت عينهة عني
ظلت بس تباوع من جوة ليجوة بس نظرات
ماعرفت افسرهة بوقتهة
بس مكانت نظرات ودودة
استقبلناهة ودخلت للاستقبال
وطبعاً زوجي كان كلش فرحان ويريد
يشيلهة على راسة مو بلگاع
وكلساع وكلهة ست نادية تعالي منا
ست نادية اكلي هيج
ماخذ راحتة ولا كأن زوجتة موجودة
حتة مباوعلي بيومهة
من كملوا غدة رحت للمطبخ لان وجودي
يمهم كان خانگني بحيث اشوية وابجي
كملت المطبخ وكعدت عالقنفة بالمطبخ
وسمعت صوت امجد صاحني
صعدت الغرفتي عدلت نفسي وحطيت
عطر وبدلت فستاني بفستان غيره
بسرعة ونزلت اخذت الجاي ورحت
دخلت كال هاي وين رحتي
ردت نجوى بالمطبخ قابل وين وضحكت
باوعت عالنادية ابتسمت اما امجد فكتفة
بالسكوت جاوبتهة مدام حبيبي هيج
يريد فعلى قلبي مثل العسل
طبعاً ضاجت نجوى ونادية عتكف وجهة
كالت نادية انتي شمكملة دراسة
كتلهة اعدادية وبطلت مردت اكول
امجد بطلني واكسره كدام ضيفته
كالت اي عدنة البنت من تكمل السادس
عبالك خلاص بعد اخذت كل مبتغاهة
وظل تنتظر شوكت تزوج شنو الحياة
بس زواج تفكير حجري
كتلهة بالنسبة للدراسة متقتصر فقط بالاكاديميات
ممكن الانسان يوصل مرحلة متقدمة وهو كاعد
بيته وبالنسبة لزواج ملحكت اكعد
وانتظر اني كملت دراسة بس اخذت
النتيجة اتقدم امجد وحبيبي جان كلش
مستعجل ههههههه
اشو هاي نتفضت وضاجت كلش
سألت سؤال اني اعرف هي تعرف جوابه
بس حبت اتغثني
كالت اكيد التهيتي بالبيت والجهال
ومحبيتي تكملين
ردت نجوى لا ياجهال يمعودة همة وينهم
باوعتلي بعين استصغار
اما امجد كان مكتفي بالنظر فقط
اني ترخصت كتلهم اشوف عمتي
خاف تحتاج شي
شفت عمتي وخطية فعلن كانت عطشانة
شربتهة مي ونومتهة وصعدت
الغرفتي ظليت ابجي وضايجة
لان حسيت بالاهانة ونجرحت وامجد مدافع
عني ولا حسسني انه يحبني وقابل بيه
مشت هاي الفترة واسم نادية
ميفارق نجوى بالاخص من امجد موجود
كلة مدح باناقة وذوق نادية وثقافتهة
على الرغم نادية كلهة على بعضهة
عادية جداً بس كانت غاية نجوى
تغثني او خاف اكو فكرة بال امجد
حتة اتأكدهة اكثر
طبعاً انشغال امجد زاد وزاد اهمالة
وزادت طلعاتة وزادت مبايلاتة وكعداتة
كدام الحاسبة كل هذا اعرف وراه نادية
بس مابيدي شي اغيره

ولحكايتي تتمة