فيك وجدتُ ذاتي

البارت السابع

مرة كاعدين بالغرفة وانتبهت لامجد كان
مخبوص جدا بالحاسبة وكانما عندة امر مهم
كتلة خيرك امجد بيك شي؟
كال لا ماكو شي بس عندي بحث يحتاج تدقيق
ومحتاج اجمع عنه مصادر
فلذلك شوية مشغول
كتلة اذا تحب اساعدك باوعلي وضحك ضحكة
صفح كال شلون بلة اساعديني
كتلة لاتنسة اني عندي اطلاع بكثير من الكتب
واصور اطلاعي يكفي لاعرف انواع الكتب التحتاجهة
كال شوفي حبيبتي الاطلاع شكل والدراسة شكل
ثاني اني شغلي حساس يحتاج معرفة ميصير
شلون ماكان ودار وجه رجع يشتغل عالحاسبة
اني بوقتهة يمكن صخنت بكد ماحسيت باهانة
اذكرت طلبة الوالدي بوقت الخطوبة كلة عمي
اطلب منك فاطمة متكمل دراسة
والدي كلة نشوف الله كريم
طبعاً مكان يدري والدي بالاصل ناهي دراستي
زين اني عندي اطلاع ومعرفة شلون اكدر اقنعك
بمعرفتي اذا انت متنطيني مجال
ولا فد مرة قبلت اساعدك
ولا فد مرة حاولت تعرف مدى معرفتي
شلون تحكم علية بلا متحاورني او تسألني
اااخ راسي احسة صخن
بعد فترة جان كاعد عالحاسبة كالعادة من العمل
للحاسبة لايكعد وياي ولايحاول يكلمني
او نطلع سوة غير بس
يوديني لابوية كل خميس ماكو غيرهة
وهم لو ما والدي شارط عليه يمكن مكان يوديني
لان دائماً يتململ يوديني فيجي والدي
ياخذني
فشفتة بعدة مخبوص بشغلتة كتلة شنو
امجد بعدك مشغول ابحثك
كال اي بس جماعة جاي يدورون على مساعد
يساعدني بجمع المصادر الاحتاجهن بهذا الموضوع
كتلة خوش احسن الك كال اي باجر يشوفونة
ماكو شي جديد بحياتي دتمر بملل وفراغ
وماتخلو من مضايقات نجوى
تجي من الدوام تريد الاكل جاهز
تاكل وتنام تكعد باليعجبهة
اما عمتي يمكن بس هي ارتاح اكعد
يمهة لان متعرف شكو بالدنيا عايشة
بغير عالم مرات احسهة مثل الطفل
اني اعتني بيهة واداريهة لان خطية حتة
بتهة مامهتمتلهة
اجة امجد كأنه على محياه بسمة
كتلة ياالله شنو هل ثغر الباسم
كال هههه لا ماكو شي مجردتعقيدات عملي دتنحل
كتلة ربي يوفق ومشوف غير البسمة
باليل دخلت للغرفة لكيتة يشتغل
على الحاسبة وهو مبتسم
كتلة بعدك ادور على مساعد
كال هااا لا لكيت جماعة لكولي
كتلة جيد شنو مهنتة
كال اعلامي اختصاص نقد وترويج كتب
كتلة زين قبل بالعمل
كال اي بسرعة قبلت وسكت
كتلة قبلت!!!!
كال هااا اي مو ملكيت رجل فكانت
اعلامية متاحة وقبلت بهيج عرض
كتلة مادري الاعرفة استاذ امجد ميقبل
يعمل مع النساء يخاف لايقع في فتنة
كال اي بعدني على مبدئي بس هذا عمل
ومراح نلتقي فقط بالحاسبة
سد الحاسبة وكال تعالي ليش دوخيني
بهاي الاشياء تعالي اريد انسة كلشي
*****
طبعاً هو صح ينسى كلشي الا ذيج الشغلة
كان ميكدر حتلوو مريض لازم
فهذا الامر بدل ميرحني من جانبة كان يثير
مخاوفي عليه
وهو هماتين كان دائماً ينعتني بالبرود
يكلي كلشي بيج حلو الا مشاعرج
انتي ثلج
اني جنت اضوج اني مو باردة بلعكس
عندي مشاعر بس السبب بيه او بيه مااكدر اظهرهة
ماادري اكيد راح اعرف السبب بمرور الوقت
طبعاً كثرت جلسات امجد امام الحاسبة
وكثرت بسماته وكمت من ادخل للغرفة
يحسسني انه مضايقتة فما بيدي غير
اطلع من الغرفة مكنت مرتاحة للوضع
بس مابيدي شي
راد يطلع مرة فشفتة متأنق هو صح ميطلع
اذا مو متأنق وعطوره تملي الغرفة
لكن هلمرة غير شكل
حتى يبدل ويبتسم ومرات يصفن
فكتلة هاا حبيبي طالع
كال اي عندي لقاء عمل لاتنتظريني اتعشة برة
زاد شكي بس شاكول اكيد مينطي مجال
افتح الموضوع او سأله
ظل الوقت متأخر بليل اني بقيت انتظرة
بالمطبخ حتة مهالي اصعد للغرفة
اجة تفاجئ من شافني بس كان فرحان
فكلي هاا حبيبتي اشو كاعدة هنا ليش
اني استغربت حبيبيتي وهم سألني
هو بالعادة مالة علاقة بية اكعد اصعد انام
اهم شي عندة وقت حاجتة اكون موجود
وخلاص
كتلة حبيبي ظل بالي يمك اشو تأخرت
كال هااا مو كان عندي لقاء عمل وتاخرت
كتلة الاعلامية جانت وياكم
جان نظر بعصبية وكال شتقصدين
كتلة لا مااقصد بس مجرد سؤال
كال بعد رجائاً لاتدخلين بعملي واي اسألة
مااريد ياريت تكرميني بسكوتج
طبعاً صدك ضجت بقيت بالمطبخ وهو صعد
مصعدت وراه ظليت ابجي وحايرة شاسوي
وشلون اصرف اني ماعندي احد اشكيلة
او يعلمني شلون اصرف
مهما كانت علاقتي بوالدي قوية بس
تبقة اكو حد مااكدر كلشي احجي
لاعندي صديقة اختي حوراء ازغر مني وماعدهة تجربة اني اكبر منهة حايرة وعالاساس
 اني صاحبة تجربة فكيف هي
بقيت ابجي وادعي الله اني يهدي
الي اني لا عندي ام ولا صديقة نوب
حماتي المرمرة عيشتي
وهو طبعة بارد ماادري شاسوي
بقيت تقريباً ساعتين جوة
لانزل ولا دور علية خليت وصعدت
دخلت للغرفة لكيتة فاتح الحاسبة
منتبه او مهتم الي
اني كالعادة بدلت وتعطرت وتهيأت للنوم
مددت عالجبرية ظليت احوس
لاساعة ولا ساعتين اشو هذا مااجة
هوصح كان يشتغل هواي بالحاسبة بس مكان
يتاخر باليل لان عندة دوام الصبح
بعدين اجة نام ودار وجهة
اني قتربت منة وحضنتة من ظهرهة
مهما يكون هذا زوجي لازم اقترب منة
كال رجائاً تعبان اريد انام
هنا تأكدت امجد مو خالي وعندة شي

ولحكايتي تتمة