فيك وجدتُ ذاتي

البارت التاسع

اخر فترة حتة المعاشرة الزوجية قلت
وهذا تاكيد لكل شكوكي
الى ان اجة اليوم وفاتحني بموضوع
قلب كياني
فطومة جيبي جاي وتعالي للغرفة
اني سمعتة صاح  فطومة لو متوهمة
لان مااذكر اخر مرة شوكت صاحني بهذا الدلع
اني مكذبت خبر سويت جاي وكعك وصعدت
جان كاعد بس مرتبك ومبين عليه
الحيرة كتلة تفضل حبيبي
باوعلي صفن بوجهي نوب كال تعالي
اكعدي بصفي
كعدت مد ايدة ولزم ايدي
اني عرفت بعد هاي الحركة سالفة جبيرة
كال صار كم سنة مزوجين
كتلة اربع سنوات
كال ليش ماعدنة طفل
اني استغربت طول هاي الاربع سنوات
ابد ماابدة رغبة لطفل وكلما كنت اكلة
نراجع جان يكول عوفيهة على الله
ما مستعجلين
كتلة مااعرف والله اني هماتين اتمنى يصير
عندي طفل بس شبيدي
كال اني اريد طفل بعد مااتحمل كلام الناس
ورغبتي
كتلة خوش حبيبي نروح نراجع ونشوف
كال شنراجع اني مااروح اكيد مابية شي
كتلة اني مسوية فحوصات الطبيبة اكدت
سلامتي من اي مانع يمنع الانجاب بقة
انت لازم اشوف بعدني ممكملة كلامي
جان صاح انتي شجاي تحجين ترة
حجايتج هاي صعبة شنو اليسمعج
يكول مو كدهة قابل شكين برجولتي
لا والله هاي شبيك مو قصدي بس الفراش يختلف
عن الانجاب
كال لا بعد مااريد اسمع شي اني قررت ازوج
اني منصدمت كنت اعرف بوجود قنبلة
بس كنت منتظرة انفجارهة
بقيت اباوعلة وصافنة كتلة علمود الاطفال
كال اي ولا
يعني !!!! فهمني
شوفي فطومة اني احبج بس مااحس اكو
تكافئ بيناتنة اني اريد زوجة اكدر
اوجه وياهة المجتمع وتكون واجهة قوية
بحسب عملي احتاج انسانة مثقفة
مثقفة!!!
شنو معايير الثقافة بوجهة نظرك ؟؟
حتة افهم واعطيك الحق زين اني منو خلاني
انهي دراستي مو انت واذا عالدراسة اكدر
ادرس خارجي مو فد صعبة بس خليهة
ابالك الثقافة مو فقط بالاكاديميات ولا بالطبة
والطلعة احتمال مرأة كاعدة تتلقة دروس بلبيت
اثقف من استاذات خارج البيت
لا الطبة ولا گعدت البيت تكون معيار للثقافة
فكر الانسان هو اليحدد مدى ثقافته
كال شوفي اني احبج ومااريد اتركج
بس اني عزمت على الزواج
منو نادية ؟؟
اي نادية
عالخير ان شاء الله تكون واجهة قوية
خليت ونزلت صارت بوجهي نجوى
جان اطكهة هلهولة بوجهي
عالخير خوية والله ونعم الاختيار
اني عفتهة محجيت شي
هو انطاني مهلة افكر اني طلبت منة يوديني
الوالدي حتة افكر
مكال شي وداني ومن نزلت من السيارة
لزم ايدي كال اني احبج ومااريد نفترق
فكري زين وما راح يختلف شي مجرد
هي تجي تشغل غرفة بالبيت وعلاقتي
بيج هي نفسهة ماكو اختلاف
صفنت بوجهة هذا من كل عقله مقتنع ان علاقتة
قوية وياي يجوز صدك بس هو جامد ميحب
يظهر حبة الي احتمال يحبني وميكدر يتركني
ما ادري ....
سولفت الوالدي خطية كلش نقهر وضاج
كال بابا هذا بيتج ومدام بعدني اتنفس
محد يكدر يغثج ويهينج اني مااقبل بعيشة
بيهة اذية الج انتي كولي شتردين ومهما
كان قرارج راح اساندج
بست ايدة وكتلة ماعايشة بس على انفاسك
من تخلص انفاس شيخ حسن اني خلاص
اعتبرني بااعداد الاموات
حضني حيل وكال اسم الله عليج فطومتي
بقيت يم اهلي يومين واجة امجد
كعد وية بابا وتكلم بموضوع زواجة
هو كان رايد خاطر والدي بس مصر على زواجه
ويحاجج والدي بالشرع وانه ممسوي شي
حرام والدي ترك الامر يمي على قراري
يعني امري بكيفي
اني بهاي اليومين هواي فكرت مكدرت اطلب
الانفصال جنت خايفة من هاي الفكرة
حتلو والدي مساندني بس ماعندي الجرئة
اخر شي كلت خل ارجع واتحمل الوضع وين
متوصل خل توصل
طلعت اترخصت من والدي وكتلة يابة حرجع
وية امجد البيتي هو دنك وكال براحتج بنتي
بس لاتنسين عندج اب يفديج بعمره
بوست ايده وطلعت
كان امجد هادئ وكلما يشوفني يبتسم
كنت ابادلة الابتسامة بس كان گلبي موجوع
احسة مجروح واعرف هاي مجرد بداية الجرح
بعد الحبل علجرار
بهاي الفترة كان امجد مشغول بين تحضيرات
الزواج وترتيب بعض اموره فنساني
او كان يحاول يتناساني لا حاول يخفف المي
ولا حاول يقترب مني ويحسسني بقربه
ابد كان هو بوادي واني بوادي
مليت من نك نجوى وكلامهة ودلعهة من
اجيب ذكر نادية وكالعادة اظاهر بعدم
المبالات الى ان اجة يوم زواج امجد
كان يحضر والفرحة مالية وجهة عبالك اول مرة
يزوج او كان ينتظرهة سنين واليوم يحضة
بيهة ....من صارت الزفة واخذهة امجد
الغرفتهة طبعاً اني مطلعت للحفلة بس من
زفوه من الهوسة الصارت عرفت هو دخل على نادية...تعرفون احساس واحد يصبون عليه
صطل مي حار يغلي على گلبة لا متعرفون واتمنة
محد يعرف ويجرب هذا الشعور هيج جنت احس
نار لا بركان مااعرف شنو اوصفه
لا فادت صلاة ولا قراءة قرآن احس روحي
فرفحت اخر شي حسيت بعد مااتحمل
خابرت على بابا كتلة تعالي محتاجتك
ماحسيت كم دقيقة واخابرني كال انزلي
ياروحي اني بلباب ..لبست عبايتي وبوشايتي وخليت بسرعة كم قطعة ملابس ونزلت باوعت على
غرفة نادية بحسرة وبالم ظليت اباوع
تمنيت يطلع من الغرفة ويكول فطومة
حبيبتي جنت اشاقة وياج او يكول نفسي
مارغبت غيرج او خطأت بس ماكو
ولحكايتي تتمة