فيك وجدتُ ذاتي

البارت العاشر

بس ماكو شي صار من هذا كلة طلعت البابا
واني ابجي هو ساكت محجة شي
طلعنة كتلة اريد اروح لامير المؤمنين اريد
ارتاح كال صار
رحت دخلت على الامير واني احس دموعي
تحجي مو لساني بين خجلانة من شعوري
وبين مقهورة على حالي ظليت بس ابجي
وهمزين الحضرة كان بيهة زوار قليل بحكم
الوقت متأخر فضليت لازمة الشباك
وابجي بحركة اجت المنتسبة بالامام حاولت
دكومني البصفهة كلتلهة تركيهة خطية
مبين عليهة مهمومة خل تفرغ همهة للامام
وفعلاً فرغت كل حزني وهمي بالامام
مااعرف شكد ظليت بس من طلعت
لكيت والدي كاعد بصحن مقابيل خروج
باب النساء ومنتظر وعينة كلش حزينة
كام بسرعة اتوجه الي كال هاا باباتي نشغل بالي
عليج لا اكدر اطب ولا اكدر انتظر
باوعتلة كتلة لاتخاف اني بنت شيخ حسن
ماانكسر بسهولة  عصر ايدي حيل كال ماعاش
اليكسرج واني موجود
رجعت لبيت والدي وظليت سبوع مقهورة
صحيح بس مو مكسورة من زرت الامام
عليه السلام حسيت حملي نزاح وطلبت
من الله ومنه القوة والصبر ويوفقني
على البيه صالح وخير ويبعدني عن الحرام وان صغر...بهذي الفترة مااتصل امجد ولادز رسالة
مكلت البابا بس هو جان حاس
ولا سالني حتة لا يحرجني
سابع يوم العصر  وصلتني رسالة من امجد
فطومة حضري نفسج بليل جايج اخذج
...مشتاقلج
ظليت اباوع عالرسالة واضحك اكول هسة
يلة ذكر عندة زوجة لا ونوب مشتاقلي
فكرت كلت ليش هلكد مهتمة اذا رجعت
خل ارجع بقوة مو بضعف
خابرت على خالتي البيتهة قريب علينة
طلبت منهة تاخذني لصالون
خطية بسرعة اجت وجانت كلش مقهورة علية
حضنتي وكامت تبجي كالت انتي
ريحة المرحومة مايهلي اشوفج ضايجة
كتلهة لا تخافين ماعلي شي
رحت سويت بعض التعديلات النفسي
زادتني ثقة لان صارلي فترة ممرتبة
فجنت محتاجة هيج ترتيب
بليل اجة امجد واخذني للبيت من صعد
بسيارة التفت اخذ ايدي باسهة كال مشتاقلج
اني درت وجهي عالجامة ومحجيت شي
وصلنة جانت نجوى بالمطبخ طبيت سلمت
هي كوة جاوبت وخلت وراحت الغرفتهة
 جان تطلع نادية لابسة ثوب نوم وفوكهة
روب اني بحياتي مطالعة خارج غرفتي
بهيج ملابس هي صح جانت مهتمة بمظهرهة
مكياج عالموديل وبس الثوب الابستة يمكن
من ارقى ماركة والعطر التارس الممر بين
المطبخ وغرفتهة بس مكانت حلوة
شكد متحاول بس مجانت حلوة يمكن صدك
ويمكن لان اني مااحبهة هيج اشوفهة
سلمت وكتلهة مبروك
هي ردت بتعجب يمكن جانت تصور اهجم
عليهة واعاركهة ههههه علشنو ماكو شي
يستحق اتعارك عليه
جان تكلب حجيهة وتبدي تتموع كالت
مجودي حبيبي والله اشتاقيتلك
عبالك مفاركتك اسبوع مو ساعة
اني خليت وصعدت لان الموقف سخيف بشكل
متحملت ابقة
واني اصعد سمعتة يكلهة حبي ندووو لازم بعد
تتحملين يوم يمج ويوم يم فاطمة
كالت اووووف شيصبرني
اني دخلت الغرفتي ذبيت العباية وغيرت ملابسي
لبست ثوب كيمونة ستريج نهايتة منقشة ورد
خالتي خطية جانت جايبتة الي
وشعري مفتوح محسيت الة دخل امجد ظل
يباوع علية ومبتسم كال هاي شمسوية
بشعرج كتلة ليش محلووو؟؟
لا لا بلعكس حلو بس شعجب شنو بسلا غرتي هههه
لاشنو اغار سويتة النفسي بس
انت مجنت توديني وخالتي ودتني كلت فرصة
وين وشلون كضيتي الاسبوع ؟؟
شيهمك اني وماموجودة مو احسن حتة يخلالك الجو الندووو
كال اهاا بدينة من هسة
حبيبي لابدينة ولا نتهينة اني مالي علاقة
بيكم ولو اريد مشاكل مجان رجعت
يلة فطومة انسي تعالي الحظني مشتاقلج
هاي نوب شطالعة شنو هلجمال شنو هذا الثوب
الحلو
اني من بداية زواجي الحد هلحظة ممنعت نفسي
منة ولا رفضت مو حباً بهذا الشي لا بلعكس
اكثر المرات اكرهة بس لان مااريد اغضب
الله وهذا حقه ميصير امنعه
اني مامانعت لمساته وحركاته وكلامه الي
الي كان يريد يرضيني بيه مادري مشاعرة
محسينة الة باب الغرفة تندك قوي
حتة اني فزيت
لبس بسرعة وفتح الباب وطلع جان اسمع
نجوى تعالي حبيبي فدوة مااتحمل تتركني
اني مو عروس شنو انام وحدي
اسمعه يكول شنو هاي الحركات حبيبتي
ميصير يوم الج ويوم الهة يلة حبي نزلي
شنو انزل شجنت اسوي وهاي شنو بيك
عطر غريب يااا شنو مشبعت صار سبوع كلساع
تريد وهسة تروح جنك مشايف
هي كانت تتقصد تسمعني حتة تغثني وبالفعل
نجحت غثتني وبجتني هم
كالهة ندووو هاي زوجتي مو وية وحدة من
الشارع مالج حق تحاسبيني
هاا هيج دكول لعد وين وعدك الي
اني المفضلة واني تاج راسهة وانت تحبتي الي
وبس
اشششش تعالي نزلي امشي يلة
اني اسمع بس مااعرف شأحس احساس
عجيب وصعب محاسة بيه ولا اتمنة احد يحس بيه
اخذهة وراح للغرفة مالتهة اني عرفت بعد ميجي
لملمت نفسي ورحت سبحت ردت امسح لمساتة
وكل احساس وياه مااريد احس
طلعت صليت ركعتين وزرت زيارة عاشوراء هي سلاحي من عمري سبع سنوات الحد هسة
اني مداومة عليهة جان بابا يكول
ماكو سلاح مثل زيارة عاشوراء
حسيت بطمئنينة وسكينة لفيت راسي ونمت
كعدت الصبح لبست وغسلت ونزلت
رحت بسرعة الغرفة عمتي جنت مشتاقتلهة
البارحة من اجيت مشفتهة جانت نايمة
بوستهة وسويت ريوك الي والهة وكعدت اتريك
ولحكايتي تتمة