فيك وجدتُ ذاتي

البارت الثاني

جان يتقدمولي بس والدي ميقبل رادني
اكمل سادس علمي وبعدين يشوف الانسب الي
مرة كاعدة بالمطبخ دااطبخ
طبعاً اني بحكم وضعي وان ماعدنة احد بالبيت
اتعلمت اني اقوم بواجبات والدي واجبات البيت
على لاكدرلة طبعا والدي رغم شغلة ودراستة بس
كان دائماً يساعدني بتجهيز الاكل
او حتة مرات بتنظيف البيت
ربي يحفظة الي جان كلش حنون ويخاف علية
ودائماً ايكلي اثقلت عليج وانتي طفلة
بس اني مجنت اشوفة ثقل بلعكس
اشوفة فرصة للتفكير وتجميع الافكار
بذهني واني اشتغل
افكر كانت وسيلة لتصفية عقلي
مكنت ام بيت ناجحة مية بالمية لكن
كنت مدبرة ومرتبة
فكنت اطبخ وسمعت والدي صاحلي بابا
فطومة وينج
كتلة هاا يابة هياتني بالمطبخ هسة اجيك
كال اي يابة كملي وتعالي انتظرج بالمكتب
كملت ورحت دخلت للمكتب
طبعاً والدي مخصص غرفة من الغرف
الة مسويهة مكتب وهي هم للضيوف
كان مملي رفوف كتب داير مداير ممليات
كتب وموسوعات وابحاث
كان مولع بالدراسة والقراءة
وكان مفروش مدات بسيطات ومخاد
كلي تفضلي باباتي فطومة
دخلت كتلة شيخ حسن شنو شاغل بالة
اشو اشوفة صافن وماحس بدخولي
كال ههههه دومج تقرين افكاري
هاي عود كلت مااباوع بعيونج حتة لاتفضحيني
بابا حبيبي شلون ماقرة افكارك واني العندي
من فيض ماعدنك
كال بل وجدتكِ ارض خصبة ذات زرع فغرست فيكِ بذرة فانبتت بساتين تسر الناظرين
كتلة يابة مااريد اشوفك مهموم
ولاضايج بداعت عيوني احجيلي ليش
هذا الحزن بعيونك
كال بابا اني ماحب الف وادور تعرفين طبعي
انتي كبرتي وصرتي بنت يافعة
الله انعم عليج بنعمة العقل والجمال
مو كل بنت تحمل صفاتك ومؤهلاتك
اني صح تعبت عليج بس كنت كلما اشوفج
تكبرين تعتبر راحتي وسعادتي
لذلك كنت اكثر من النظر الج
بنتي زبدة المخاض اتقدم الج رجل ذا مكانة
وشأن باوساطنة الثقافية
واني اعرفة معرفة عمل ماعندي وياه اختلاط
شخصي
وهذا الامر مخليني افكر وافكر
قاطعت كلامه يابة ليش تفكر وتعب فكرك
ارفض وكان الله يحب المحسنين
كال من جائكم ترضون دينه وخلقه فزوجوه
واني راضي بدينه وخلقه
بس مجرد بعض الامور اتحرى عنهة وخلص
بقت انتي ترسيني على بر
فأما ان كان من المقربين فروح وريحان
وجنة نعيم واما ان كان من اصحاب
اليمين فسلام لك من اصحاب اليمين
هاا شكلتي اسال لا
يابة انت هسة فاجئتني بل صدمتني
ليش باباتي قابل كايلج خبر موزين
لا يابة بس اني مامفكرة ولا اريد افكر
بنتي انتي فاهمة ودارسة تعرفين مهما بلغتي
لازم يجي يوم وتزوجين
وتكملين نصف دينج وبعدين تعرفين
فضل المتزوج عند الله محاجة اخوض
بهذا الحديث وبعدين يابنتي اني اتمنى
اشوفج انتي واختج مستقرات ومرتاحات
مو حتة ارتاح ولا تفكير بنفسي بس
اني اخاف اذا الله اخذ امانتة منو الكم
حتلو عدكم خوال وعمام مراح تكدون
تعيشون الحياة الكريمة مثل معشتوهة
بيت ابوكم
لايابة فدوة العينك لادكول هذا الكلام
تدري صدري يضيق بس مجرد تنطق
هذا الكلام  ربي يطول بعمرك
بنتي فكري ورجعيلي جواب استاذ امجد عمره
٢٦ سنة باحث ومحقق اسلامي
طبعاً من الشخصيات الجدية بالعمل
صح هو طبعه شوية بارد بس انسان
محترم ومثقف عايش مع امه واخته
عرفت هي مو صغيرة بالعمر
اني مااريد اظلم الولد او اخته
صح عندي تخوف من اخته بس مشاغل
بالي لان اعرف بنتي كدهة
بعد اعطيتج المعلومات العندي
اذا اجتني بعد معلومات اوصلهة الج
اخذي راحتج باباتي اذا عندج شي
تعالي شوكت متحبين ابوج موجود
الله يحفظك يابة اترخص منك
طلعت من ابوية واني مااعرف شنو البية
احس عقلي مثل قالب الثلج مجمد
لا اكدر افكر ولا اكدر ماافكر
طبعاً اني كاي بنت عندي مشاعر بس مكنت مطيتهة
مجال بلظهور حكم دراستي ومعرفتي
بعواقبهة بس مع ذلك كنت اتمنى ارتبط
برجل يشبه والدي
رجل بمعنى الكلمة
حتة كنت افكر اذا ازوجت وطلع طبعه يختلف
عن طبع والدي شلون راح اتعامل وياه
اكيد راح افشل
كل الشغل بالي هو اني اكدر ارتبط برجل
واكدر استمر وياه
زين شلون اذا ماصار انسجام
شاسوي اكيد انفصل وارجع الاهلي
شلوون !!! شلون انفصل اني بنت
الشيخ حسن شلون هيج افكر
بقيت على هذا الحال اسبوع
خلال هذا الاسبوع ذبلت وتغيرت
معاني وجهي جنت مثل الوردة المفتحة
صرت ذابلة شاحبة ومااتكلم
بس صافنة حتى والدي اجنب اكعد يمة
جنت بس اشاقة واضحك وياه هسة
صرت خجلانة منة
انقهرت كلت لو هسة امي موجوة مو جان هسة
شايلة نص حملي وفكري
جان رشدتني على البيه صالح
صح والدي علاقتي بيه قوية بس بهيج
مواضيع تختلف اني اخجل وهو يخجل
اصلاً ممطرقين الهيج امور
بينما اني صافنة ماحسيت الة ايد حنينة دافية
جرت ايدي وعصرتهة حيل
باوعت شفت ذاك الوجه النوراني
والثقر الباسم كم كان جميل
رغم اثار الزمن والحية البيضاء من قهر الدهر
لكن كان اجمل وجه بعالمي
كال هاا باباتي يانور بصري
ليش هلتفكير وليش هلذبول ادري نريد
نزوجج لو نوديج اعدام
اني ضحكت
كال اي فطومتي والله اشتاقيت الهاي الضحكة
ولج صار اسبوع كولي خطية بابا
خل اشوفة يريد ضحكة جاي كهوة
كتلة ياا بابا سودة علية
ولحكايتي تتمة