فيك وجدتُ ذاتي

البارت الخامس

كتلة لا استاذ امجد لازم تنطيني مجال
حتة اتعرف عليك هذي تعتبر او جلسة
واول لقاء لازم اعرفك وتعرفني قبل
لايكون اتصال مشاعر
هو مثل الخجل من كلامي
كال اذا هيج معج حق وبعد استاذ شيليهة
اني اسمي امجد وبس
كتلة ان شاء الله
كال اتصل بيج بليل بوقت متأخر لان عندي
شغل بداية اليل
كتلة مو بابا ينام ميظل متاخر
كال وهو المطلوب شعدنة وياه
كتلة شلون تتصل والجهاز عد بابا
كال اهاا يعني ماعندج موبايل
كتلة لا  مااحب اضيع وقتي بامور مابيهة فائدة
كال حلوو يعني حبيبي كشي ميعرف
اني دنكت بداخلي كلت هاي شجابهة على هاي
بس ايضاً ماعلقت
بنهاية الجلسة الكانت ثقيلة على قلبي دك الباب
والدي وانهاهة بصوته من كال هاا اولادي
ترة هواي اطيتكم وقت
اني كمت بالعجل واني لافة نفسي بالحرم بس
شعري مكشوف
كتلة اترخص امجد مع السلامة
كال مع السلامة
بعدين كال عمي تسمحلي اجيب موبايل
الفطومة حتة نتعارف لان انت كلت
متحب طبة وطلعة
كال  والدي اي ابني جيب اني اريدكم تتعارفون
وتقتربون من بعضكم
رجعت يم النساء
الكل باركلي عمتي ام امجد وخالاتي بس
اختة وهي بمكانهة كالت مبروك بأنفه
وكالت شدعوة بطيتوا شكو هو عقد
اني بصراحة ضجت ونحرجت بس
مكدرت احجي لان لا المكان والا الزمان مناسب
بعد الحفلة خالاتي ابدن انزعاجهن وخوفهن من
اخت امجد ولامن والدي شلون انطاني
وشلون راح اعاشرهة
اني صح جنت خايفة بس خوفي اكثر
من امجد
جنت افكر اكدر انسجم وياه
اكدر احبه ويحبني
هذا كل الشاغل فكري ...
مرت الايام سريعة جداً وتحدد موعد الزواج
واجو اهل امجد وحددوا موعد تجهيز
الملابس والذهب
وماقبلت اختة ادز على خالاتي
بحجة هنة موجودات وماحاجة
مااجة بالي غايتهة تمررني واطلع الجهاز من عيني
وفعلاً نجحت
جنت كلما يعجبني شي ادكول اوووع شنو هذا
الذوق
او اووف كلشي متعرفين
انقهر بس اظل ساكتة
بعدين كمت مااختار هي تختار
وكل الجابتهن مو مال عمري
مال مرة كبيرة
ماحبيتهن بس محجيت
كملنة ورجعنة
بليل خابرني امجد كال عفية
كالت نجوى جبتي كلشي على ذوقج
اني تفاجئت شنو هلصلافة ياذوق
اشو حتة كلاص العصير على ذوقهة
ردت احجي جان يقاطعني
كال جبتي ثياب نوم
اني تعجبت هذا شجاي يحجي
اشو بسرعة طفر لثياب النوم
لا سال شناقصني لا سال على الذهب
طفر عالثياب النوم
كتلة اي شي قليل
كال لا ليش قليل يمعودة هنة اهم شي
اني بسرعة غيرت موضوع
طبعاً نسيت احجيلكم كل مخابراتنة
كلامة ميعجبني
مو يريد كلام رومانسي لا كلام مدح الة و
اظهرلة رغبتي بيه
هذا مكان وارد عندي ومستحيل يبدر
مني هيج شي
فكان مرات يلمح انه اني باردة المشاعر
بس مكنت اشوف نفسي باردة كنت
اشوفه متسرع جداً مينطي للامور
الانسابية ويخليهة تجري على طبيعتهة
كنت اضايق من كلامه بس اعبر او اغير موضوع
خلصت الخطوبة وبدت تجهيزات الزواج
وصارت هوسة الاقرباء مجموعين
بنات الخالات والعمات اني افرح بجمعتهم
وكنة كل عيد والدي ياخذنة ننجمع بيت واحد من اجدادي او ياخذنة بمناسباتهم كلش افرح
اني وحوراء
حوراء اخ ياحوراء
غصة بصدري كلما اذكر دموعهة واني اجمع بغراضي
جنة كل شوية نتحاضن ونبجي
عبالك خلاص بعد منشوف بعض
ماكو مثل الاخت تحس بية وتحبني وتتمنالي
الخير ربي يحفظهة الي حبيبتي
بالحنة كالعادة صالون وبدلة ومكياج بس
كلشي مثل مااني احب
وبالعرس كذلك طلعت حلوة كلش وبشهادة
كلمن شافني حتة والدي من شافني
تفاجئ وضحك كال حورية فطومة مو بشر
من اجت الزفة وجهي كام ينطي الوان
وكلبي سرعت دكاتة تمنيت يتوقف الوقت
او يصير شي ويرجعون
مااريد اترك ابوية وحوراء
بس بعد ميفيد حسيت بيه بصفي
ونوب لزم ايدي ويضحك كال شنو
يمعودة كلبي ميتحمل
وهمس قريب علي اليوم الموعود وغمز
اني شوية بيني وبين ان ابطل
بس اصبر بروحي
من المواقف المخلدة بذاكرتي الي من المستحيل
انساهة لحظة من سلمني والدي لامجد
وكلة مهما حبيتهة ميوصل حبك معشار من حبي
الهة صونهة وحافظ عليهة
ثق متلكة مثل فطومتي
نوب قرب  باس راسي
اني نهاريت متحملت نزلت على ايدة بستهة
وكمت اشهك اختنكت كتلة راضي يابة
كال راضي عنج دنيا واخرة هو المثلج
يطلع منة شي سيئ
كلهة بجت وية بجينة الة نجوى
كالت كافي يمعودين شنو القصة
هي هياتهة عبرت شارعين
طلعت من بيت اهلي واني مكسور گلبي
على ابوية حبيبي شصار بيه
تمنيت ارجع الحضنة وارجع زغيرة مااكبر
ماحسيت الة احنة باب بيت كبير
بس قديم نزلنة وصعدوني كبل الغرفتي
صعدت وهو ظل جوة يسلم على اقربائه
وبعدين صعد اني نشف الدم بجسمي
من سمعت صوتة ونوب قفل الباب
حسيت خلاص بعد ماكو رجعة
اقترب مني كال هاا فطومة لو اسميج فطومتي
كتلة لا بس بابا يسميني فطومتي
نوب نتبهت ياالله بسلا يزعل
كال هاا بكيفج
اداركت الموقف كتلة مو هو يحب هذا الاسم
يظل خاص بيني وبينة
ولايهمك سميني اليعجبك
سوة نفسه مضايج كال خليني على فطومة احسن
مضت اليلة عادية وهو كان طاير من الفرح
وباين عليه هذا الشي و واضح بس اني عادية
مادري لان مااعرف شي عندي عادي
مضت ايام

ولحكايتي تتمة