دخلتا ، انا عارفه عيادتا لان اول مرة جيتا للشغل كانت في عيادتا و معاي امنيه ، طبعاً دكتورة مني صيتا سابق يعني ، عشان تحجز عندها لازم قبلها بأيام و يا لقيت يا مالقيت ،، وانا داخلة شايفه راجل بتكلم تلفون ، بيقوليهل ، انتي حجزتي لمؤيد بالتلفون يعني ،، سكت مسافه اظن بيسمع في ردها ، قام قاليها خلاص لمن كشفو يجي انا بكون خلصت مشواري ،، دخلتا نص الناس طبعاّ أُسر محترمة شديد وكلها علي مستوى يعني زي م بقولو طدقه برجوازية ،، طبعا عيادتا داخل المستشفي زي نظام شقه الناس مرصوصين في المقاعد ... حولت ملامح وشي و دخلت فتشت لي مكان فاضي قصاد السكرتيرة ، عاينت لي كدااا باستغراب ، قالت لي انتي حاجزة ؟ طبعا كلهم معاهم اطفال الا انا لانها دكتورة اطفال ، قلت ليها ايوة حاجزة واتعمدت الدموع تصل طرف عيني ، زي م عارفين مجتمعنا بس عينو مع الزول و اضنينهم ديل معاك ودي نقطه لصالحي ،، قالت لي :
_ بأسم منو ؟
* (ختيت الطرحه ف عيوني ) بأسم مؤيد ، و فكيت البكية بحرقه ..
مرة جمبي قالت لي استهدي بالله في شنو
قلت ليها اقوليكي شنو ولا اخلي شنو يا خاله و قمتا طلعت براا ، و رجعت قعدت ف مكان بعيد عن السكرتيرة ،، طبعا ناس الشمارات جو علي و انا بنفنف نظام لسه ببكي ،،
جاتني الخاله قالت لي ي بتي حاصل شنو ؟ و وينو ولدك مؤيد ؟
بس زدتا في البكاااا واشيل واعصر علي وشي بالطرحة ، قالت لي مالوووو !
بعد اتاكدت ان الناس مركزة معاي ،، قلت ليها والله يا خاله ولدي جبتا هنا نصيح ماشي برجلينو ، بس بيشتكي من بطنو ، وبقيت بشهق و ببكي و يا حرقه قلبي عليك يا مؤيد ، قالت لي حصل شنو ؟
وطيت صوتي وقلت ليهم الدكتورة صرفت علاجات غلط مرتين ورا بعض اسي ولدي مرقد بين الحياة والموت حارقني حارق قلبي حشاشه جوفي الله يسامحا الدكتورة ، واسي جيتا متوسمة فيها الخير تديني علاج بس برضو خايفه منها ، انا حذروني منها كتير لكن م سمعت الكلام وبرضو جبت ليها ولدي انا ضيعتو بيدي حسبي الله ونعم الوكيل ،،
انسحبتا براحه وخليت الناس ديل مذهولين و كل اتنين ماسكين اضان بعض و يتوشوشو والخوف ظهر عليهم ،وحدة تقول الله يستر علي ولدي خالد دا اسي بشكي من اضانو من استعمل العلاجات ، وديك تقول انا ولدي بشتكي م عارف من شنو ....
طلعت و وقفت بعيد ،، لمن لقيت كل وحدة جارة ولدا في يدها بي رجالهم طالعين ،، دقايق مافي العياده دي بقت #فااااااااضيه ،،
،، جري وقفت اقرب امجاد و مشيت البيت
من بعد الحصل امس حاسه بيتنا مكتئب شديد ، دخلتا البيت سلمت علي اخواتي و بقيت قاعده افكر وافكر حتي هدومي ما غيرتها .. جاتن ي هدى قالت لي ّ
* هديل ارح نطلع نتعشا برا نغير جو علي هنده شويه
*انا م عندي مشكلهّ
_ولا نخليهو بكرة ؟
*بكرة عندي مشاوير كتيرة
_طيب خلاص نمش الليله
*البريحكم ..
_ مالك انتي حالك م عاجبني
*هدى .....
_طيب سكتا ، بس الحصل امس دا حصل وانتهى و هند بتقدر تتجاوز
*طيب ممكن تقفلي الموضوع دا ولا كيف
_طيب يا هديل .. #طلعت
راسي موشوش احساس عندي حاجات كتيرة و ما قادرة ارتبا وانا عارفه انتو ما فاهمين انا مالي والقلب حالي كداا شنو ، لكن كل شي في وقته ..
اتصلت علي امنيه ..
_هديل
*ايوة امنيه
_هندة كيف
*كويسه
_فاضيه اجيكي ؟
*لا
_والله بقيتي عجيبه يا هديل لو ما العشرة البينا و صداقتنا ولو انا ما بعرفك كويس انتي شنو انا بالجد كان قطعتو معاكي ..
*امممممم وتاني شنو ؟
_امرك غريب والله ، سلام
*سلام ..
يتبع ....
