لقيت هدى دي بس تبكي ، و امي دي والله صامدة ومتماسكة لدرجة انا خايفه عليها الكتم دا مرض والله مرض ، الانسان مهما وصل بيهو الغضب مرحله ، مفروض يتنفس ان شاءالله يكورك ..
قلت لهدى ، تعالي معاي ، خشينا اوضه امي شلنا حاجاتا ( انا عارفه حتقولو لو مكانا م كان عملتو كدا ، بس بالجد حياتنا معقدة و انا م حخلي حق ) ..
و دخلنا غرفتنا وسعنا و لصقنا سرايرنا مع بعض تلاته سراير لصقناهم و فرشناهم بالمخدات والاغطية ، م محتاجين اربعه ، تلاته بيكفونا ، لدرجة البخور دا بخرتا غرفتنا وفضيت ضلفه لامي ختيت ليها حاجاتا كلهاا ، دخلنا الاوضه انحنا الاربعه و هدى جابت صينية الاكل و قفلنا الباب علينا ،، قلت لامي انحنا انتي البتهمينا في الدنيا دي ،
وكوت ننوم وانتي في نصنا دا امان لي انا واخواتي كأننا محصنين من كل شر ، انحنا لو في جحر يا امي طول م انتي بخير وانحنا مع بعض حنكون مبسوطين ، واوعدك يا امي ان دا وضع مؤقت ، وكل شي حيتغير بس انتي اتزكري انو ما لينا غيرك في الدنيا دي محتاجنك انا واخواتي ورانا وقدامنا ، انتي المصبرنا والله ، قعدت تبكي و هند تكسح ليها عيونا ، قالت ليها يمة لالا عليكي الله ما توجعي قلبي انا راحتي في مصلايتي و لمن اخت راسي في رجولك ، م تبكي عليكي الله ،، قالت لينا انا بلوم نفسي ان م عندكم اب زي باقي الابهات ، قلت ليها ابوي راجل جواهو نضيف بس افكارو عامية عيونو و متاكدة حيجي يوم و يفوق ،، المهم انا م دايرة المرة دي تتشيطن ، انا بعد كم يوم حنزل شغل جديد امي دي م تفارقوها واي حاجه اوع تسمتو ليها ولا تخدموها ..
عايزة تتحشي تسوي براهاا ، قالو تمام ..
عدينا ليلتنا ونسة وبنحاول نفرفش علي امي قدرتنا و راقدين كلنا جمب بعض ، لمن نمنا
،،
المهم عدو تلاته يوم ، والوضع عادي جدا في حالنا و هي في حالهاا ،، جا يوم السبت ، اللي هو اول يوم لي في الشغل ، صحيت بدري جهزت اموري ،، فطرتا مع امي واخواتي جيت اطلع ، قالت لي ماشه وين ؟ عاينت ليها ومشيت .. جرتني من بلوزتي لمن قربت تتمزع ، و ابوي كان مافي ، وهو زاتو اول يرم ينزل الشغل من رجع ..
قلت ليها زحي يدك ، طبعا هي ماشاء الله تطبقنا انا وامي واخواتي ومعانا بتين من الجيران ، حتي نحصلا حاجه ضخمة كدا ماشاءالله ،، قالت لي طيب لمن اسالك تردي ، قلت ليها بصفتك منو ؟ قالت لي م تخافي ما حقوليك امك لانو ما بيشرفني اكون مكانا ، وحاتكم انا م عملت شي ، هنده الجاتا بالمكشاشة وقعت فيها خبط و رزع ، و المكشاشة حارة ، انا بقيت بحاول ازح هند من المرة حمطتا في وشها وجسما م خلت ليها حته سليمة ، بعد تعب لمن فكيت هند زي الدخلت في حالة كداا ، بعد العملتو هند انحنا م عندنا دور ..
و طبعا الخاله م فتحت خشما بس بتتوعد ليها قالت ليها حتشوفي ايام اسود من الليل يا بت عثمان ان ما خليتكم تحومو في الشوارع ما ابقا اسمي فاطمة .. امي قالت لهند قولي لا اله الا الله واستغفري ، قالت ليها لا اله الا الله ، سيدنا محمد رسول الله و بقت تستغفر ، قالت ليها امس كلمناكي امي لا ، امي خط احمر ، حتغلطي بنص كلمة علي امي حتندمي والمرة دي بمكشاشة لانها جمبي لكن المرة الجاية فتح راس و انا م بخاف الا من رب العالمين ، دموعي نزلو قلت ليهم بالحاله دي انا لا حقدر اشتغل لا حقدر اسوي حاجه طول الوقت بالي حيفضل مشغول عليكم ، ياخ انا اسوي شنو يا الله ،، هدي قالت لي امشي و م تشيلي هم، امي قالت لي امشي اطمني ، صلت ليهم عليكن الله م تعملو مشاكل اوعدوني بس ،، قالو لي وعد ..
صلحت بلوزتي و طلعتا ، بعد طلعت ، رجعت البيت تاني ، لاني م صليت و محتاجه اقرب من ربنا اكتر لانو رغم تقصيري تجاهو ربنا ميسر لي امري ، و كون اهلي بخير دي براها نعمة ، خلصتا و طلعتا تاني كالعاده ركبت المواصلات ، طالعه وانا جواي كدا في شي زي الخانقني .. بس الركعتين الصليتهم ريحوني شديد حمدلله ..
المهم وانا في العربيه قبل انزل ، طبعا شارع الشركة دا شارع راقي كله اماكن راقيه ، المهم لمحت عيادة الدكتورة منى ، و لتزكرت ان وجدان السكرتيرة قالت لي انها فتحت عيادة جديده واسي بالصدفه لمحتهار، كدا عديله تب يا دكتورة ....
يتبع ......
