قلت ليها دا شنو ؟
قالت لي شوفة عينك ، قلت ليها هوي هاا اوعي الني ، اسمها مرتو تغسل دلاقيناها دي براها ، قالت لي هديل وطي صوتك ، قلت ليها لا ما بوطيهو انا بتكلم عشان تسمع ، و ديني وايماني يا هدى تكرريها حأنفجر فيكي اناي وريتك ، الفينا مكفينا ما خددايم زول احنا ، اسمها مرة تبقي قدر نفسها وتخدم نفسها وراجلاا ،، قالت لي هديل براحه ابوي عليكي الله ما ناقصين مشاكل لازم نتحمل عشان خاطر امي نتحمل اي شي معليش ، هي بتظهر انها كويسة و مافارق معاها ، لكن والله من جواها بتتقطع ، زي م صبرت السنين دي كلها عشانا انحنا نقويها و نصبر .. قلت ليها شوفي يا هدي ، وجود المرة دي هنا ، دي كومة مشاكل والريح البتسبق الاعصار ، من اولها افرضي شخصيتك م تخليها تستضعفنا وانتي عارفه مرة الراجل يعني شنو .. كلمتك انا ..
اها لسه ما تميت كلامي معاها سمعت صوت ابوي بتكلم ، طوالي جينا وقفنا ،،
ابوي قال لامي ، شيلي حاجاتك من الاوضه فضيها عشان فاطمة حتقعد فيها ، امي عاينت ليهو ولا ردت ، هند اللي ردت ، قالت ليهو كيف يعني تشيل حاجاتا من اوضتا ؟ قاليها ما تدخلي انتي ، قالت ليهو معليش يعني بس حتدخل دي امي ، وكفاية كريت ليها البقرة دي وقعدتها في نصنا وزول فينا فتح خشمو مافي ، كمان جاي لاوضتا ، بيتنا براهو بالجلاله شايلنا ،، قاليها هند اسكتي عشان ما تشوفي شي ما يعجبك ، يالت ليهو الشي ابما بعجبني لي 31 سنة شايفاهو ، الليله تفتكر حيفرق معاي ؟
قلت ليها هندويه اسكتي يا ماما ( انا بس خفت يمد يدو عليها هي نفسيتا م تمام و اول مرة تتكلم من وقت اللي حصل ) ،،
قالت ليهو ، سجمي سجمي يا عثمان بنات طلعن م متربيات ، قلت ليها قطع لسانك ، صحيح انحنا م ربانا راجل لكن ربتنا مرة بألف راجل ، عايزة تقعدي في البيت دا تلزمي حدك ، و جمب امي ما تقربي ،، بس ابوي جا علي ،والله رمشة ما رمشتها اصلا محتاجه حاجه تخليني ابكي ، اداني كف ، قلت ليهو وبالجهه دي كمان يا اب يا فاضل يا محترم يا الما مقصر في بيتك يا القدوة الحسنة يا سندنا يا المفروض من تجي تطمن عن حالنا ، ماكلين ولالا ، نايمين ولالا شاربين ولالا ، عيانين ولالت ، جيت لقيت هند في وضعها دا ولا سالت فيها شنو ، عارف امي عيانه و ما ناقصه ضغط و قرف و جيتا بي ضرة و مرضه ، بالجد قدوة حسنة ، قدوة حسنة لدرجة اني لمن اتسأل عنك ما بعرف ارد اقول شنوو ، قدوة حسنة لدرجة لو قدرت اقطع اسمك من اسمي في شهادة ميلادي ، بالجد انت قدوة ، لكن الحمدلله علي نعمة الام الربنا رزقنا بيهاا ما حسستنا بفراغ الاب ، طول عمرك كنت بالنسبه لينا عقبة في حياتنا لو غبت مية سنة ما حنفقدك ، ما عايزنا فوت خلينا بس ما تزيداا علينا م تجيب لينا مشاكل وحرق اعصاب انحنا في غنى عنها يا ابوي يا فاضل ، انت عارف يوم جا واحد يطلب بتك هند للزواج ، اول حاجه عايرونا بيها انت يا ابوي ، البت دايرة ليها #ولي
و في مثل بيقول الماعندو كبير يشتري ليهو كبير ، وانحنا عندنا زي الماعندنا لاقادرين نعتبرو موجود لا عندنا نشتري .. اضرب اضرب الالم جوة القلب يا ابوي عمرو م كان في الجسد ..
باك فلاش من سنوااااااات فاتت
قصة امي و ابوي من سنوات و سبب تصرف ابوي ..
ابوي كان بيشتغل في مخزن بتاع اسمنت و ابوهو زاتو بيشتغل قبل ابوي اللي هو عثمان ، والمخزن دا اصلاً بتاع جدي ابو امي ،، يلا ابوي دا كان بيحب وحدة من بنات الحله ، بيحبها شديد ، و ما بعرف اذا العلاقه متبادله بيناتم ولالا ، اها في يوم كان في عمال او حاجه بالشكل دا ،كانت عندهم شحنة بشيلوها من مخزن جدي داا ، فاا جدي أمن المخزن لابوي ، و م كان في زول حارسو غيرو ، لحد وقت متاخر من الليل ، شالتو نومة و العمال بشيلو الاسمنت ، صحا الصباح بصوت جدي كوراك و مشاكل والناس متلمية المخزن فاضي كو كرو ، يعني كل شي ضاع والناس لامتو ، المهم ابوهو الزمو انو يتزوج وحدة من بنات جدي وهو رفض م عارفه الهدف شنو ، بس كانو مديونين لجدي بمبالغ ضخمة ، لفت الايام ،وحبيبة ابوي دي عرسوها و العرسا منو ؟ خالي اخو امي الصغير ، بس ابوي سمع انو عرسوها لكن منو العرسا م بيعرف ، بعدها بشهور ردخ للامر الواقع وقبل انه بتزوج وحدة من بنات جدي و الكانت في نصيبه امي ، و طبعا البت ما كانو بشورها ، المهم تم الزواج و بهد الزراج اتضح ان امي اكبر من ابوي بسنوات ،و بعدها عرف ان خالي اللي اتزوج حبيبتو ، ومن هنا بدات الكراهيه و كان مرغم و عاش مرغم علي امي طوب السنوات دي ، لمن جدي الله يرحمه اشتري البيت وسجلو باسم ابوي وجو رحلو في الخرطوم وبعدها جينا انحنا اتولدنا في وسط كراهيه من ابوي وعدم تقبل لينا و كأنه امي الملامة علي اللي حصل ....
نرجع للاحداث ..
ابوي ما فتح خشمو معاي و كان صاري
لدرجة غريبة ، انا الدموعي نزلت لاني طلعت كلام كان مكبوت جوانا ليهو سنين انحنا عايشين تحت سقف معاناة م يعلم بيها الا الله
..
قبل يمشي قال لأمي ، سمعتي القلتو صح ؟ّ
فضي لينا الاوضه
( هه و كأنك يا زيد ما غزيت
يتبع....
