#الشوق الجارف_والكبرياء
همس ليل
البارت العاشر
بدة الدوام وبقى فيصل الصبح يوصلنا....والتهيت بالقراية وجان الجمعة متنفس فيصل لان ياخذني نطلع نتغدة برة ونفتر شوي ونختمها حبيات بغرفته ....وطبعا ماخلصت من لسان امه كلما تستفرد بية ذب حجاية ...ريم طلعت حامل...ومن شفت اهلي فرحوا بيها وعلي زاد اهتمامه..زادت عندي الغيرة وكمت اخلق مشاكل وياها من جوة الكاع... لحد يوم جنت اتصايح وياها ودخل علي تفاجات بيه...ماحجى شي بس دخل لغرفته وصاح ريم..واني ظليت الوب احسها تشكيله مني ...علي طلع وصاحني اصب له غدة ...رحت واني نافخة ريشي كدامها ...لان ماحجى علي كدامها وماقبل هي تصبله....هي عافتني وراحت...من خلص كام باس راسي وكال انتي اختي وبنيتي وماكو احد ياخذ مكانج بكلبي ...بس لخاطري لا تعبوني بالمشاكل مال البيت هي كم يوم اجي ارتاح...
بقى علي بس مو طببعي طول مدة اجازته جان اكو مشكلة بينه وبين ريم...لنهاية الاجازة كبت هوسة بينهم ...مانعرف السبب بس من راد يلتحق طلع كال لحسن وصل ريم لاهلها ...امي كامت تحجي شنو المشكلة ماقبل يكول ..التحق وهو ضايج...وبقيت طول فترة التحاقه اكل بنفسي...وبقت شهر زعلانة نزل مرتين بيها مايقبل يروح يجيبها ..بس اخوي شفته حيل متأذي على فراك ريم...من التحق فيصل كال تعاي تغدي يمنا جان يوم جمعة...وكت الغدة
ام فيصل ...عاد حنان تعرفين تطبخين لو هم ماتعلمتي
حنان...لا اعرف اطبخ عمة
ام فيصل...شعجب بهاي ماقلدتي اخوتج...اني سكتت تعودت هذا البسامير خاصة من فيصل ماموجود ...وماعرف ليش اسكت ..جنت اكول يجوز من باب الشقة او حاسبتني منهم وبيهم...صاحني فيصل...امه كالت...روحي عمة
اخر وكت صرنا..
صعدت لفيصل...اكعدي يمي...شبيج احسج مو على بعضج
حنان...علي تعبان فيصل...
فيصل...ليش
حنان...دنكت لان جنت احس بالذنب تجاه اخوي ...واستحيت احجي لفيصل...بس بعدين حجيت...هو ظل ساكت..رفعت عيني له..
فيصل..حبيبة صح انتي متعلقة بيه ..بس هو صار عنده حياة خاصة بيه مثل ماراح يصير عندج...بس تبقين انتي اخته ولج مكانه...انتي من تزوجين راح مايقل حبج له..لا طبعا بس راح تلتهين وية هالحياة الجديدة...وظل يحجي وياي...من رجعت للبيت ظليت افكر بحجي فيصل
ثاني يوم رحنا اني وامي وجبنا ريم من اهلها...ومن اجى علي ..وشافها جانت الفرحة بعينه ماتنوصف...بعدها صح ماتحسنت علاقتي بيها بس بديت اتجنبها...
خلصنا سادس ...وقبل النتائج كال فيصل لازم نزوج بعد ماعندي صبر ...وجهزنا الغرفة ...ومن اجو نصبوها رحت اشوفها ..جنت افتح الكناتير
فيصل...شدورين بنص الكنتور
حنان...اريد اشوف ياهو اكبر خانة ...حتى يكون لي
هو سحبني كال اخذي الي يعجبج وهسة خلي نشوف الجرباية تتحمل لو تنكسر...وشمرنا على الجرباية اني راسا انسليت من بين ايديه هو رجع جرني ويبوس بيا واني اضحك...من نزلنا...طلع فيصل واني داحجي وية زينب ...
ام فيصل...شبقيتو للعرس لعد ...صوتكم لوين واصل ..اني تفاجات ونحرجت وحلفت ماجي بعد لحد العرس ...شكد راد فيصل كتله مابقى شي للعرس...وصارت الحنة ...جانت كلش حلوو واحلى مابيها جان دخلته علي بعد ماخلص حنته واجي يحنيني...بس كعد عاقل...
ثاني اليوم الزفة كانت للفندق مباشرة وطلعت فد شي من وكفت كدام المراية معرفت نفسي...واجى فيصل ياخذني للمصور ..ومن شافني جانت فرحة بعينه جبيرة ...وصلونا للفندق ...وكف مقابيلي فيصل ..
فيصل...حنو صار شكد انتظر هاي اللحظة سنتين ممصدك صرت يمي ...
حنان...جنت ميتة من الخجل والخوف ...بس طول العرس مانزلت عيني من على فيصل ..طالع يجنن حبيبي ..
اخذني لحظنه وهو يردد احلى كلمات الحب والغزل...رجعنا ثاني يوم لبيت اهله ..جانن اخواته موجودات ..اني ماتعرفت عليهن هواي لان قليل يجن مزوجات بغير محافظة...بقن يوم وراحن...للسبعة امور جانت عادية بالبيت ...زينب جانت ماتخليني اسوي شي...بعد السبعة طلع
فيصل للدوام وبدت رحمة الله...ندك باب الغرفة جنت نايمة لان قبل يوم جانت السبعة وتعبانة .فتحت ..زينب ..امي تريدج
نزلت...تلكتني ام فيصل...يلا عيني السبعة وخلصت ...مو بنت وزير انتي ساعدي زينب...ماحجيت قسمت الشغل بينا وذبت اغلبه علي...
وشما اسوي جانت ماتقبل بالبداية جانت تقلد على شغلي جنت اسكت بعدين كمت اجاوبها لان اصلا اني ماعرف اسكت...زادت المشاكل ...بعد ماطلعت لي كلية علوم ولزينب تربية ...جنة نطلع سوة بس من نرجع لازم اني الي اصب غدة وبس يطلع فيصل استلم شغل ...ولليل يلا اكدر ابدي اقرا يجي دور فيصل يريد اتفرغ له ....تعبت صار ضغط علي زادت حديتي وياه امه لان ماترحم بية...مرة رجعت وجنت تعبانة من السهر وعندي امتحان صعدت بدلت وتمددت اخذتني النومة...كعدت على صوتها
ام فيصل...مسعدة كلشي ماشايفين منها اكل ونوم ونخدم ...زينب دسكت بيها ماكو...من منو خايفة انتي سكتين ..قابل بنت وزير ماخذين...حاله حالج تنزل تنظف وتشتغل...طكت روحي نزلت
حنان...عمة شكو هالصياح ...اخذتني نومة
ام فيصل...اي مو فاتحية تكية لحضرتج ...نجهز الغدة وفوكها نصيحج ومايعجبج جاوبين
حنان...كتلج جنت نايمة...مو بلازم غداج...لا تحسبين حسابي بعد اني اسوي لنفسي
ام فيصل...مامسوية لج ...اسوي لابني سودة علي ...ذاك الطول الحلو والجمال ماخذله وحدة تكول رجال مو مرة
حنان...لازم مكلبتني وتدرين بية رجال
ام فيصل ...انجبي ادبسيز ماتستحين
حنان...مو اني الماستحي ...وعفتها ومشيت...
ام فيصل ...لعد من قصدج...ونصبتها مناحة ...لج كومي خابري اخوج خلي يجي يشوف مرته..جانت هاي اول مشكلة توصل لفيصل بوقتها صعد للغرفة
فيصل....حنان تعاي يمي ...شوفي احجي وياج وخلي ترجية بذنج...ابوي مات واحنة صغار وامي ربتنا بتعب وانكسر ظهرها علينا...امي خط احمر...مااريدج تغثيها يوم من الايام...اعتبريها امج ...مرة جبيرة ولا تتلاسنين وياها...مشاكل النسوان خلني بعيد عنها ...سمعتيني...سكتت ماحجيت صاح...سمعتيني شكلت ...هزيت راسي
طبعا زادت الحرب بينا وصارت بوجهي اذب الحجي واني ماسكت بس الحرب تنتهي من يجي فيصل ....صار حنة حسن بوقتها لبست فستان قصير ودلع يم بيت العروس ومن رجعنا لبيتنا غيرت ملابسي
من رجعنا وقريب ماتربد تخلص الحفلة ...ردت ابات مقبل كال هالجمال جنتي طالعة بيه وتريدين ابقى وحدي ...كتله خلي تخلص لعد...من دنظف دك علي كال هسة تجين رحت وصعدت راسا للغرفة
حنان...فيصل خوما اكو شي
فيصل...شجنتي لابسة يم بيت العروسة
حنان...ليش فيصل هي حفلة بنات وشلبس مو مشكلة...صاح بية
فيصل...لا مشكلة من اكو تصوير ..من طبين وطلعين مشكلة ...من تركصين ويصورج مشكلة
حنان...فيصل ليش دصيح ...لاطبيت ولا طلعت وتعرف ماعرف اركص اصلا...ليش هالعصبية
فيصل ...طلع موبايله ...لعد هذا شنو ...باوعت صورة لي ...
حنان...هاي زينب اخذتها لي حتى اشوفك اياها ...وماحب تتهمني واذا امك شحتتك علي مو مشكلتي...جنت واكفة مقابيله رفع ايده راد يضربني شافني فتحت عيني متفاجاة ونزويت مو جانت خوف مني بس رد فعل نزلها وطلع وطبك باب بقوة...
بيومها ...نام جوة بالصالة وثاني يوم بالزفة كدام الناس يحجي وياي عادي بس بينا ماكو اي حجاية ...من رجعنا هم نزل نام بالصالة ..المشكلة اني ماعرف اتحايل وارضيه ...بقى اسبوع مايحجي وياي وعمتي مرتاحة لا والنوب زادت ضغط علي يمكن جانت تريدني اطك...اني قل اكلي وحسيت البيت كله ضدي ...بعد اسبوع اثناء ماانظف دخت وحسيت الدنيا تفتر بية وماحس لا اني واكعة ...وللحكاية تكملة
