#الشوق الجارف_والكبرياء
همس ليل
البارت الخامس عشر والاخير
رجعت للمطبخ ..واني ارجف ..بليلتها مانمت واني افكر ...شنو تاليتها ...ابقى هيج متمرمرة...اذن الفجر كمت توضيت وصليت واني ادعي ربي يرسيني على الخير...شفت ريم تجهز ريوك علي ديطلع ...كعدت وياهم ...من طلع علي محد كدر يرجع ينام..
ريم...شصار وية فيصل البارحة
حنان...فتحت عيني متفاجأة...شلون عرفتي
ريم...طلعت ادور عليج ولمحته جرج
حنان...ريم تعبانة ...لا تشوفيني اروح وارجع ...بس داخلي نار
ريم...اعرف بيج.. ماخذة طبع اخوتج ...تكتمون بداخلكم...بس انتي مرة ..موزين تظلين تكبتين .
حنان...البارحة اول مرة ابجي من سنين...حتى بهاي جانت على ايده...كلشي تعلمته على ايده
ريم...حنان اذا تحبيه قدمي تنازلات...ترة الحياة بالعناد والمكابرة ماتمشي...وبعدين كل الي صار من جانب عمتج...هسة حققت الي تريده ..وفرقتكم...ليش تنطيها مجال...المرة تتحمل في سبيل بيتها ..
حنان...ليش ماتنازل هو
ريم...حنان شتريدين يسوي ...يعوف امه
حنان...لا يعوفني اني لعد
ريم...جان طلكج بصورة نهائية لو يريد يعوفج...حنان فيصل يحبج واكف محتار بينج وبين امه...انتي سهليها عليه ..ميصير يبقى الطرفين معاند...لازم طرف يتنازل حتى يمشي المركب… ليش تظلون اثنينكم متعذبين
حنان...ظل حجي ريم يدور ابالي ...ليش اخلي امه تحقق الي رادته...ممكن احاسبه بطريقة اخرى..بس شلون ماكدر اعتذر
بعد يومين من روحة علي صار هجوم على موقعهم وظلينا نلوب اندك عليه مغلق...ريم ظلت تبجي واني روحي مفرفحة ماعرف شسوي ...اخوتي يتصلون على جماعته ..اغلبهم منقولين لغير اماكن...لحد ثاني يوم...واحنة ماشايفين النوم...لحد ماواحد من اصدقائه اجى لبيت اهلي..علي منطيه العنوان طلع تلفونه ضايع..وهو ماحافظ اي رقم...علي مصوب بس الحمد لله اصابته خفيفة ...ابوية ذبحله بطلعته من المستشفى ...بيوم رجعته للبيت تلكيته حظنته واني ابجي...علي مو بس اخوي ...هو هم دموعه نزلن...فيصل ماعافه بالمستشفى حتى من رجعوه...اكثر من اخوتي داراه بين علاجات ومضمد للبيت يجي...وياخذه للدكتور..
علي..حنان صار ٨ اشهر على الي صار...لازم نشوف شكل نهائي للوضع
حنان...يعني شنو
علي...لو تكعدين انتي وياي وتتفاهمون...لو يصير طلاك نهائي..حتى تكمشين عدة وكلمن يشوف طريقه
حنان...جنت اعرف هاي وسيلة ضغط من علي...بس مجرد تفكيري انه راح تنقطع كل الطرق وية فيصل أذاني...زين ممكن يزوج مرة ثانية..حسيت بغيرة مو طببعية واني اتخيل يحظن غيري..بقيت افكر ليش انطي مجال يبعدوني عنه ...واذا بقيت معاندة شراح استفاد ...
ثاني يوم كلت لعلي خلي يجي نتفاهم...خابره علي..واجى ..بس دخلت لابسة حجاب وسلمت
فيصل...شفتها دخلت بحجابها...داتحسسني اني محرم عليها ضجت من مجرد التفكير بالموضوع..
علي..اني جمعتكم هنا بعيد عن الكل...كافي عاد لازم توصلون لحل...ماراح ادخل بينكم انتو حلوها ..طلع وعافنة
فيصل...الي اطلبه هواي منج
حنان...انتة ظلمتني فيصل..ماسمعت مني الي صار
فيصل..حنان مهما كان الي صار ...ماتوصل للضرب..انتظريني واذا ماخذت حقج ذيج الساعة سوي الي ترديه
حنان...ميخالف...جان تكدر تصرف بغير طريقة...بس مو اطلك وتكسرني كدامهم
فيصل...وانتي ماقصرتي قللتي احترامي كدام اهلي جان ممكن تسكتين من شفتيني
حنان...هسة المطلوب شنو..جنة كاعدي واحد مقابل الثاني تفصلنا مسافة قليلة ومن احجي مدنكة ...ماكدر ارفع عيني بعينه ..حسيت فيصل كام وكعد بصفي وخله ايده جوة حنجي ورفع وجهي له
فيصل...حنو...اعتذار لخاطري مراح يقلل من شانج ...بالعكس يكبرج بعيني...
حنان...صار اذا هالشي يحفظ كرامتك ...بس انت هم احفظلي كرامتي
فيصل...شلون
حنان...ماكدر ارجع وية اهلك ...اجرلي
فيصل...حنان اني الجبير والبيت لنا...ماكدر اعوف امي
حنان...يعني مطلوب مني اعتذر وارجع اعيش بنفس المشاكل .
ماسوينا شي لعد ...هم باجر عكبة تصير مشكلة وتنذب براسي...خلي نفضها هسة احسن
فيصل...شنو قصدج
حنان...فيصل انتي تريد مني تنازل بس مامستعد تقدم شي...واني سابقا جنت اتحمل وماوصل شي لك اكول خطية يجي تعبان مو مال ازيد همه...وكفت بلحظتها ...كتله بس اني بعد مامستعدة اعيش نفس المشاكل...وانت هسة بيدك الاختيار..ردت اطلع لزم يدي
فيصل...هذا قرارج النهائي
حنان...التفت عليه جانت بعينه نظرة توسل تعاكس كعدته بشموخ ..ورفعة راسه الي بيها كبرياء ..بلحظتها حنيت له رجعت لزمت وجه ابيدي اثنينهم...وخليت عيني بعينه ...فيصل لو بيدي قراري النهائي يكون ماعوفك لحظة وحدة...لان محد يعوف نبض كلبه...بس ماريد الكه نفسي فجأة كارهتك او انت تكره رجعتك للبيت من ورة المشاكل..سحبني لحظنه...
فيصل..لعد خلي اودعج..جان بوسته بيه شوق وحب والم وعذاب...حسيته تعبر عن كل مشاعره...واني بادلته هاي المشاعر...تركني وطلع...شنو الي صار ...معقولة عافني ...معقولة ماكدر يقدم تنازل بسيط...رحت دايخة لغرفتي ...وعلي من شافني هيج عافني مااستفسر...لان الامر جان واضح
فيصل...مر اسبوع علي التفكير شل حالي ...ورغم جنت مقرر ما استسلم لكلبي...بس كل ما اذكر الامر راح ينتهي...وممكن تصير لغيري ...احس نار وتشتعل داخلي ...مستحيل اخليها...كمت اباوع لمازن شلون مداري مرته....مع انه متجي لنص تعب حنان وياي...ليش استمر هيج ...بيدي حل مشكلتي...هواي امور صارت كدامي خلتني اخذ قراري...اتصلت وية حنان واهلها...ورتبت موعد لجيتها...امي مقبلت بالبداية وظللت تحجج ..هالشي خلاني اشوف طلب حنان صح...واجت حنان واعتذرت من امي
حنان...خابر فيصل وكال موافق على الشرط...بس انطيني مجال ارتب وضعي...ورحت اعتذرت من امه بس اخته مادز عليها هالشي كبره بعيني...بس طبعا عمتي من ورة خشمها
فيصل...حجيت وية امي راح اجر لحنان وتخبلت ...على انه اخذتك والرجل ابن مرته...وماقصرت وياكم وخذلتوني...بالبداية استخدمت البجي ...بعديت كامت تقنعني طلك واخذلك احسن وحدة...بقيت شهر اقنع بيها ماردت اطلع وهية زعلانة مني...بس خلال هالشهر اجرت بيت وبديت اثث بيه ...امي بقت معندة وحلفت يمين ماتدخل بيتي...
حنان...اليوم رحنا عقدنا سيد ورحت اخذت فستان طويل جويتي اللون بسيط فصاله بس فتحته توصل اعلى الركبة ...وسويت شعري...وبقيت حمادة يم ريم وعلي ...واجى فيصل اخذني لبيتنا الجديد...طبيت واني فرحانة بيه رغم بساطته..اجى فيصل شبكني من مرة وهمس بأذني...صار تسع اشهر عايفتني...مشتاقلج بكد مابية شوك ...مشتاق لاخوية
حنان...ههههه..اخوك هم مشتاك لك ...دارني عليه
فيصل...شلون جنت تنامين بعيد عن حظني...
حنان...انت مافتقدت شي من الغرفة
فيصل...غيرج لا
حنان..اخذت عطرك...وليلا اخلي علة المخدة وانام وريحتك ماتفاركني
فيصل...تعاي هسة للاصل ماكو داعي للخيال
الحمد لله صار عندي ولد ثاني سميته علي.. وعمتي ابد مادخلت بيتي ...مازن عزل لمرته من ورة المشاكل ..وحماي ازوج بس هاي حظها كاعد لان عمتي كامت تخاف هم يعزل...مهيمن ازوج وحدة من اقرابنا رغم شكد حاولت وياه على زينب بس هو قفل بعد الي صار..وزينب تأذت حيل ...بقت لحد كم شهر وهسة مخطوبة ...ام محمد حماتي طلع زوجها مزوج عليها وبس رجعت زعلانة طلكها ...وهسة ملخ وية الجناين...
فيصل ماقبل اكمل شغلي رجع كعدني....صح تنازلت بس اشتريت بيتي ورجل يحبني ومراعيني ...مرات مطلوب من المرة تقدم تنازلات حتى تمشي الحياة وبالمقابل الرجل لازم يقدر هالشي...خلصت الحكاية
اتمنى تاخذون مايفيدكم من بداية القصة للنهاية ...انطرحت هواي امور بقصة اليوم...من التربية للمشاكل العائلية ...ومايكدر يقدمه الاشخاص حتى ميشي المركب...للتملك عند الاهل...مو دائما النهايات سعيدة ...تحياتي
