#الشوق الجارف_والكبرياء
همس ليل
البارت الرابع
بدت عطلة الاربعين يوم وكعدت اقرى ...ومن بدت الامتحانات طلبت من مهيمن يوصلنا ...لان هو خلص قبلنا ...وفعلا بقى يوصلنا ويرجعنا ...خلصنا امتحانات....وكعدنا ...هالمرة امي كامت تضغط علي اساعدها بالبيت ...وتعلمني طبخ ...ودزني فترة يم بيت خالتي عدهم ٤ بنات بلكت اتعلم شوي منهن انوثة.....بس جانت نفسي تلعب من سوالفهن..شنو ماعندي شغل وعمل بس ادور بالنت عن الموضة والمكياج لو اقرى قصص حب لو كالت فلانة وحجت فلانة وهاي نخطبت وذيج ازوجت ...ماطول عدهم وارجع لاهلي ...بس اخوتي بدوا مو مثل قبل يكعدون بالبيت ...فجنت اخلص الصبح تنظيف واتعلم اطبخ حتى بالليل اتفرغ العب وياهم...جمعتنا جانت حلوة شقة ولعب وسوالف...زينب بقيت اتواصل وياها على الفايبر ...لان ماريد اروح واشوف فيصل وهي اهلها مايقبلون تجي لان بيتنا بس ولد....طلعت النتاىج ونجحنا بس بالدفع ....
بالعطلة ماكو هلكد حركة اني سمنت شوي وبدت معالم جسمي تظهر اكثر...مرة زينب قريب مانريد نداوم كالت اروح للسوك نشتري لاوازم للمدرسة...السوك جان بعد فرعين عن بيتنا...بيومها لبست بنطلون جينز جان ضيك لان سمنانة ولبست قميص قصير يعني يدوب يغطي الورك...ورفعت شعري ورحت لامي
حنان...يوم اريد فلوس
ام علي...عزة يمة شلابسة هاي
باوعت..شبيه لبسي نفس البنطلون دائما البسه...
ام علي...يمة انتي سمنانة وكبرانة والبنطلون طابع على جسمج بس يشوفوه اخوتج مايخلوج تتطلعين
حنان...ماعندي غيره كلهن كصاف...اشتري هسة واحد...وطلعت على السريع لان زينب دكت علي وامي تدردم علي
حنان...هلو زوبة
زينب....هلو حنو ...بس هاي شلابسة
حنان...شكو ياهو اليشوفني نفس الحجاية
زينب...بنطلونج فضيحة...بدليه حنو
حنان...مابدله وامشي لا ابطل ماروح
ورحنا ....وشبعنا حجي وتصجم هم زينب حلوة وهم لبسي الفضيحة...بحيث ضجنا ومكملنا مسواك ردنا نرجع ...جان اكو اثتين لاحكينا ...بس لحوا بالحجي اخر شي واحد لزم ايدي وخله الرقم بيها...اني صرت اعصاب التفت وذبيت الرقم بوجه
حنان...لك انت متستحي ماعندك اخوات
الولد...عندي بس مايطلعن هيج ويصيحن تعالوا تحارشو بيه ...ولاتصيرين شريفة براسي
حنان....فار دمي من كال هيج ...رفعت ايدي وضربته راشدي وهذا تخبل...اجى يريد يضربني..ولزمه صديقه...ويظل يتهدد علي...ماحس الا واحد جره من ياخته وضربه بوكسي...
فيصل ...تعال اشوفك شلون تتحارش بنات العالم...جان وية فيصل صديقه كمشه..والولد انهزموا...التفت على زينب وصاح بيها اصعدي بالسيارة ...ورجع علي من شافني تفاجأ ظل يباوع من فوك لجوة علي...مشيت جرني من عكسي..وين مولية هيج وحدج اصعدي..فتح باب السيارة ودفعني بيها...وترخص من صديقه وظل يسوق بس بعصبية...لحد ماوصلنا ...قبل ماننزل ..حاجى زينب
فيصل....روحي لغرفتج بعدين حسابي وياج
ردت انزل ...نزل قبلي جرني للصالة مالتهم..
فيصل ..هاي شلابسة...اخوتج ماشافوج من طلعتي
حنان...اولا مالك حق تجرني لبيتكم...وثانية انت معليك بلبسي
فيصل...لج لسانج بعده طويل ...وبعدج صلفة.. فوك ماخلصتج من الولد
حنان...محد كالك ادخل
فيصل...ادخلت بحق الجار وحق صداقة اخوتج ...بس الظاهر جانت المسالة عاجبتج...
حنان..مادري بنفسي راسا رفعت يدي وضربته...وتجمدت بعد فعلتي هاي...فيصل فتح عينه على وسعهن وتفاجا بالحركة بس كان حركته اسرع الو ايدي برة ظهري وجرني اله وظل يباوع بعيوني
فيصل...صدكي لوما بنية وخال خاطر لاهلج جان راويتج هسة شلون تمدين ايدج...موبس لسان طويل وصلافة لا ...مامؤدبة انتي....ولما طفلة جان سويت شي عمرج ماتنسيه
جان يضغط حيل على ايدي وويزيد بلوي...ويحجي عيونه نار تطلع ...بس ابد ماكتله اخ حتى ماخليه يشمت بية..
هدني ودفعني ...شكد كوية..اطلعي وبعد ماريد اشوفج وية زينب
طلعت واني افرك ببدي...وكلامه حيل جان جارح ...بس ماجان قصدي اضربه راشدي كانت رد فعل على حجايته
من دخلت لبيتنا..رحت راسا للغرفة باوعت لابسي...
لليل ماطلعت من غرفتي وظليت نايمة بالفراش...اندك الباب
حنان...ادخل
علي...حنو شببج اليوم...شو ماكو...دخل بعده مهيمن ....يمعود راسنا هاديء خليها يوم تنطينا استراحة...اني ماجاوبت علي اشر لمهيمن طلع
علي....اسمع
حنان...شنو
علي ...المشكلة
حنان..ماعندي شي ....بس..عدلت كعدي على الفراش وهو كعد يمي...اكول علي اكو خطا بيا
علي...حنو حبيبتي انت كلبج ابيض مثل الحليب...بس الدنيا سودة تاخذ ظاهر البشر...احنة خفنا عليج من الي نشوفه وعلمناج شلون دافعين عن نفسج...بس نسينا انتي بنية واكو قواعد تختلف لازم تاخذين بيها مو مثل الولد...وخطأ يشمل امي هم ..من هاي القواعد تصرفج برة البيت ...لبسج...
حنان...لبسي غلط
علي...هسة لازم صار تغييرين لبسج اما تتحجبين...او تشترين شي يناسب عمرج وجسمج
سكتت...وثاني يوم اخذت امي ورحت اشتريت صدراي للمدرسة وبناطير وقمصان طويلة للطلعة بس بقت الاحذية ترانشوزات ماغيرتها...
اول يوم للمدرسة ...بدلت وطلعت وهم كفيت ردن القميص بس صدرية طويلة...داسد الباب اندرايت لكيت فيصل يباوع علي...طبعا من يوم المشكلة بعد ماحجيت وية زينب....وية مانزلت بالشارع دامشي طلعت زينب..باوعتلي اني عفتها ومشيت ..حسيتها استغربت ...وصلها فيصل وبالمدرسة حاولت تحجي وياي مانطيتها مجال...
مشى الاسبوع هيج كمت اتعمد اتاخر حتى ماشوفهم بالباب ورجع مهيمن يوصلني الصبح..لحد يوم....وللحكاية تكملة
