#الشوق_الجارف_والكبرياء
همس ليل
البارت الاول
هو...انتي طالك
تجمدت قدماي وشل لساني وجحظت عيناي اليه هل سمعت ماقال... كان وهم من خيالي ام واقع يرفض عقلي تصديقه ...لا ......السكون من حولي ....عيناه الناضرة الي بصدمة ...يداه التي ترتعش وهي تحتضن ذراعي تريد ان تروض عضبي الهائج...شفتاه التي طالما احستت بدفؤهما وهو يقبلني تتحرك وتخبرني شيئا ...لا اعلم ماهو ...صدى كلمته يتردد في الغرفة ....طالك....طالك....تحركت قدمي لاصل باب غرفة جمعتنا لسنوات...جلست على السرير وانا احاول ان استوعب ماحدث...طالك...طالك..عادت لتكرر على مسمعي ...وضعت يدي على اذني احاول ان اصم سمعي ...لكن الكلمة باتت تدور في عقلي وتعيد نفسها وتردد ...انتهى كل شيء باع السنوات والحب ....
لنرجع الى ٨سنوات سابقا....جان عمري ١٥ سنة من بدت قصتي ...قبله خلي احجي عن حياتي وية اهلي اعيش وية امي وابوي وخمسة اخوة ولد تلاثة اكبر مني واثتين اصغر مني....هسة تكولون انتي مدللة....لا اني ولد اكثر منهم من جنة صغار جانو اخوتي حيل يضايقوني ياخذون لعباتي ويكطعوها ويجرون شعري ويخبثون هواي علي ...جنت بس ابجي ...لحد يوم جروني من شعري وحيل تاذيت رحت جبت المكص وكصيته كله اجت امي...طبعا نسيت اكولكم اسمي حنان
ام علي...لج صخام هاي شمسوية
حنان...ليش همة ماعدهم شعر اني هم مثلهم حتى بعد مايجرونه
ام علي...يمة شنو انتي مثلهم انتي بنية لازم عندج شعر
اجى ابوي وشافني نقهر حيل صاح اخوتي ورزلهم
ابو علي...ليش هيج تضايقون اختكم ...مكان ما انتو داروها هالوحدة عدكم باجر عكبة تصير حنينة عليكم...تعاي بابا معليج بيهم بعد الي يبسطج ابسطي انتي هم...
من يومها صرت ولد وياهم اتعارك واتكاتل ومن سجلت بالمدرسة ابوي سجلني وية اخوتي حتى اروح وارجع وياهم ...جان اكو بنات ويانة لي هم امهاتهم معلمات...مرة طالب ويانة ضربني ورحت لاخوي حسن ابجي ...اجى سحله للولد ومن رجعنا...للبيت
حسن...تعاي حنو
حنان...شتريد
حسن..ليش تخليه يضربج
حنان ....ماكدر عليه اطول مني
حسن....تعاي اعلمج ..
ماقصروا اخوتي الكبار علي وحسن ومهيمن يوميا ياخذوني دروس ملاكمة وطبعا بعد كل درس اطلع مزوركة....
جان بين كل واحد بينا سنتين ... وربيت وياهم كولد وبقيت بمدرسة الولد وية اخوتي لحد ماوصلت صف رابع ابتدائي علي وحسن راحو متوسطة بقيت اني ومهيمن...مرة طلعت بالفرصة لكيت عركة اباوع اشوف مهيمن ملتمين عليه ولد يتعاركون وياه وهو وحده وشفت اصدقاءه مادافعوله ...اني شلهت ايدي واجيت اركض ونزلت دك جلاليق وعض وبوكسيات ...همة ماكدروا علي لان اني ناعمة وهمة اطول مني يكمشوني منة افلت منة لحد ماجى المعلم ...واخذنا للادارة كلنا مزوركين ومشككة هدومنا ...من شافنة المدير تخبل ...وظل يرزل بينا والتفت علي...كال لج بابا انتي بنصهم شنو ...ولد ويتعاركون انتي شكو ...دز على ابوية وحجاله الصار ...ابوية تخبل..ومن رجع سوة هوسة بالبيت وكال السنة الجاية انقلج لمدرسة البنات....
بالخامس نقلوني لمدرسة البنات ...يوميا كاتلة بنية وساحلتها بالصف بحيث المعلمات صاحن الغوث مني ...حتى ملوا من كد مايدزون على امي
...كول خلصت السادس ورحت متوسطة ... فتوة مال المدرسة جنت مو بنية محد تكدر علي لا فوكاها لساني اطول مني وزفر حشاكم ايدي والغلط ترباة ولد بعد ....
من صرت بالثاني متوسط البيت الي بصفنا انباع والجيران الجدد رمموه وسوو فد شي روعة ...من نزلو راحت امي تعرفت عليهم ودت نزلة الي هي غدة لكل جار جديد ...من رجعت كالت عدهم بنية بكدج اسمها زينب اخذيها وياج انقلت بمدرستج ....زينب حلوة بيضة وعيونها خضر وطويلة ...اني صرت زركة يمها ...طبعا عقلي مو يم هاي السوالف اصلا ماغار من البنات ابد...حدي سوالف بالمدرسة وماعندي صديقة معينة ومن ارجع للبيت ...اقرة واظل العب وية اخوتي ...بلي وطاولي ودومنة...بس زينب صادقتها جانت حبابة وماعدها سوالف البنات مال صداقات وهاي الامور ....هي محجبة ولبسها كل طويل..واني لا وشعري دائما اكصه بس اخلي لحد الكتف....وقميصي دائما كافه ردنه ....
صرنا ثالث متوسط ومرة راجعين من المدرسة ولحكونا ولد يتحارشون ...بزينب اكيد مو بية... اخر شي واحد مد ايده على زينب ...واني راسا الزمت ايده ولويتها...طبعا صح وكحة ومتعلمة على فنون القتال بس مو لدرجة اواجه ٣ ولد...بس شفت اخوية جاي من بعيد وتسبعت...حسن من شافني اجى يركض ولزم الولد دك... اصدقاء حسن قريبين اجوي قرو الولد التوبة....اني بس شفت حسن اخذت زينب ورجعت للبيت ركض...وراسا لغرفتي عرفت راح اترزل ....ابوية كال بعد ماكو دوام وراح ادزج يم بيت خالتج عدها بنات بلكت تتعلمين منهن شوي ...بقيت اسبوع ماداوم واخوتي ادخلوا وية ابوي احنة نوديها ونجيبها وابوي قافل ...لحد ماجت ام زينب تشكرت منا وياها جان ابنها الجبير ...يلا خلوني اداوم...واول يوم من داومت جنت امشي وية زينب بالرجعة ....وللحكاية تكملة#الشوق الجارف_والكبرياء
