جكد جنت مصدومة ومتاذية جكد جنت مجروحة وحجيت حجي هواي.. خلص انتهينا اني وياك مصطفى.. مااريد اشوفك.. بس توكف على رجليك رح اعوفك للابد .. ماحسيت بااي كلمة كلتهة شون اعوفة .. وحبي .. وهيامي.. الي عشتة الي كلتة رح انسى.. رح اكدر انسى مفكرت..
ساعة مكالي مصطفى .. انتي طالق..
احس كلبي انضرب بخنجر حطيت ايدي على صدري من هول الكلمة .. رجلي معادت شالتني..
باوعت علي.. نظرة ورجعت غورگت عيني.. مو ممصدگة الي كالة مصطفى..
لا .. فتت للغرفة حطيت ايدي ع حلگي لايسمعون صوتي البنات..
فتت للحمام.. وفتحت المي وكعدت ابجي مااعرف جكد وقت .. يمكن لحد متعبت..
وعرفت حظي السئ رح يظل مرافقني طول حياتي..
غسلت وجهي بعد متعبت..
اول مرة احس متربطة.. مو بيدي..
شنو لازم اسوي..
هذولة شنو ذنبهم يتبهذلون..
اني لازم الگى شغل..
الفلوس الي عندي كلهن صرفتهم وكت مجان محجوز عالوكالة والحسابات المصرفية.. مال مصطفى..
باجر الصبح اخابر جوزيف واگلة بس شااگول الة اليوم خابرني وگتلة كل شي تمام ليش ياربي..
اني شسويت عمود اتبهذل تالي عمري..
بس المطعم الي اسهم بي وهذا مال صديقتي..
واني وصية عالجهال..
بس اذا استغليتة حجي مصطفى .. رح يثبت علية..
تعبت خلص انسي سالي .. لاتفكر ان لها مدبر..
ظليت اسبح واستغفر طول الليل وسلمتة لرب العالمين هو حسبي ووكيلي..
جتي ايلا .. غمرت روحهة بحضني..
وهيلين مدت ايدهة وحضنتني من ورا..
زادو همي.. اكثر..
اني شسوي يارب..
ياربي .. ارحمني .. وارحم هذولة الاطفال..
يارب سامحني وسامح مصطفى على عملتة يمكن افضل رد لكرامتي ردة هو مصطفى لمن طلقني.. صحاني..
اني الي ماقويت دعائمي.. ولارسخت بنياني..
من اول مرحلة طرت .. وطار كل شي حوالية..
مو مهم .. لا.. مهم.. اني جيت لهاي المدينة والي حسبتة من دمي ولحمي شمرني ولادرى عني..
ليش اعتب على مصطفى. مصار..
يووو.. ليش. اقارن.. خليني بهمي..
ظليت افكر ومااعرف ياساعة نمت كعدت ع صوت أيلا..
سالي.. سالي..
كعدي سالي..
ايلا.. خير حبيبتي .. اني تاخرت.. بالنوم .. بيش الساعة..
مااتاخرتي بس بابا ماكو..
كعدت فازة.. شنو.. ابوج.. وين رااااح..
مااعرف كعدت . كالتلي خوانة اصحيج.. عمود يصحى بابا وشفتج تعبانة رحت لغرفة بابا ماكو سالي .. بابا هجرنا .. بابا تركنا سالي..
لزمتها من ايدناتهة وبعدني مو مركزة .. اهدي حبيبتي.. اكيد بابا معافكم..
تلاكي بالحديقة لو بالحمام..
هنا ذكرت.. مصطفى الحمام.. حسيت اريد انطي روحي كفخة بعد الحجي الي حجى مصطفى البارحة .. ونهاهة طلكني..
واني افكر بي.. جكد غبية اني .. وماعندي كرامة قاطع صفنتي ايلا هي وجر ملابسي..
سالي.. هسة وينة بابا..
وين راح..
هسة ايلا .. انتظري دا افكر..
دقيقة .. اخذت نفس..
وحاولت اهدي روحي.. اووووووف..
ايلا .. روحي .. كعدي اخوتج عمود يروحون للمدرسة.
هيلين .. اني كاعدة ومتحضرة..
سوولي ريوك اروح..
كلت همزين متفاءلة من الصبح متعرف ابوهة ماكو..
أيلا :هيلين بابا ماكو .. بابا .. تركنا..
هيلين:احسن شي سوى بحياتة..
ظليت صافنة بوجهة واشوف هاي القساوة شون تطلع. من طفلة عمرهة ميتجاوز 11سنة..
شكلها فرحانة..
ايلا .. تبجي.. شون.. بابا ميكدر يمشي .. وين يروح..
هيلين:اكيد يم الساحرة الشريرة وكاعد ومرتاح..
بلحظة .. محسيت غير كلمات هيلين ترن على اذني..
اني الي صارلي ساعة اخذ صفنات.. افكر وين راح جتي هيلين وكالتلي حقيقة جنت انكرها..
اكيد .. يعني مصطفى هيج يقرر بيوم وليلة ينهي كل شي بينا بس .. عمود ضميت علي..
خلص .. سالي انسي .. انسي غلطة وانتهت وخلص..
بعدهم ايلا وهيلين يتناقشون..
سالي:شون رح نكضيها نقاش هيج طول اليوم..
ايلا فوتي بدلي ..
وانتي نزلي تريكي علما يجي الباص مال مدرسة..
هيلين :ماشي .. مام.. بس لاتعصب..
تعرفني احبهة من تكلي ماما .. وتبوسني.. بوسة صلح..
ماشي يلا نزلي .. على مااكعد ميار.. وابدلة..
اني .... بدلت .. سالي.. صباح الخير .. اجة حضني ونزل...
كانو الجهال ثلاثتهم يحاولون يخففون عني بطريقتهم..
راحو .. الجهال.. وايلا هم بلشت.. تروح ويا اصدقاءها بالباص الخاص بالروضة.. هيج احسن اطمن..
بستهة .. وطمنتهة.. لاتخافين.. من ترجعين رح تلاكين ابوج موجود..
كالمعتاد .. اصبح.. ع تلفون .. من جوزيف وهو راسا يميز صوتي .. اذا جنت.. مضايقة..
جنت كاعدة اسال خوانة ع مصطفى.. وهي تكلي مسمعت شي.. كعدت الصبح مثل كل يوم ولحد منزلت ايلا وراحت للغرفة ملگتة..
دك .. جوزيف..
هلو جوزيف.. شونك..
شوكت .. باجر .. راجع..
لامبي صوتي شي .. هسة كعدت من النوم ..
جوزيف من تجي .. شحجيلك ..
اكو شغلة هسة دايخة بيهة..
ويا مكالمتي دخل مصطفى عالكرسي المتحرك وجهة ميتفسر وويا المحامي..
عدلت حجابي.. وبعدني دا احجي ويا جوزيف..
اشرلي مصطفى.. كملي تلفونج وتعالي للمكتب..
كالها وبلهجة جدية مفهمتها..
اشر لخوانة..
سوينا القهوة ودخليهة..
اشرتلهة لخوانة .. هذا شبي..
هزت جتفها .. ماادري..
فتت للغرفة اشرلي مصطفى اكعد..
كعدت.. وتململت.. خير.. اكو .. شي سيد ماكهانتون..
ماكهانتون:سيد مصطفى.. اجاني للمكتب.. وجان فاهم اشياء غلط.. واني صححتهة اله..
سيد مصطفى.. بعد ماتعرضت ذاك الحادث وتراكمت الديون والفواتير.. وست سالي..
حاولت تمشي الشغل بالتوكيل الي يمهة .. لان انت موصي انو تكون هي الوصية .. على اولادك..
بس استاذ مصطفى افتهم الموضوع غير شي افتهم انو انتي..
سالي:اني سمعت كلام اعرفة واعتقد الباقي مااريد اسمعة باوعت على مصطفى بنظرة .. بس مشفت ندم.. ولاحزن .. جان بارد وشابك ايدة ومنزل راسه ويسمع..
من رخصتكم... صاحني .. مصطفى.. ست .. سالي..
ارتبكت.. اتفاجات .... شنو هالرسمية.. هذا مصطفى..
بدل مايجي يتوسل اسامحة ارجعلة .. جوابة بارد موتني لو باقية.. بعينة مختلسة ولااشوف النظرة هاي بعينة...
