#فلوكستين4
قالت لي اهااا طيب انشاءالله كويس وقفلت على كدة....عدت الأيام ،انا ومعتصم بقينا أصحاب شديد،صحبه بس ماف حاجه غير كدة😂😒مع اني عمري م اتوقعته أصاحب لي ولد ونكون كدة،بقينا على تواصل دايم لدرجه انو ملفتين نظر في المدرسه 💔إتصلته على أم البت مرتين بعد اليوم داك مرة ردت وقالت لي جايه والمرة التانيه م ردت لي عديل ،والبت عدت اسبوع م جات المدرسه على حسب كلام المشرفه،قولته دي المرة الأخيرة أتصل عليها وإنشاءالله أتفاهم معاها،في البدايه م ردت قولته اصلي م بخليها تاني رجعته إتصلته عليها قالت لي بي نرفزة نعم ي استااذة،قولته ليها كويس انو انتي عارفه رقمي طيب ياخي انا إتصلته عليك كم مرة علشان عايزاك تجي المدرسه لأنو بتك دي عندها مشاكل في المدرسه ولازم نتكلم معاك ،قالت لي عايني جنبك ورقه وقلم؟استغربته طبعا قولته ليها ايوة،قالت لي طيب سجلي عندك الرقم دة،شلته القلم قولته ليها اها؟قالت لي ....091 دة رقم أبوها إتصلي عليهو تمام؟قولته ليها كيف؟قالت لي زي م قولته ليك ومع السلامه،،،طبعا انا مستغربه يعني معقوله دي أمها بجد ولا أنا غلطانه في الرقم ولا القصه شنوو؟كأنها كانت بتقول لي تاني م تتصلي علي بس بطريقه تانيه،،،فضلته في حيرة من أمري قولته لنفسي كدة حاولي رقم ابوها لو طلع ردة فعلو نفس الشي اكسري الحنك مالك ومالها بتصل مرة واحدة بس ردة خلاص م ردة يبقى كدة عداني العيب،،والله رصيدي بقى بحرقني عديل لأني بخلصو في كلام فارغ سااي😭💔دخلته الرقم وإتصلته وبالفعل م ردة طوالي قولته خلاص معناها الموضوع منتهي ✋قعدته أتونس مع أستاذة إبتسام كدة فجاة تلفوني إتصل رديت ،المتصل كان بقول:اوكيهه تمام أبشرر والله إعتبر الموضوع منتهي❤قولته الووو؟قال لي السلام عليكم،قولته ليهو وعليكم السلام،قال لي قبل شويه لقيت مكالمه من الرقم دة مين معاي؟قولته ليهو من الرقم دة؟لا أبدا والله شكلك داخل غلط،قال لي طيب تمام وطقق قفل الخط في وشي،قولته لنفسي دة مالو اجيي وكمان قافل الخط في وشي😕عاينته لسجل المكالمات لقيت نفسي بالفعل انا متصله قولته واااي دة رقم أبو البت😱😨رجعته فيهو سرعهه،فصل المكالمه في وشي تاني إتصلته رد قال لي ي بت الناس دي شنو الحركات دي مش اسي قولتي م إتصلتي على الرقم ؟قولته ليهو معليش ي أخ انا لخبطته بس عايزة اسألك إنت والد لميس؟قال لي أيوة منو معاي؟قولته ليهو انا بدرس في مدرسه بتك وعايزاك تجي المدرسه ضروري لو ممكن؟قال لي خيير إنشاءالله؟قولته ليهو خيير بس ي ريت تجي لو زمنك بسمح ليك،قال لي اوكيه انشاءالله❤بعد م قفل قولته من طريقه كلامو م حيجي دي عيله متخلفهه سااي😕الكلام دة كان الساعه 12 عندي حصه مشيت ادرسها مع تانيه بعد نص ساعه كدة تلفوني ضرب شلته التلفون علشان أصمتو لقيتو نفس الرقم بتاع أبو البت ،رديت عليهو قولته ليهو أيوة؟قال لي أنا وصلته المدرسه وحاليا مع المديرة وين إنت؟طبعا م صدقته قولته ليهو طيب جايه عليك أسي!!شلته شنطتي قولته ليهو بنات عن إزنكم شويه كدة وارجع ليكم ،مشيت مكتب المديرة دقيت الباب قالو لي إتفضلي ،دخلته لقيتهم بتونسو سااي المديرة قالت لي إتفضلي أستاذة شهد ،سلمته عليهم وقعدته،المديرة قالت لي عن إزنكم انا طالعه على غرفه الاجتماعات عندي إجتماع مع المعلمين وجايه راجعه ❤الراجل قال ليها إتفضلي على طول،بعد م طلعت قال لي طبعا لما إتصلتي علي كنت مشغول شويه خير إنشاءالله ي أستاذة؟قولته ليهو معليش لو أزعجتك وكدة بس الموضوع ضروري لأنو محتاجه أتكلم معاك في موضوع بتعلق بي بتك لميس،قال لي بالنسبه لشنوو؟قولته بتك دي عندها مشاكل م عارفه اقول ليك شنوو بس إنتو م قاعدين تراقبوها في البيت؟م مركزين مع حالتها النفسيه ولا في شنو بالظبط؟قال لي لييه مالها؟قولته ليهو مستواها في الدراسه متدني شديد وانا والله م حبيت اتصل عليكم واتواصل معاكم الا بعد م راجعته ملفها الدراسي كانت ماشاءالله عليها ،وبالفعل إتصلته على امها بس م لقيت منها أي ردة فعل او م أدتني إحساس بإهتمامها بالموضوع حتى رقمك دة ادتني ليهو هي وقالت لي أتواصل معاك انت،قال لي والله ي أستاذة انا م عارف اي حاجه،قولته ليهو كنت متوقعه الحاجه انت عارف انو هي قالت م عايزة تمتحن السنه دي؟انا م عارفه نوع المشاكل الحاليا هي فيها شنو بس ي ريت تحاول تتكلم معاها لأنو لو م إمتحنت هي حتضيع على نفسها سنه وبس م اكتر وحاول أفهم هي مشكلتها شنو بالظبط ،،قال لي طيب حأحاول احل المشكله دي إعتبري الموضوع منتهي،بعدها طلع،اليوم التاني الصباح اثناء م انا قاعدة في المكتب مع المعلمات جات البت الإسمها لميس داخله ودقت لي الدرج قالت لي:مسؤله مني إنتي؟لا إنتي منو اساسا علشان تتصلي على بابا؟عايزة مني شنو عندك عندي حاجه؟واحدة من الأستاذات قالت ليها ي بت دة شنو إتكلمي بأدب،،البت وشها كان مورم وشكلها كانت بتبكي وم نايمه اساسا،انا زاتي اتخلعته بقيت اعاين ليها،قالت لي شوووفي امتحن م امتحن ابكي ألم علي الخلق دة م مجال إختصاصك وم تدخلي في حياتي لأنو ماف صله بتربطني بيك وإياك تاني تحاولي تتصلي على أهلي عشان تحكي ليهم عني انا م شافعه فاهمه؟خليك في حالك وبطلي تتحشري في حجات م بتعنيك وركزي في وشك العامل زي طربيزة اللحام دة وخلي الناس في حالهم وطلعت مشت،😨إتخيلو البت بتتكلم معي كيف؟والله م حرقتني الا جمله وشك العامل زي طربيزة اللحام دة😭💔😂ألأستاذة قالت لي دي قليله ادب دي انتي ساكته ليها لييه؟طبعا كل الأستاذات بقو يتكلمو في تصرفها وقالو لي كلمي المديرة ترفدها على طوول دة م اسلوب طالبه ،شلته تلفوني وطلعتته إتصلته على أبوها،اول م رد قال لي صباح النور،قولته ليهو انت عملته شنوو مع لميس؟قال لي جات المدرسه؟قولته ليهو انت ضربتها؟قال لي في العمر دة لو م إتصرفنا معاهم كدة م بمشو،قولته ليهو تصدق وتأمن بالله م اتخيلتك تعمل كدة ولو كنت عارفه م كان إتصلته وحكيت ليك ،قال لي لمصلحتها،قولته ليهو لمصلحتها تمسكها تضربها؟طيب سؤال انت جربته تقعد تسألها وتفهم الحاصل معاها شنو؟جاوبني جربته؟قال لي لا،قولته ليهو طيب يعني على طول وقعته فيها ضرب؟ م فكرته في انو يمكن عندها مشاكل بالفعل وم قادرة تحكيها لزول؟؟انت فاكر انو الضرب وسيله علشان تحل بيها مشكله يعني؟انت ي دووب كدة عقدتها زيادة ندمتني بجد على اللحظه الفكرته أتصل عليك فيها ي ريت لما ترجع تحاول تقعد معاها وتحاول تفهمها من غير نقاش بتك م صغيرة بس في عمر صعب شديد وفي العمر دة ي إما كسبتها وخليتها تمشي في طريق مستقيم ي إما خليتها تمشي غلط وفي كل الحالات النتيجه بترجع لي إسلوبكم معاها يلا سلام وقفلته في وشو الخط،،،ياخي بجد قهرني وانا إتهزاته بسبب تصرفو الغبي دة😡💔المساء رجعته البيت مغيوووظه وزعلانه زعل حكيت لي عمتو،قالت لي عاد إتلومت معاك😂😂😂💔قولته ليها بالجد البت قليله ادب لكن غلطانه انا البتدخل في مواضيع م بتخصني مالي ومالها انشاءالله تولع بجاز😕👊قالت لي اي دي قله ادب بنات فارغه ساي اصلا دي نهايه الدلع،،مشيت الحمام قعدته اعاين في وشي صراحه اول مرة أتعقد من وشي مع انو م كان في شي بهزني😥💔تاني قولته لنفسي هي ي شهد دي واحدة قليله ادب سااي اااهم شي القناعه والثقهه 😌💪سمعته تلفوني بتصل طلعته شلتو لقيتو معتصم قولته ليهو اهلين❤قال لي مساء الخير،قولته ليهو النور مالك عندك إلتهاب ولا شنوو؟قال لي لا والله قرفان بس،قولته ليهو قرفان من شنوو بس!!سكت مساافه قال لي ماف شي انتي كيف؟قولته ليهو لا بجد في شنوو؟قال لي شهد قولته ليك ماف شي اقفلي خلاص،قولته ليهو طيب راحتك ،قال لي تصبحي على خير ،قفل مني على كدة،ي جماعه انا عاملني ملطشه اي زول بكفتني بإتجاه😕👋نمته نص الليل تلفوني إتصل صحيت مخلوعه شلتو ورديت،قال لي ألو السلام عليكم؟قولته وعليكم السلام منو معاي؟قال لي معاك والد لميس ،قولته ليهو اهاا اهلين خيير انشاءالله؟قال لي لميس معاك؟قولته ليهو نعم؟قال لي عليك الله لو معاك م تحاولي تكزبي علي،قولته ليهو وأكذب ليه والله م معاي ليه في شنوو؟قال لي م جات راجعه البيت اليوم،قولته ليهو كيف يعني م جات راجعه ؟قصدك من المدرسه م رجعت؟قال لي ايوة،قولته ليهو طيب جربته تسأل صحباتها واهلكم كلكم؟قال لي م خلينا زول م منها خبرر بس ربنا يجيب العواقب سليمه وقفل الخط،والله فجاة قلبي وجعني ضميري أنبني لأنو البت دي لو حصلت ليها حاجه حأكون أنا السبب في كدة،رجعته اتصلته على أبوها تاني قولته ليهو وين انت حاليا؟قال لي في الشارع ليه في شنو،قولته ليهو عاين انا ساكنه الطايف شارع....رقم بيتنا.... تعالني جنب البيت عشان حأطلع أفتش معاك،قال لي لالا ماف داعي،قولته ليهو لا في دواعي حتى لو قعدته م حأقدر انوم ممكن تجي؟بعد نص ساعه اتصل علي قال لي انا قريب عليك بس م عرفته وصف البيت ،قولته ليهو طيب انا حأقيف ليك في الشارع الرئيسي ،لبسته توبي وغسلته وشي سريع سريع وطلعته حتى م كلمته عمتي والشارع كان ضلام غير صوت الكلاب والعربات الماشه ماف شي، وقفته في الشارع والله برجف من فوق لتحت وم حصل طلعته من البيت في زمن زي دة ولا بالغلط ابوي حدو الأقصى الساعه7 ،شويه كدة جا وقف العربيه في البدايه م عرفتو الا بعد م اتصل علي قال لي موقف العربيه انا مشيت سلمته عليهو وركبته العربيه،قولته ليهو شايف دي ردة الفعل السلبيه الأنا كنت بتكلم ليك عنها من تصرفك،قال لي طيب أعمل شنو يعني؟م كان في يدي شي أعملو غير كدة،قولته ليهو لا في،في حاجه اسمها تفاهم هي عمرها دة محتاجه يتكلمو معاها براحه اخدها على قدر عقلها بس اسي دة م وقتو المهم هي تتلقي بسلامتها والباقي محلول بإذن الله،ياخي فضلنا لافين في الشوارع الليل كلو وكل شويه بتصل تلفون على زول بقول ليهم إتلقت؟او جات؟بقولو ليهو لا ،زهج وغضب غضب لدرجه انو قرب يعمل حادث،قولته ليهو دقيقه ماف سبب يخليك تزهج تمام؟الغلط كان منك انت ومن امها بالمناسبه وين امها من دة كلوو؟سكت ،رجعني البيت الساعه 6صباحا لقيت عمتو واقفه في باب الشارع قالت لي مشيتي وين انتي بي خلعه،قولته ليها اسكتي بس ي عمتو خلي ادخل واحكي ليك،قالت لي في شنوو ي بت؟قولته ليها البت طلعت خلت بيتهم وم رجعت تاني،قالت لي بت منوو؟😱قولته ليها الحكيت ليك عنها قبيل ياخ،قالت لي وانتي مالك ومالها انتي عارفه انا قضيت ليلي مساهرة منتظراك؟والله قولته الا كان عبدالله اخوي حاصله عليهو حاجه،قولته ليها عمتو كيف مالي ومالها البت طلعت بسببي انا لأنو لو م انا كلمته ابوها م كان حيضربها ولا كان حتطلع من البيت،قالت لي ويعني شنو ابوها ضربها في النهايه ابوها كلكم بدقوكم دق الحمير م شفنا واحدة فيكم طلعت خلت البيت،قولته ليها تربيه لتربيه بتفرق،قالت لي والله شليتي قلبي اسي من امس لافين كدة وامها وين البت دي بكون قلب امها إتقطع كرر علي،قولته ليها والله ي عمتو م عارفه شي انا حأمشي أصلي الصبح وأخد لي غمدة واصحى امشي المدرسه ،قالت لي م تمشي انتي اصلا م نمتي،قولته ليها لا م بقدر لازم أمشي،دخلته الغرفه صليت الصبح واخدته لي نومه شويه كدة وطلعته مشيت المدرسه،اول شي مشيت لي صحبات لميس شفته أقرب واحدة ليها منو سوقتها بعيد وسألتها حاولته اجرجرها في الكلام بس م استفدته منها شي،اتصلته على ابوها قولته ليهو طمني انشاءالله عرفتو عنها اي شي؟قال لي ابدا والله انا كان لقيتها بضبحها في مكانها وبخليها،قولته ليهو استهدى بالله دة كلام شنو كدة حاول استغفر وانعل الشيطان م بتتحل كدة اسي هي طلعت بسبب اسلوبك دة معقوله ياخ،قال لي ونعمة بالله وقفل الخط،،،نبرة صوتو كانت نبرة غضب وزعل تخوووف بجد،،،وانا راسي عايز يتكسر،مشكلتي الوحيدة اني لما اشوف مشكله حاصله قدامي م بقدر اتجاوزها لازم احاول اتدخل بأي طريقه واحاول احلها ولو م اتدخلته بفضل بفكر فيها وراسي حيطق من كترة التفكير فيها💔قولته كدة أمشي اشوف معتصم دة مالو كمان أمس،مشيت على مكتبو لقيتو ي داب جاي داخل،قولته ليهو صباح الخير❤قال لي صباح النور ،هو زاتو كان زهجان،قال لي خير مالك؟قولته ليهو مالي؟قال لي وشك م طبيعي ولا نسيت انتي من يومك خلقتك م بتتقابل😂😒قولته ليهو دة إستظراف يعني؟قال لي ااي،قولته ليهو منفسن مالك؟قال لي ماف شي والله زهجهه بس انتي م طبيعيه حتى صوتك متغير مالك؟قولته ليهو أمس م نمته والله،قال لي لييه في شنو؟قعدته أحكي ليهو بالحصل من البدايه في الأخير دموعي جات جاريه،قولته ليهو والله لو عارفه حيحصل كدة م كنت حكيت لأبوها اسي البت دي لو حصلت ليها حاجه ذنبها معلق في رقبتي ،قال لي انتي هبله؟انتي م عملتي حاجه غلط ولا شي ولا تحملي نفسك مسؤليه حاجه م عملتيها فاهمه؟رجعته البيت وحياة الله مسخت علي ااي شي وشيلتني هم،بعد المغرب إتصل علي معتصم،قولته ليهو مصدعه واخلاقي في مناخري لو عايز يتنرفزو فيك جرب إستظرف،،،قال لي شهد عايز اقول ليك حاجه!!!قولته ليهو في شنووو كمان؟؟قال لي والله ي شهد البت الأهلها بفتشو عليها معاي انا في بيتي...
#نتلاقى☺
