وصلنا رجعت شيرين لبيت اهلها يم امها واني دوختكم بخطوبتي المفروض القصه تحجي عن شيرين اقدم اعتذاري
...
شيرين من رجعت لبيتنا حسيت بالامان بس قلقتني
زيارة ام علي وكلامها ان اكو شي بيني وبين امجد رجعت اتصلت بامجد ثاني يوم بيتهم طلع اخوه كلي رجع لبغداد حتى يشوف خطيبته جنت فرحانه لامجد بس حسيت راح افقده كصديق واخ جنت احس بالامان وياه واحلى ايام من بقيت بشقته اتذكر سوالفه شلون واساني بعد مافقدت ابني ومن رجعت يم عباس ولزمونا الشرطه هو اجه طلعني شلون ملهوف من زعلت بالسياره منه جانت اكو دمعه محصوره بصدري تمنيت ابقى هناك بس امي واخويا لازم ارجعلهم اني صافنه نزلت دموعي بدون وعي
ام شيرين..ماما شبيج تبجين شيرين ويايه
شيرين..ها اي ماما تذكرت بابا الله يرحمه واشتاقيتله
ام شيرين..بنتي هسه شتكولين نبيع بيتنا ونروح
لطريق بغداد لو نروح لبغداد يم خوالج
شيرين..بكيفج ماما
ام شيرين ..بنتي البارحه بالليل واكفه بالمطبخ طلعت اذب الزباله يمكن شفت علي دخل بيتهم
شيرين..شنو مو كالت امه بالاردن
ام شيرين..جايز مطلوب ويخافون معلينا بيهم
شيرين..اي ماما بعد مستحيل نحجي وياهم
بالليل امي نامت واخويا كاعد اباوع فلم السهره دك التلفون مرتين تذكرت جان علي بدك مرتين شلت سماعة التلفون رحت لغرفتي انضربت الجامه مال الغرفه بحصوايه صغيره عرفت علي كلت هذا راح يبقى هيج خلي ارجع السماعه واشوف شيريد
رجعت السماعه ربع ساعه دك التلفون شلته
شيرين..الووو
علي..هلو شيرين
شيرين..شتريد احجي بسرعه ماريد بعد تتصل
علي..لازم تعرفين كلشي ارجوج انتي الوحيده اريد تفهمين اني الي بلغت على عباس علمود تخلصين
شيرين..بسببك اخذوني مشتركه بالجريمه وحبسوني لوما امجد اجه وطلعني
علي ..كافي امجد مسوى الي اني سويته ضحيت بنفسي علمود اجر شيرزاد ورطني بسببه ردت اخلص شيرزاد اني تورطت وياهم وكامو يهددوني وتزوجت بنت عمتج كله بسبب شيرزاد
شيرين.. لاتجيب طاري شيرزاد على لسانك فهمت ماريد تتصل بعد ارجوك انساني اني راح اقدم تعين واربي بنتي ونبيع بيتنا ارجوك علي اطلع من حياتي
علي...اعرف امجد حافظ عليج وجنت مطمئن وشفتك مره من رحتله للشقه ملكيته كلت انتضره شفتك نازله تتسوكين ومكلت لعباس ولا اهلج جنت مطمئن عباس وابوج هم دمروني
شيرين..كافي كذب ارجوك
علي..مكاعد اكذب ارجوج افهميني
شيرين..راح اغلق التلفون واذا دكيت والله افضحك كدام الناس ماريد اسمع سيرتك
