ماجدولين بنت أنيقة و زوينة ، عندها جمال طبيعي تباركلاه . العينين كباار و كوحل ، شعرها طويل و كحل تاهو و رطب ، لبشرة ديالها بيضا بحال لحليب و سنانها مستفين . هي من عائلة ميسورة الحمد لله هادشي لي خلاها تطلب زوج عندو إمكانيات مادية و كان الحلم ديالها تزوج طبيب . ولكن كيفما تنقولو : تجري المياه بما لا تشتهيه السفن ههه . تقدموليها يزاف ديال ولاد الناس ولكن باها مبغاش حيث كانت مزالا كتقرا
ماجدولين قرات حد لباك ، واخا هكاك مكملاتش و هانتوما غاتعرفو علاش ، و حتى كون كملات ، مكانوش عنندها طموحات كبيرة و كانت مغرورة ، كاتقول هادا لي غايخطبني ، خاصو يسكنني فشي بلاد أروبية ، المهم ماشي فلمغرب ، مانعودليكمش شحال كان عاجبها راسها ولكن لي كان مزيان فيها هو أن أخلاقها سامية و مربية تربية حسنة (من غير الغرور لي فيها) عمرها ما خرجات الطريق ولا تصاحبات . كيقولو الفلوس وسخ الدنيا ولكن عائلتها واخا غنية ، كانت محافظة على الاستقرار ديالها و كلمة باها مطيحش للأرض ، عمرهوم ما كالوليه لا على شيحاجة واخا هكاك، كانت علاقتهم معاه وطيدة و لأسرة كلها ملتحمة . نسيت ما كلت ليكم ، باها عندو معمل ديال الصناعة التقليدية ، كيصدر داكشي لبرا . كانو هما ساكنين فكازا ، وراكم عارفين ، كازا يا كازا لي مشا ما جا كيما تيقولو هه ، هو كدينة ولاافة و صعيب بنادم يتخلا عليها
