شفت داك ياسين ولا ياسر ولا معرفت الفضيحة لي تضربو إن شاء الله مبتاسم و عاجبو الحال تهجرو إن شاء الله . مرة وحدة شفتو فعينو ، كرهتو :الله ينعل الزواج لي يجي من جيهتك يا اللصقة بت داك الليلة بلبكا و ما جا طل عليا حد لا ماما ولا بابا ولا خوتي ، تصوروا حتى دادا ماجاتش تشوفني ، صافي حسيت براسي عبئ بحالي بغاو يتخلصوا مني . فين دوك لواليدين لي حاطيني فعينيهم ؟ ثافي دغيا لاحوني هاد اللوحة ، ناري الدنيا كي تقدر تقلب عليك بين عشية و ضحاها . بقيت علا هاد الحالة 3 أيام غير لبكا ( أنا ماشي من داك النوع لي فهاد الحالات كيبقا بلا ماكلة أو شراب هه واخا تكون واصلا في العظم ، منفرطش فكرشي) كنت كنمشي فليل ناكل تا نشبع و هما يسحابلهم راني كالسة 3 أيام بجوع . صافي عياو ما يصبرو و هما يهجمو عليا كاملين واحد النهار جات ماما من جيهة و بابا من جيهة خرا . غير شفتهم ، مقدرتش نحبس الدموع . قالتليا ماما البنت طوال العمر ولا قصار ، مصيرها الزواج ، و مزيان نزوجوك صغيرة باش تولدي و إن شاء الله تعيشي بزاف مع ولادك -عند الحق أماما ولكن هاد بنادم ..قطعني بابا : هداك راه قريب و يولي راجلك ، احتارميه . مديتهاش فيه و كملت -هداك خينا مغمرني معرفتو و هو أصلا معجبنيش . عييت منرغب و نتمسكن عليهم و لكن كانوا قاصحين معايا فهاد القضية
