رؤى_المهدي 💕

الجزء 3 ❣

بينما هو كان يفترسني بعينيه ربي السلامة ، نطق باباه ، و شفت جيهتو كان كيبان عليه الوقار و الصلاح ، و بشوش و ظريف بزاف و عندو اللكنة الفاسية ديك ال "ر" ديالهم حاضرة . سولني كيدايرة مع القراية و بلي مهدي جابهم على عين كفاهم كيجريو ن طنجة ، انا غرقت حتى الابتسامة تلفات لي ، فمي عواج ، شوية بابا قال ن خويا الصغير ، يدينا الجردة ديال الدار نجلسوا انا و مهدي باش نهضروا ، شفت ف بابا و انا مصدومة الله يا الوليد معامن تشاورتي ، شنو هاد البسالة و الزعامة ، الله يا الواليد دابا دخلوني من الجردة جثة .
سلمت امري لله و نضت رجلي مامحكماش فيهم غير غادة ، وصلنا ن جردة جلسنا ف واحد الموطع فيه طبلة و جوج كراسي فين طارو الكراسي الآخرين الله و اعلم ، جلسنا. و انا حاطة راسي ما قدرتشي نهوزو .
شوية بعد خويا مشا جلس بعيد ، حتى جئت نقوليه أجي ا البرهوش هذي هي الرجولة تخلي خيتك مع رجل بوحدهم ، بس ما ينفعش يا خواتشي .
صافي سي مهدي زعم و فتاتح الجلسة .
قالي : رؤى شخبارك ؟
قلت ليه بشوية : لاباس الحمد لله .
قالي زوينة طنجة ، واخا ماشي اول مرة نجي ليها ، بصح هاد المرة زيارتي ليها مبدلة.
انا ا البنات تصمكت ، بحالا هاضر مع الحيط .
شوية حس براسو مسخها ، و بدا كيسولني على القراية و داكشي . المهم بديت كنمشي معه ف الخط ، شوية بديت كنهز راسي و نجاوب و بدا التوثر يقل ، و بقات هضرة تجيب هضرة ، السيد راسو ثقيل ، و مالي انا ساهلة ليه ، حسّيت بالانسجام ، و عندنا أفكار متشابهة بزاف ، حتى بعض المرات ، كنسحاب راسي انا هاضرة .
ما حسيناش بالوقت حتى دازت ساعة و نص ، جا بوقال ديال خويا قالنا نوضوا بغاوكم مالين الدار .
نضنا و مشينا عندهم ن صالون لكبير تجمعوا العيالات و الرجال ، و بدات الهضرة ديال المعقول ، و قرروا انه نرجعوا نديرو نظرات شرعية اخرى حتى نقتانعوا ببعضنا ، عاد نخلص لقرار ، و ضربوا موعد العائلات من بعد ما نحددوا انا و المهدي امتى نتلاقاو .
صافي مشاو و رفعت الجلسة . خلا المهدي النمرة ديالو ل خويا .
و خلاني حائرة ف امره عجبني و لكن باقي الانطباع لي عندي عليه ما تبدلش بزاف .
صافي انا اجتهدت في الاستخارة و الدعاء ، حتى نرتاح و نتواصل معه باش نديرو النظرة الشرعية الثانية و منها نوجد مجموع الأسئلة لي عندي ..

يتبع...