كنت مضغوطة ب سوتنونس ، هاداك الأسبوع الأخير ، عيط لي واحد النهار مهدي و كانت اول مرة غادي يعيطلي ، قالي : سلام عليكم اختي رؤى شخبارك ؟ بغيت نقولك اننا يمكن خصنا نأجلوا شوية العقد عندي ظروف طارئة . انا مانكدبش عليكم تصرفقت ، قتلوا واخا ماشي مشكل ، حتى انا أصلاً مضغوطة و قطعت عليه .
مشيت قلتها ن ماما و انا مفقوصة ، و بانت لي مادارت حتى تعليق ، غير قاتلي و راه يمكن سيد عندو شي حاجة . آيه عرفناه حتى هو عندو لاطيز ديالو و لكن ما يعلبهاش علينا معلم و حنا منه نتعلم ، ظروف ما ظروف ، غير يشرح لينا بعدا ، يخ على بنادم .
صافي تأزمت الصراحة لأنني كنت كنستنى داك العقد لي برمجنا نديروه ف المسجد ، و حجزت المصورة صاحبتي و شربت لاغوب لي غادي نلبس ، ايلا لاحظتوا انني كنلبس غير لي غوب ماشي القفاطن لانه ما يصلاحش انني نتحزم فاش تكون الدنيا مخلطة و لاغوب كتجي أحسن مع الإسدال .
حطيت داكشي على جانب و ديتها ف سوتنونس ديالي و قلت ن بابا يخبر الإمام ديال المسجد اننا ما غنديروش العقد هاد الأسبوع باش ما يتبرزطش يقادو الجامع .
صافي تعصبت ، و الاعصاب خلاوني نعصر ف قرايتي ، مولاي المهدي ضاربها بغبرة ، قلت انا دابا يبان نهار السوتنونس ما يمكنش ما يجيش .
جا نهار الخميس نهار السوتنونس ، فقت مخلوعة كنت مبرمجة مع الاستاذ ندوز ف الصباح مع العشرة ، عيط لي قالي انتينا غتبقى حتى ل ستة تصدمت ، قالي عندو شي شغال.
وااااااااااع على زهر كل شي معكس ، عيطت للممول و لكاع المدعويين نخبرهم بتغيير الموعد ، الاّ المهدي خليه يجي مع العشرة و ما يلقانيش . ساعة دازت العشرة و السيد كاع ما عيط يستفسر يعني ماجاش أصلاً .
تأزمت ا البنات بزاف ..
صافي وصلات الرابعة لبست حوايجي مشيت للمدرسة كنقاد القاعة لي غادي ندوز فيها ، عيني غير مع التلفون ، كل شي كيعيط الا مهدي . تبّاً له ..
وصل الوقت بدات القاعة كتعمر ، المهدي الأثر ديالو ما كاينش ما غاديش يجي .
بديت و انا شادة البكية ، صافي دازت السوتنونس الحمد لله بخير و على خير ، عطاو الجيغي الاّراء ديالهم ، بديت كلمة الشكر ديالي ، شوية جات صاحبتي هازة طوق الياسمين حطاتولي فوق من راسي انا ما فهمت والو كل شي كيضحك . شوية بديت كنسمع " for the rest of my life " ديال ماهر زين ، و انا ما فاهمة والو ، جراتني صاحبتي طليت من الباب بانلي مهدي هاز الورد و صحابنا و صحابو و صحاب الجمعية و عائلته برة كيصفقوا ولله ا البنات ايلا حسّيت برأسي ف حلم ، مت يمكنش هادشي كيطرا غير في الأفلام ، بقيت جالسة ف بلاصتي ، و صاحبتي كدفع فية انا ما بقاش عندي الرجلين لي يزيدو ، والو ما قدرتش ، بديت كنبكي كنشهق و الخنونة تفو ههه ما حملتش راسي ، مهدي كيمون بالضحك ، قرب مني و قالي عنداك يسكت ليك القلب ، هادشي كان خاصك توقيعه من رجل كيقرا الكتب . ضحكت بلا ما نشعر خديت من عندو الورد . و قالي تبعيني بقينا غادين و الناس من مورانا وصلنا للمسجد ديال المدرسة ، الدخلة ديالو عامرة بالورد ، و صحاب مهدي هازين واحد اللافتة فيها تزوجي بيا عافاك .
دخلنا لقيت العدول جالس مع بابا و باباين مهدي ، دخلنا جلسنا حنا النساء اللور و الرجال القدام..
يتبع...
