صافي جا النهار المعلوم ، ما كنبغيشي نعاود ليكن كاع التفاصيل باش مانطولشي عليكم.
جا نهار السبت و انا صبحت مخلوعة ما قادراشي نأكل و لا نعمل حتى حاجة ، مشيت ن زيانة صايبت شعري حيتاش ما عنعملشي الفولاغ حدا يماه و العيالات ديال عائلتو حتى ندخلوا عند الرجال و نعمل الإسدال ديالي .
عملاتلي شوية ديال المكياج كيف قلتلكم ، و رجعت ن دار ، جات النقاشة عملاتي صبع د الحنا انا و بنات د العايلة ديالنا . الصراحة منين تجمعنا ما بقيتشي مخلوعة . فرحوني ، قرب الوقت ، نضت نلبس و انا مخلوعة ، بدات كتعمر الدار و كنسمع صوت الناس ، شوية سمعت صوت الزغارت جاتني السخفة قلبي بدا يضرب يضرب ، شوية سمعت صوت كيقرا القرآن صوت زوين بزاااااااف .
شوية جاو خرجوني صحاباتي و بنات عائلتي خرجت مشيت عند العيالات و جلست حدا يماه ، و عرفاتني على عائلتو ، و فرحوا بية بزاف ، داز الوقت تعشينا ، و جات عندي ماما قاتلي نمشي نلبس اسدالي ، مشيت مسحت الماكياج واخا كل شي بغا يقتلني ولكن امبوسيبل دنيا كانت مخلطة ، و خرجت باش يدخلو الرجال و معهم طبعا المهدي ، قلبي كان كيضرب كيضرب و مخلوعة بزاف ، بقيت مهبطة راسي ، و صديقتي ايمان المصورة كتعيط لي باش نتبوزا و انا كنخنزر فيها ، وقت تبوزاج هادا ماحشمتيش ؟
دخلوا الرجال و انا برا العالم ، مهبطة راسي و وجهي ألوان ، حسّيت بالبلاصة حدايا عمرات ، و طلعات معايا ريحتو ، دخت البنات ، تبوريشة ، حتى هو مهبط راسو و قالي بشوية السلام عليكم اختي رؤى ، ديك ساعة واخا يقولي ماما رؤى دونيا هانية غير سير بدل البلاصة غادي نتختق كبيتي عليك قرعة ديال الريحة .
بدينا كنتصوروا مع العائلات و حسّيت ب راسي مهمة ههه ( الضسارة ) صافي بداو زوج بعلوكات صغار لابسين تكاشط و نعالة ديال الميكة و شعرهم طالع للسما و العكر د ماماهم خارج ليهم من الفم و داخل ف النيف و الحناك ، ما فيهم كاع البراءة ، كيتلصقوا ف مهدي ، عمي عمي ، و ما بغاوشي ينوضوا من وسطنا حيتاش أصلاً كان ليصباس بزاف بيني و بينه يقدر يدوز طرامواي ، المهم صدعوا لية راسي ، و صدعاتني صاحبتي ايمان كتغمزني باش يحيدوا خرجوا لينا على التصاور ، و المهدي فرحان بيهم الله يعميها ل شي واحد ههههه .
يتبع...
