رؤى_المهدي 💕

الجزء 15 ❣

بداو كيدوزوا الأيام و انا مضغوطة بالتحضيرات ، و المهدي غادي جاي ن طنجة . و عائلته كيجو عندنا نوبة نوبة .
واحد النهار خارجين انا و مهدي مشينا ن بحر و جلسنا ف الليل و كيعاود لية الخزعبيلات ديالو و انا عاجبني الحال. واخا كيبقا بعد المرات يخربق علية و شي موضوع ما فاهما فيه حتى لعبة كنعيش ، داك النهار كان الجو شوية بارد واخا الصيف ، حسّيت برأسي شوية كيضرني ولكن عادي ، تمشينا ، شرالي كلاص هههه ، التهمته .
صافي وصلني للدار . السعادة الابدية مشا يتلاقا مع ربيع .
انا دخلت للدار ، لقيت ماما جابت لي حوايجي من عند الخياطة ايه ، كانت باقيا شهر بالضبط على العرس ، فاش جئت نشوف الحوايج لقيتها خسراتهم لي لا علاقة مع داكشي لي بغيت و الاثواب شريتهم غاليين تعصبت تعصبت بديت نغوت نغوت ، و ماما كتصبر فية .
و قررت نرجعهم ليها كاملين و توثرت حيتاش العرس قرب .
شوية عيطات لي ايمان صاحبتي كتقولي ان واحد صاحبتنا دارت حادثة سير و راها كوما ، انا ديك الساعة ، تخلعت و تصدمت .، و بكيت شحال و قررت غدا نهبط ن الرباط باش نمشي نشوفها ، عيطت ن مهدي قلتهالو و جا عندي و شحال و هو كيسكت فية هو و ماما ، ديك صاحبتي عزيزة علية بزاف .
صافي نعست غير بزز حتى مت من البكا .
أذن الفجر عيط لي المهدي باش يفيقني نضت كنحل عيني بصعوبة العين اليسار ما كتحلش لية ، شوية كنحس بوجهي بارد بارد و الجهة اليسار مكنحسش بيها ، بحالا ما كايناش و ثقيلة ثقيلة ، كنجي نعيط ن ماما ما كنقدرش نطق ، بقيت كنبكي و عيني اليسار ما كتحلش و فمي عوج .
صافي صيفطت ن ماما مسج ماما ، ماما كانت كتصلي و نا شافتش المسج ، فاش شافتني ما نضتش جات عندي سحاب ليها ما فقتش . طلت علية لقاتني كنتمتم و كنبكي و صوتي مخنوق حيتاش ماقدراش نهضر . شعلات ضو و هي تخلع .
وجهي عوج و عيني مسدودة . ماما بقات تغوت . مالك رؤى مالك ا ويكي ؟
بقات كتبكي و انا مخلوعة شوية حسّيت برأسي داني نعاس و لا غبت ما عرفتش .
شوية كنحس راسي ف بئر و ف ظلام و شي صوت كيوصلني من بعيد ، صوت المهدي كيقرا القرآن .
شوية الصوت ما بقاش يتسمع . وليت حسّيت راسي نعست .
شوية كنحس بيد باردة على جبهتي ، و كنسمع نفس الصوت ، بدا الصوت كيجهاد ، بديت كنفرز الآيات ، بقيت كنفكر أينا سورة هذي و كندير مجهود حتى عرفت انها سورة الحديد ، بديت كنحل عيني شوية بشوية واخا خايفة مانقدرش نحلهم .
حليت غير عين وحدة الاخرى ثقيلة علية بزاف . بانلي مهدي حدايا كيقرا القران و يديه فوق جبهتي ، شفت فيه قالي رؤى ، رجعات مشاتلي الصورة و ما بقيت عاقلا على والو

يتبع...