جا المهدي لعندنا للدار جلسنا ف صالون ، سلم على واليديا ، ناضوا و خلاونا بوحدنا .
المهدي كان جايبلي كتاب ، عطاهني قالي قرايه و ردي علي . زرب علي زعما بدا يحزرني ، و بدا كيهضرلي على الكاتب ، الكتبات ديالو و داكشي . صافي بدينا كنهضروا ، و زاد الانسجام ، و موضوع يأخذ موضوع ، دازت ثلاثة ديال السوايع ، طايرة ، ما حسيتش بيها كاع ، استأذن و مشا ، و خدا قلبي و عقلي وتفكيري معاه ، هاد المرة خدا النمرة ديالي باش ما يبقاش كل مرة مبرزط خاي ، الحمد لله انك فهمتي رأسك .
صافي بدا مرة مرة كيصيفط لي مسج يقولي فيه بالحرف " السلام عليكم اختي رؤى كيف حالك ؟ يسر الله امرك و فتح عليك في الدراسة ، لا تنسي أذكار الصباح و المساء . موفقة " . كيصيفط لي هاد المسج كل نهار ورا الفجر ف نفس الساعة ، شكيت انه كيدير ليه ع النسخ ، انا فاش كيقول لي الطنطون د راسي نجاوبو راني كنجاوبوا و مرة لا .
و لكن راه صعيبة ا البنات ان كدوز عليك لحظات صعيبة ف حياتك و تبغي تعاودي ليه و لا تكوني فرحانة و تبغي تقاسميه الفرحة و لا تبغي تشكي ليه و ما تقدريش تهزي تلفونك و تعيطي ليه ، يعني كاين راجل ف حياتك و ما كاينش ، حتى كنشوف الخاتم ف يدي عاد كنتفكر انني مخطوبة .
كنت كنقيل ندعي الله يثبتني ، كنّا كنتشافوا مرة ف الشهر ، مرة ف دارنا مرة برا و لكن ديما ديما معنا المحرم ديالي .
واحد النهار جالسة كندير انسبيكسيون ف الفايس بوك ديالو و هي تبان لي واحد خيتي عاصرة عليه ب لي جيم و لي كومونطيغ ، اي منشور راها مسجلة الحضور .
دخلت لفايسبوك ديالها كنلقى عبد الحق ، عفوا المهدي حتى هو كيجيمي ليها ، و كيكومانطي لي سطاتي واخا ماشي شي كومونطيرات ولكن غير مناقشة. ياااااااك ا المهايدي يااااك ا اكبور كتخوني ف كومونطيرات .
ايوة ا البنات ركباتني قبيلة ديال الجنون ، تعصبت ، تعصبت ، غرت غرت ، ديجا انا محرومة من الحنان و المشاعر ديالو تجي هاد خيتي تصدع لي راسي ؟
نو نو نو .
نضت على وعدي و سعدي و يا ربي تسمح لي . درت فايسبوك جديد ، دخلت فيه ليزامي جداد ، تابونيت لمهدي و ل هاديك خيتي ، بديت كنتقرب منها ، شوية ب شوية ، حتى ولينا كنتراسلوا و خايضين في المحادثات .
آيه و نسيت نقولكم ، هو خدمت معه البرودة الصاقعة ، سي فيني الاجوبة على لي ميساج ، سي فيني لي غون ديفو ، انا مشغولة ما دويش معايا ندير لي بغايت .
ايوة شنو قالي الطنطون د راسي نعمل ، كانت واحد الرحلة منظماها المدرسة لي كنقرا فيها ، للصحراء ، و صحاباتي كلهم غادين ، نضت انا حجزت معهم و قررت نمشي ، و ما فكرتش للحظة انني خصني نقولها ل مهدي ، أصلاً ما عندوش الحق يحكم في ما راجلي ما حتى حاجة.
يتبع...
