فاعل خير (الجزء الثاني)

بارت 5

#فاعل خير الجزء الثاني
#بقلمي طيبة الربيعي
البارت الخامس

(للكاتبة طيبة الربيعي)
ام سامر: اسم الله عمة شبيج شالقضة
حجيتلهة الصار كالت اني احاجي معليج
وسدتة
نوال: هذا تخبل رسمي
نبأ: مخبل هو مخبل، شلة دخل بية بعد اريد افتهم
نوال: اريد اعرف علة شنو اطلكتو، اذا هلكد يحبج وتحبي عليمن الطلاك
ماكدر احجيلهة وانزل من قدرة
الاهانة صعبة ماكدر اتقبلة بحياتي بعد
بليل اتصلت بية ام سامر
جاوبت من اول دكة
نبأ: الو عمة
ام سامر: الو هلو نباوي، عمة السويتي انتي مو صح مو لان ابني تعرفيني حقانية بس عندج بنية وتتزوجين؟ صدمتيني يا نباوي اتوقعهة من اي وحدة بس مو منج، مو كافي تحركين بكلبة ندمان وليدي عالحجاية الطلعت منة لتكبرين الموضوع ورجعي اذا مو لخاطر حبكم لخاطر كَمرة ترة انتو مو زعاطيط كبار ومثقفين المن كل هل مشاكل المالهة داعي(للكاتبة طيبة الربيعي)
كمت ابجي: ماريد اتزوج بس هو جبرني احجيهة، لا اريد اتزوج ولا ارجعلة طلع من كلبي اريد اعيش البنتي والنفسي عمة الله يخليج حاجي اريد كَمر مو يحرمني منهة
ام سامر: حجيج مال مزعطة نبأ عمة عقلي شجاج داكلج كبري عقلج ورجعي لخاطر بنتج، اطيح حظة اذا يحرمج منهة بس انتي غلطانة كبرتي الموضوع سويتيهة مشكلة جبيرة، اذا كبرت اكثر صدكي مراح تنحل بأي طريقة واتذكري كلامي زين عود
سدتة بوجهي، كاعدة بيدي الفون وصافنة
شصار بحالي كلهم صارو ضدي
صيرو ميهمني المهم الله وياية ويعلم بحالي
حلفت يا سامر اندمك ولا ارجعلك لو مدري شيصير
سواياتك صارن مو قليلات
خليهة كَمر يمك بسيطة(للكاتبة طيبة الربيعي)
سامر ...تخبلت من أحمد كلي نبأ انخطبت
كتلة منو خطبهة كلي وحدة وياهة طالبة
رايدتهة لاخوهة واخوهة منعجب بيهة
صعدت الحرارة لراسي
مو كافي فراك طيحت حظي
ابقة افكر بيهة اني! رجال عندي شغل والدنيا
كلهة فوك راسي
افكر بيهة بشغلي بكَمر باهلي
منين اجيبهة اني لخاطر الكعبة
رحت للبيت شايط ردت اسحلهة سحل
بس من كالت اوافق عناداً بيك كلت هاي هية
تتزوج يطبهة طوب بس اندهة والله
تخبلت وبساعتهة شكو فكرة
سودة اجت ابدماغي نويتلهة المنية
اخذت كَمر تبجي وتصيح ماما
حرت شلون اسكتهة
اخذتهة اشتريتلهة سكتت
بس ضلت تشهك صارت حمرة
فريتهة شوية خليتهة تتونس
بس شنو البداخلي
مايعلم بي غير ربي
رديت للبيت استلمتني امي
ام سامر: شصار ليش جايبهة
سامر: تريد تتزوج الخاتون ماتدري بية مشيطن اخليهة تتمنة الموت(للكاتبة طيبة الربيعي)
ام سامر: شعليك انتة بيهة، شنو فلمك خليهة تتزوج قابل تبقة عليك
فورت دمي
كمت اصرخ: هو شنو قابل تبقة عليك! اي تبقة علية مادام بنتي يمهة تبقة علية! يمة شو انتي عاجبج الوضع حتة انتي ماتدرين بنار كلبي!
ام سامر تحاول تهدي: يمة شبيك كبيت منو كلك اني عاجبني الوضع بس متريدك البنية هذا هو ليش متتقبل الواقع، خليهة تشوف حياتهة
سامر: خوش خليهة تشوف حياتهة بس تحلم تشوف كَمر، بنتي اني اربيهة تولي هية عسى ما الجهنم
اخذت كَمر وصعدت اجت فاطمة تلعب وياهة
طلعت ادخن اجة صالح
صالح: كول يا الله خوية شجاكم
سامر: روح مني صالح واصلة لزردومي
صالح: اذا تريدهة ليش مترجعهة، ترة نبأ تحبك بس تكابر(للكاتبة طيبة الربيعي)
سامر: خليهة تكابر خليهة لحد ما اطيح حظهة
صالح: خوية اذا نجي للواقع ترة ما الك اي سلطة عليهة
باوعتلة تمنيت اطفي الجكارة بحلكة
بس كلامة صحيح
صالح: اي لتباوعلي هيج، مو علة ذمتك حتة ترجعهة، عندي فكرة الة بشدة
سامر: اطربنة
نبأ ...يومين اخابرهم محد يجاوب
اتصل بعمتي مجاوب بمرة صالح مجاوب
اتصلت بي هم ميجاوب
ادزلة رسائل ولا يجاوبني ولا عبالك موجودة
نويت ادخل عمي بالموضوع بس
اندك الباب ساعة 1 الظهر
وحدي بالبيت
صحت: منو؟(للكاتبة طيبة الربيعي)
سامر: فتحي اني
فتحتة كبل، شفتة شايل كَمر
شافتني طفرت لحضني اخذتهة بوستهة
نبأ: يمة فدوة اروحلج
تضحك فدوة الكلبهة
بيديهة نساتل ام بطن
باوعت لسامر مبتسم وكاشخ احسن كشخة
سامر: شنو تخلين الضيف عالباب
نبأ: روح بلة ضيف بلة بطيخ يكفي الهبطة السويتهة بية
سامر: نباوي اعتذر عالسويتة صدكي من حبي الج وغيرتي عليج، بس هاي هية اذا صدك طلعتيني من كلبج وتتحملين غيري يلمسج ويداريج براحتج، تضلين ام بنتي وحبيبتي ماطلع بطريقج ولا اعيق حركتج، لان احبج اتمنالج السعادة(للكاتبة طيبة الربيعي)
رغم هل شي راح يأذيني بس مادام نسيتي حبنة ونسيتي شلون بديت احبج واتعلق بيج هذا هو
ضرب علة صدرة: يضل هذا مكانج ماتصيرلة مرة غيرج
دققت بعيونة، كلامة فاجئني وخاصة هداوتة
يحجي وكلامة جاد
معقولة سامر يقبل اتزوج غيرة
اي ليش اتفاجئ هو ميحبني كوة خوما كوة
نبأ: روح سامر الله وياك
ردت اسدة لزم الباب: نبأ خليهة ابالج اني مو بس احبج اعيش علة ريحتج واموت بيج
باس كَمر وراح، دخلت مصدومة بالحجا
مكدرت اوكف علة حيلي(للكاتبة طيبة الربيعي)
طريقة كلامة وعطرة وكشختة
اذا صدك تحبني ليش جنت تجرحني
ليش من خسرتني يلة بدة لسانك الحلو يطلع
وافعالك الحلوة تطلع
ليش من يفوت الأوان اطلعولي
ورة كم يوم رحت زرت اخوتي
شبعت بجي وياهم سامحتهم بس كتلهم
مالي شغل بنسوانكم
تريدوني لتدخلون نسوانكم بيناتنة
استغربت بتغييرهم
شلون متغييرين للأحسن خاصة سعيد
يوكلني بيدة، سودة اعلية كلبنة طيب
بس دخلن الحياية بيناتنة
شكلهم صاير يخوف تعبانين مو اخوتي الكشخة
مؤيد جانت كشختة ينحلف بيهة
وعطرة اربعة وعشرين ساعة تارس البيت
هسه كل هذا بح(للكاتبة طيبة الربيعي)
بليل وصلني سعيد بوسني وكال اي شي تحتاجي
احنة اخوتج موجودين
كتلة سلامتك ماريد غير سلامتكم
ثاني يوم الظهر اجة سامر
سامر: اريد اخذ كَمر اطلعهة اذا ماكو اشكال
نبأ: اخذهة، هسه ابدللهة
سامر: ليش متجين ويانة
نبأ: لا شكراً تونسو انتو اني عندي شغل
سامر: براحتج
اخذهة وراح، ضربتلي صفنة
معقولة هذا سامر لو اني غلطانة
دك فوني، روى
مجاوبت
دزتلي رسالة
"نبأ الله عليج جاوبي لج والله محتاجتج احمد طلكني"(للكاتبة طيبة الربيعي)
كبل خابرتهة، هذا شبي تخبل
نبأ: الو
ورى تبجي: الو نبأ، طلكني احمد طلكني
وتبجي
نبأ: لج شنو طلكج ليش شصار
روى: فدوة اخذي تكسي وتعاي راح اسوي شي بحالي والله
نبأ: ويم انتي
ورى: وحدي بالبيت اخذ توفي (ابنهة: مصطفى يدلعو توفي) وطلع، لج نبأ تعاي والله محتاجتج
نبأ: لج وين اجيج خل اخابرج عمي اوكفي
سديتة منهة واتصلت بعمي
نبأ: الو عمو(للكاتبة طيبة الربيعي)
عم نبأ: هلا عمو هلا بنباوي
نبأ: هلا بيك عمو، عمو ماريد ازحمك بس صديقتي واكعة بشدة ومحتاجتني اذا متصير زحمة عليك تكدر تجي تذبني يمهة
عم نبأ: صدك جذب عمو تدللين، هسه بس ابرد السيارة واجي
نبأ: ماشي عمو شكراً
سديتة ورحت بدلت، لبست بنطرون كيلوت
وفوكا بدي بردان اعراض
لفيت شالي ولبست الجنطة والحذاء
وكعدت انتظر
شوية ورمشلي(للكاتبة طيبة الربيعي)
طلعت سلمت عليه وبوستة
شغل السيارة وطلع
عم نبأ: خير عمي خوما طلابة سودة
نبأ: لا عمو شي بسيط، ليضل بالك
وصلني وكال امر عليج من تخلصين بس رمشيلي
كتلة ماشي، دكيت الباب
طلعتلي عمتهة سلمت وماعرف شنو
كتلهة جاية علة روى اريد اشوفهة مشتاقتلهة
رحبت بية، بس الظاهر متعرف لان شكلهة
جان طبيعي، وصلتني للغرفة وراحت
دكيت الباب فتحتلي روى(للكاتبة طيبة الربيعي)
شمرت نفسهة بحضني وتبجيييي
دخلت وسديت الباب
طبطبت علة ظهرهة
روى: لج طلكني رمة علية الطلاك
كعدتهة عالسرير وكعدت بصفهة
مسحت دموعهة: ميفيد البجي فهميني شصار
روى: صارلي ايام ساكتة بس بداخلي افور يعني اني احجيلة ويحلفلي ميحجي، هو يجر لساني تالي يروح يخرط كلشي لسامر
نبأ: هسه مفتهمت ليش رمة عليج يمين الطلاك
روى: تعاركت ويا ورفعت صوتي عليه
نبأ: وشكتيلة
دنكت(للكاتبة طيبة الربيعي)
نبأ: روى شكتيلة
روى: انتة لو رجال متطلع اسرار بيتك
شهكت: عزة العزاج، مو اني اعرف لسانج يشتغل رشاشة حرام مو بنية
رجعت تبجي
نبأ: اووف سكتي لتبجين جفصتي بيهة، احمد يحبج ومن حركة كلبة سوة هيج، وبعدين انتي حامل طلاكة باطل
روى: اي بس عصب علية كلش خايفة
نبأ: لعد ليش مخفتي من شغلتي البيكيسي، لزمي لسانج روى احمد يحبج لتضيعي بلسانج هذا
روى: اووووف ربي، كلة من وراج انتي وذاكة
نبأ: ياا واني شعلية
روى: درجعو البعض عاد تعبتونة وياكم، هذا يكلب علية علمود صديقة واني اكلب عليه علمودج مرمرتونة(للكاتبة طيبة الربيعي)
نبأ: دسكتي لا اكفخج
روى: هسه اتصل بي ميجاوب وين اخذ الولد وراح خايفة عليهم
نبأ: لتخافين تلكي وية سامر، واني اكول ليش اخذ كَمر وطلع
روى: وين اخذهة
نبأ: عساس يطلعون، اخذهة وراح
روى: ددكي عليه طمنيني فدوة
نبأ: انجبي
روى: لج نبأ بداعة كَمر عليج والله كلبي نار عليهم ثنينهم
نبأ: روى ليش تحطيني بهيج مواقف
روى: لخاطر توفي بداعة كَمر عليج
نبأ: هففف امداج
طلعت فوني ودكيت عليه
جاوب ويمهم اصوات عالية
سامر: الو
نبأ: الو(للكاتبة طيبة الربيعي)
سامر: ها نبأ محتاجة شي
نبأ: لا حبيت اطمن علة كَمر، شدتسوون
سامر: كاعد وية الولد بالمنتزه وكَمر تلعب وية توفي
نبأ: ماشي يلة من اجيبهة كلي
سامر: انشاءلله
سديتة: اي وياهم
جرت نفس: الحمدلله ياربي
نبأ: من يرجع راضي واعتذري منة هل كلمة كلش محلوة وتعتبر اهانة الرجولتة
اذكرت من سامر هاني
صعب انسة هل لحظة
روى: انشاءلله امداني من حجيتهة شفكرت، يمة اروحلة فدوة وين اكو برجولتة حتة سامر الأغم مو برجولتة
نبأ: انجبي لج(للكاتبة طيبة الربيعي)
ابتسمت ورفعت حاجبهة: وانتي شبيج نطيتي، مو عساس ميهمج
هذا حلكي مياكل نعل وينلصم
كمت: يلة اني اروح لتجفصين حتة متصيرلج مصيبة
روى: دكعدي شوية والله طاكة روحي مكابلة الحيطان
نبأ: ليش حمودي ابو الطلعات مخليج مكابلة الحيطان
روى: سكتي سكتي انخدعت، هاي بس ابداية زواجنة، ميخليني اطلع منا الي هنا حتة من اروح لأهلي ميقبل اطلع هناك
نبأ: شعجب ليش احمد من زمان يحب الطلعات خاصة وياج
روى: هسه يغار عشتو طلعت فضايحة، دكعدي خل نسولف والله ضايجة(للكاتبة طيبة الربيعي)
كعدت: يمة ترة مداعرفج من شوكت تحجين علة حمودتج
روى: لج شايفة استايلي برة، صايرة خرة من ورا، حرمني من البناطير يا تنورة يا عباية اسلامية، انوب ميقبل ضيق كلة عريض مثل دشاديش بيبيتي
ضحكت: ميخالف رجلج شعندج لابسة للغريب
روى: دنجبي غير كشخة النفسي خوما اطلع مرعبلة
سالفة اجر سالفة لحد ما سمعنة صوت احمد
دخل توفي يركض بوستة باسني وطفر يبوس بأمة
شوية ودخل احمد
اوف صارلي شكد مشايفتة
شافني تفاجئ
احمد: هلو نباوي شلونج
نبأ: هلو بيك احمد، الحمدلله وانتة
باوع لروى ورجع باوعلي: الحمدلله، وين هل غيبة مشتاقين(للكاتبة طيبة الربيعي)
نبأ: تشتاقلك العافية ملتهية بالبيت وبكَمر، يلة اشوفكم بخير
احمد: وين وين دكعدي خل نشبع منج شوف
نبأ: لا والله لازم اروح اخاف سامر يجيب كَمر وماكو احد بالبيت
احمد: دكعدي سامر توة ذبني وكال راح ياخذ كَمر للمحل يردون يشوفوهة جماعتة
نبأ: اها تمام، بس صدك لازم اروح عندي كومة شغل، هم امر عليكم مراح اكطع
احمد: تنورينة بأي وقت نباوي انتي عزيزة
نبأ: تسلم احمد نوركم هذا
اتصلت بعمي شوية واجاني
العصريات رجعهة وهم نفس التعامل
حلو بشكل بس يخوف، الله يعلم شضاملي يا سامر
بس الله اليعلم هدوئك هذا مخيف بشكل
بليل خابرت روى كالت ميقبل يصالحني
ويكول بس اجيبين اطلكج علة هاي الحجاية
كتلهة خل يبرد شوية وحاجي هذا من يعصب
يكوم يشمر بالحجي ميعرف يتصرف
اوف يا سامر كلشي يذكرني بيك مع الأسف
مرت الايام سامر مخبلني بتعاملة(للكاتبة طيبة الربيعي)
يجي يجيبلنة غراض ويجيبلي الية همينة
ماحجي يعرفني ماخذهن بس يصر يحرجني
انمار مستمر باتصالاتة دائما يسأل علينة
والصراحة بديت ارتاحلة لان يكلي اختي
وعساس يرجعهة لمرتة لان يكول حبيتهة
وداشتاقلهة
الله يهديكم للصواب انشاءلله
نور اتصلت بية تكول مشتاقتلج
محبيت اردهة لان مهما يكون صديقتي
يعني هية اعتذرت مني ومتندمة عالماضي
ليش ماكون احسن منهة واسامحهة
بس سامر صعب اسامحة صعب
بس متزورني ولا ازورهة مجرد مكالمات عادية
شلونج شخبارج وهذا هو
بيوم شفت نوال مهمومة
احس بحلكهة حجي بس مترددة
تعشينة وخلصنة غسل مواعين وكعدنة
بالصالة نباوع تلفزيون
باوعتلهة صافنة(للكاتبة طيبة الربيعي)
نبأ: نوال شبيج شصاير
باوعتلي ابتسمت: لا مصاير شي
نبأ: الله عليج دكولي اني اختج مو غريبة
جرت نفس: ماعرف شأكلج يا نباوي، حيل خجلانة منج
نبأ: يااا علويش دكولي
نوال: زميلي بالشغل صارلة فترة يحاول وياية، بس دائما اصدة بس البارحة كلي راح ادز اهلي اني احبج واريدج علة سنة الله ورسولة ياريت توافقين
فرحتلهة من كل كلبي
نبأ: اي يا الله وشنو الي محيرج
نوال: شلون اعوفج وحدج، اعرف بابا موجود بس منو وياج بالبيت
فكرت بيهة صحيح شلون وحدي
بس ماكدر اوكف بطريق سعادتهة
البنية هم الهة حق تتزوج تشوف حياتهة
يكفي عمرهة صار بالتلاثينات وبعدهة
هم عندهة حق تخلف تشم ريحة الاطفال(للكاتبة طيبة الربيعي)

يتبع...🌺🌺🌺
ماعتقد مقصرة وياكم كل بارت انزلة مليء بالاحداث
والبارحة منشرت لان انشغلت واليوم عوضتكم ابارتين