فاعل خير (الجزء الثاني)

بارت 16

#فاعل خير الجزء الثاني
#بقلمي طيبة الربيعي
البارت السادس عشر

(للكاتبة طيبة الربيعي)
تبسمرت بمكاني، خليت ايدي علة ايدة
نبأ: سامر
جرهة: كومي كتلج
بقيت كاعدة ماعرف شسوي، ممصدكة هذا سامر
نزلت دمعتي، كمت اخذت دشداشة
ودخلت للحمام، فتحت المي وكمت ابجي
يلة صبري نبأ لحد ما الله سبحانه يفرجهة
تفهمي وضعة، رجلج تعرض لمواقف قاسية
ولضرب قوي اصبري وصيري قوية
لبستهة وطلعت ملكيتة بالغرفة
بالبلكونة يدخن، اريد اشوف جسمة
اريد اشوف الأذية المأذيهيا
تمددت واباوعلة شلون منتجي عالحديدة ويباوع
من البلكونة، بشنو تفكر شنو الي شاغل بالك
بس لو اعرف منو المسوي بيك هيج(للكاتبة طيبة الربيعي)
مارحمة وروح ماما، شوية ودخل
تمدد بدون ميباوعلي، واني منطيتة ظهري
ماريد احرجة او اضغط عليه
ثاني يوم فزيت علة حركة بصفي
فكيت عيني لكيت كَمرة حاصرة نفسهة
بيني وبين ابوهة، وسامر نايم ميدري بيهة
بقيت اباوعلهم ثنينهم
ليش كل المشاكل الصارت؟ بسببنة
بسببك وبسببي، من جنت ميبس راسك
اني لينة، وبعدين صار العكس
وهسه ماعرف شديصير اصلاً
كمت عفتهم نايمين ونزلت
عمتي وتقى كاعدات، ورة الريوك
صعدت لكيت كَمرة نايمة علة صدر سامر
وهو حاضنهة، الحمدلله ياربي اهم شي
علاقتة بكَمر، ماريدهة تفقد حنان الأب والأم
مثل مااني فقدتة، الظهر اجتي نور(للكاتبة طيبة الربيعي)
رادت تطمن علة سامر، طبعاً غرت
المفروض متطلب تشوفة يعني حسب الأصول
تسأل عليه اوك بس مو تطلب تشوفة
شفت عمتي ضاجت كلش حتة تقى
بعدين عمتي انفجرت عليهة
ام سامر: دتكلج الرجال ميريد يشوف احد وتعبان ليش مصرة تشوفي، نسيتي السويتي ويا لو لا ترة اني لخاطر نبأ متحملة وجودج ابيتي، اطمنتي عليه هذا هو روحي شوفي شغلج، كافي تمثلين صوج هاي الفاهية المصدكتج(للكاتبة طيبة الربيعي)
اوف يا عمة مناقصنة مشاكل، نور زعلت وطلعت
مالي خلك احد ابد
ام سامر: بعد مالج علاقة بيهة افتهمتي؟ هل بيت بعد متفوتلة
نبأ: مثل متريدين عمة
ماناقش بعد ما اكوللهة لا لان كلشي كالتة
صار، ماريد اثق بأحد تالي يغدرني
ونور الهة سوابق ميصير انسة هل شي
عالغدة نزل ياكل بس بصمت(للكاتبة طيبة الربيعي)
نحاول نغير وانلطف الجو بس ولا يمنة
اكل وصعد، ساعدت تقى بغسل المواعين
واخذت كَمر وصعدت، لكيتة نايم
تتهرب من واقعك بالنوم؟ ياريت الصار بية ولا بيك
زين اني شلون كدرت اخلي بيني وبينك حاجز؟
مرات افكر اكول شلون لو لا سامح الله
صاير بيك شي ورحت من ايدي؟
ماكدر اتخيل حالتي بوقتهة، يمكن اموت
بس ابطئ وبتألم، ياريت لو مو موتة عادية
تخلصني من هل كابوس المريع، كَمر طفرت
من حضني وركضت لسامر
صعدت يمة ودحست نفسهة يمة
تريد تكعدهة كتلهة(للكاتبة طيبة الربيعي)
بصوت ناصي: اشش ماما بابا نايم ميصير تكعدي
سامر: عوفيهة
يمة راح كلبي، ياريتني رحت فدوة الصوتك
ياريت ترجع مثل قبل
ترزلني تضوجني تغازلني
اي شي بس كون ترجع مثل قبل
دك فوني، باوعت روى
جاوبت كالت أحمد يريد يشوف سامر
وماعندة فون يتصل بي وسامر اصلاً
ماعندة فون اخذو الي خطفوهم، الله لينطيهم
كتلهة هلا بي اني هم اريد اشوفة(للكاتبة طيبة الربيعي)
سألتهة عن صحتة كالت احسن
بس يخاف يرجع لشغلة خاف يتعرضولة
روى: لج نبأ لو تشوفين شمسوين بحالة سودة اعلية، صار لحظة وحدة ميفاركنة يكول جان بيني وبين الموت شعرة ومافكرت غير بيج وبالجهال، حتة صلاة كام يصلي
نبأ: الحمدلله الله يهدي الجميع انشاءلله، وحسبي الله على كلمن يمشي بهل طريق ويأذي العالم، شوكت يجي؟
روى: فد شوية بس يبدل، خبري سامر عود
اكول بكلبي هو سامر بيا حال
ميتحاجة، بس فكرت اذا اجة احمد
يجوز يكدر يحاجي، لان يحبة ويثق بي كلش
نبأ: ماشي حبي(للكاتبة طيبة الربيعي)
سديتة باوعتلة شلون يستمع لكَمرة
ويهز براسة ويبتسملهة
تقربت كعدت يمهم، ميباوعلي
يتهرب مني
نبأ: سامر حيجي احمد عليك
اشر براسة اي بدون ميباوعلي
نزلت كلت العمتي وللولد
شوية واجة احمد، رحبو بي واحنة كاعدين بالمطبخ
تمنيت اشوفة كلبي محروك عليه همينة
وائل: روحي صيحي سامر
نبأ: ماشي
صعدت: سامر احمد هنا(للكاتبة طيبة الربيعي)
كام، نزل واني اخذت كَمرة
ونزلت وراه، بقيت بالمطبخ شوية
بعدين كلت اللؤي
نبأ: اريد اشوفة
لؤي: دكعدي راحة
نبأ: لك بس اسلم عليه واتحمدلة بالسلامة حباب، اسأل سامر اذا يقبل افوت واذا لا مافوت
لؤي: دنتظري امري لله
دخل شوية وطلع: ميقبل
توقعت هل شي، بليل خابرتني روى
حجينة شوية وسديتة، نزلت كعدت يم عمتي
اعصابي تعبانة ماعرف شسوي
ام سامر: عمة لازم اخذج تفحصين، خو نسينا للطفل لازم تراجعين(للكاتبة طيبة الربيعي)
نبأ: عمة متشوفين حالنة مالي خلك اروح لأي مكان
ام سامر: ميجوز ابطنج روح لترفسين النعمة بيدج، بلكي حال سامر يتعدل من تحجيلة علة حالة الطفل، شلونة وياج هم نفس الشي؟
نبأ: نفس الشي واسوأ، ميبدل كدامي وينام بملابسة رغم حارة، وميقبل البس شي حلو يعصب واذا تقربت منة يدفعني
كمت ابجي متحملت، دمعت عينهة
طبطبت علة ظهري: ميخالف يمة ربج موجود ياخذ حق هل يتيم من عيونهم، الله لايوفقهم انشاءلله
بجيت لحد ما حسيت عيوني يردن يطكن
كلتلي كومي غسلي وصعدي يمة
لتعوفي وحدة تذكري كلام الدكتور(للكاتبة طيبة الربيعي)
وصدك غسلت وصعدت، كالعادة متمدد
ومغمض عينة، بس مينام
ماعرف اذا بليل همينة مينام
اشوفة مغمض بس اعرف كاعد
لبست بجامة حليت شعري
دخلت كَمرة، التهيت وياهة لحد ما نامت
تفاجئت من كلي: جيبيهة يمي
نبأ: من عيني
اخذتهة ونومتهة يمة، جرهة لحضنة
بوسهة ويلعب بيديهة، المنظر يخبل
بس تمنيتة يعبرني ولو ثانية
نبأ: حبيبي خاف جوعان اسويلك اكل؟
اشرلي براسة لا(للكاتبة طيبة الربيعي)
نبأ: خاف تضوجك بليل تتحرك هواية، دخلي اخذهة لمكانهة يا عيني
باوعلي: عوفيهة كتلج
جريت حسرة: مثل متريد
تمدد ودرت وجهي، هل وضع دمرني
وصلت بية لدرجة طاقة التحمل الي عندي خلصت
ثاني يوم اخذتني عمتي فحصتني
الدكتورة كالت الطفل مهدد بالاسقاط
حنطيج ابرة تثبتة بس مو دائمية
يعني يبقة مهدد بالاسقاط اذا مريحتي نفسج
حاولي تعوفين شغل البيت لمدة اسبوع
بين ميرجع كلشي طبيعي، كتبلتي ادوية(للكاتبة طيبة الربيعي)
وطلعنة، عمتي عصبت علية اذا مادير بالي
واهتم بالطفل تزعل علية، حسيتهة ضاجت كلش
بوستهة واخذت من خاطرهة، وعدتهة
ارجع اهتم بصحتي وبصحة البيبي
هذا قطعة من سامر رويحتي مستحيل افرط بي
رجعت للبيت حالتي نص ونص
فرحانة بي بس خايفة عليه
دخلت للغرفة اريد اكلم سامر
كاعد يدخن، موزين التدخين علية
لان حامل، بس هاي اول مرة يدخن هنا
بدلت وكعدت بصفة
سامر: كومي نزلي هسه بعدين صعدي
انقهرت: ليش
سامر: كومي نزلي كتلج(للكاتبة طيبة الربيعي)
نبأ: سامر ليش تعاملني هيج، شسويتلك
مباوعلي ولا جاوب
نبأ: اجيت افرحك بالطفل صحتة زينة، ومبقة علة معرفة الجنس الة كم اسبوع
باوع البطني وباوعلي، ورجع يدخن
تقربت حضنتة دفعني وكام، طلع للبلكونة
ممكتوبلي افرح اني ولا اتهنة
استمر سامر بتعاملة وياية هيج
تحسن تعاملة وية اهلة بس وياية زفت
يشوف ابليس وميشوفني
نسبة التجاهل العندة ضدي عبرت التسعين
وبيوم طكت روحي كلش(للكاتبة طيبة الربيعي)
استغليت الفرصة من شفت كَمر ملتهية وية
الجهال تلعب، الولد بالشغل كلهم
وتقى وعمتي بالبيت
كاعدة تشرب جاي والجهال يلعبون
داير مدايرهة، دخلت اسمعة يسبح
انتظرتة يطلع، شوية وطلع
مبدل، وكف عالمراية يمشط شعرة
تقربت منة: سامر اريد اشوف جسمك
باوعلي بعصبية: وخري من خلقتي
نبأ: ليش بس فهمني، شنو المخبي عني ومتريدني اشوفة(للكاتبة طيبة الربيعي)
اجاهلني وراد يطلع ركضت سديت الباب
نبأ: متطلع اذا متشوفني
فك عينة بعصبية: وخري
احجي والدمعة بطرف عيني، كوة لازمة روحي
نبأ: ماوخر اذا متشوفني، سامر ليش بس وياية ليش؟؟؟ ليش تحرك بكلبي عليييك
جرني حيل وركعني بالكاع
حسيت الدنيا افترت بية وعيوني غوشن

يتبع...🌺🌺🌺
حبايبي تصبيرة الباجر، منطاني قلبي اتركم تنتظرون أكثر
بس صدكو لان عندي امتحان ابد مو من عوايدي
قرائة ممتعة❤