في جناح دلال و جسار
كانت دلال تجلس تسامر عزيز و بدور و فارس
عزيز قائلا " شفتي يا أما دلال ،الابله شيماء دي شكلها أكده ابله شاطره ،آني شفت شاهين بيحل معاها كيه الطلجه ،مع ان اللي اعرفه ان شاهين ما بيفهمش "
ضحكت دلال " عيب يا عزيز ما تقولش كده علي خوك"
و عقبت بدور " شفتي يا ماما اهو علي طول كده يشتمه" فاحتضنها دلال" يا حبيبه قلب ماما انتي ، اهو انتي اللي نصفاني مع جوز الخناشير دول اللي ما بيتكلموش غير صعيدي"
فقال باسل " باه يا أماي ،الحديت المصاروي ده للمتجلعين بس أحنا رجاله"
فقالت ضاحكة "طيب يا رجاله قوموا ناموا بقي"
فقال عزيز" لاه عنستنوا هبابه معاكي ،جايز ابوي يجي"
ردت بحزن "ريح نفسك ابوك مكلمني من شويه و قال مش جاي الا كمان يومين"
فقال بغضب "باه و ما حددتنيش ليه مش راجل انا اياك"
فقالت فرحه به "يا نهاري مش راجل ازاي ،ده انت راجل و سيد الرجاله، بس هو لما اتكلم انتو كنتوا تحت،
فينك يا قمر الله يرحمك الولاد كبروا "و نظرت لهم
"كانت هتفرح بيكم قوي يا ولاد "و احتضنتهم
"ربنا يخليكم ليا و يحنن قلوبكم علي بعض"
لتجد باب الجناح يفتح و جسار أمامها قائلا
"باه وآني ماليش في الحضن الجماعي ده و الا ايه ،هو الغايب حداكم ما لوش نايب "
فصرخ الجميع "هييييييه "
و التفوا حوله يحتضنوه
"وحشتوني جوي يا عيال" و قالها و هو ينظر لدلال
فضحك عزيز "احنا برضه اللي وحشناك يا بو عزيز "
فضربه جسار علي مؤخره رأسه "اتلم يا ولد"
فاقتربت دلال منه و احتضنته حضنا سريعا و قبلته من وجنته "حمد لله علي السلامه يا بو العيال"
فقال ضاحكا "حلوه المفاجأه دي؟!"
قال الكل "طبعا حلوه"
فقال "خدي يا ست الستات الوكل ده ،آني جوعان ،دي بيتزا يا ولاد خابركم بتحبوها و نادموا علي شاهين و فارس الصغير بسرعه ،
و انتي يا دودو نادمي علي ورده و رضوان انا جايب للكل و نسهروا سوا ،
آني طليت علي جاعه ابوي دياب و لجيت النور مجفول و اكيد برضك ابوي و أمي ناموا هم و عمي وهدان و أماي صفيه ،بس اني عامل حسابهم يفطروا بيها بجي"
و اجتمع الكل في جناح جسار و تناولوا البيتزا و سط الضحكات و السرور ثم انصرفوا و دخل الاولاد الي غرفهم
