سار اليوم عاديا و ذهب الاولاد لمدارسهم
وصل بهجت القصر
و عرف عن نفسه للغفر فامسكوه و اقتادوه حيث امرهم دياب بذلك سابقا
و احتجزوه هناك و ذهبوا لإبلاغ دياب بوصوله
كان بهجت يحدث نفسه "كده الحكايه فيها ان ،مش حكايه موت بقي، كده انا عملت الصح"
ليدخل دياب و جسار
"نورت يا بهجت"
"ده نورك يا دياب باشا و نورك يا جسار بيه"
"واه ده انت عارفنا بجي"
انحني احتراما "طبعا يا باشا و هل يخفي القمر" (قالها ناظرا لجسار)
فصفعه جسار " جمر دي تبجي ستك و تاج راسك"
فوضع بهجت يده مكان الصفعه "و ماله يا باشا ربنا يرحم الجميع،و بعدين الست قمر ماتت البركه في الست بدور، و الا هي ما تعرفش حكايه امها "
فقال دياب "و انت كمان عارف بدور"
رد بهجت بخبث "عارف بدور و عزيز ولاد الغاليه المرحومه ،و باسل باشا و شاهين باشا و فارس باشا الصغير،و ما دام انتوا قابلتوني بالطريقه دي يبقي نلعب علي المكشوف،
انا و ابويا حطينا هدفنا اننا لازم نستفاد من عيلتكم دي ،بعد ما زيزيت او قمر جات لكم وخلت بينا ،ابويا لما ادي لقمر العنوان هنا كان قصده انها ترميلكم ابنكم و تاخد قرشين حلوين و تيجي بقي لينا ،نكمل شغلنا و رقصها و الراجل الخليجي اللي كان عاوزها و هيدفع فيها دم قلبه ،
بس هي استحلت الحلال بقي و بلطت في الخط ،انا من زمان بالف و اخطط و اراقب ،ما تفتكرش ان سماهر كانت ورقتي الوحيده لا سماهر دي حاجه كده علي الهامش يا تصيب يا تخيب،انما الجوكر لسه هالعبه،
(ثم قال بصوت اقرب للفحيح )مش تتطمنوا علي الشباب الحلوين و البنوته الاموره زينه العرايس "
ليصفعه جسار صفعه قويه أدارت رأسه للجهة الأخري جارحة شفتيه فانسال الدم منها "اياك تجيب سيره العيال"
ليمسح بهجت خيط الدم و ينظر لدياب
"خلينا معاك انت يا كبير انت هادي و راسي كده و هنعرف نتفاهم،
اطمن علي العيال دول في الحفظ و الصون و قدامي عشر دقايق بالضبط لو ما كلمتش الرجاله يبقي ما اضمنش اللي هيحصل"
هاتف جسار سائق الاولاد لا يرد
فقال بهجت بضحكه مقيته "بترن علي مين يا باشا السواق مش هيرد السواق متكوم في شنطه العربيه ،الخبر الاكيد عندي انا "
هم جسار بضربه لكن دياب اوقفه و نادي علي نبوي
"لافيه امبايله يا نبوي"
