البارت الثاني
بعد تقريباً ربع ساعه خلصت من قص شعري ورتبته الي خلته قصير كلش تقريباً يوصل لجوه اذني وسوتلي كذله واني ماحب انزل كذله على عيوني
اجت نفس البنيه الجابتني لهنا وابتسمتلي وكومتني
*تعالي وياي ياحلوه حتى تبدلين ملابسج*
*ماشي*
خذتني ودخلتني لغرفه متروسه ملابس اشكال والوان حسبالك داخله لمجمع وهم اكو بيهه هواي بنات شفته اختارتلي قميص لونه رمادي وتنوره قصيره سوده وربطه مال عنق سوده وكعب عالي لونه اسود وكالتلي لبسيهن استغربت بالبدايه
بعدين خذيتهن ولبستهن بأحد غرف التبديل ومن طلعت كوه امشي من وره الكعب كل البنات تقريبا الوياي لابسات نفس الشي وجاي يعدلن بروحهن بالمرايا
اتباوعت على المرايا ماعرفت نفسي وين جنت وين صرت سهام صاحبة الشعر الطويل والملابس الطويله والعريضه كان شكلي قبل احلى بهواي يالله شنو هاي
كنت اباوع بالمرايه وانتقد نفسي وشكلي بعدين حسيت بأيد على متني التفتت لكيته نفس البنيه
*يلا حبيبتي تعاي وياي خل نرجع للكوافيره*
هزيت راسي الها بمعنى موافقه جنت مثل الإنسان الآلي شيكلولي اسوي من الخوف ورجعنا سوتلي مكياج خفيف كلش لدرجه مامبين بس شويه مكياج العيون كلش خلته طووخ طلعت اخلس بالبدايه ماوافقت بس جبرتني عود هيه هاي طبيعة عملهم هنا
وانطتني نضاره طبيه اطارها يصير اسود وعريضه شويه جنها مال مخابيل وتكلي لبسيهه كلتله مستحيل اني نظري مابي شي
بس كالت هاي للزينه مو اكثر يعني مو نظاره طبيه حقيقيه المهم لبستها واني اتذمر
شنو هالعمل الغريب العجيب هذا
واجت ابنيه لابسه فستان اسود طويل يسحل وراها بس حصر وشعرها طوله متوسط ومجعد وكفت بالباب وصاحت
*يلا يابنات حضرن انفسجن اريدجن تتجمعن بالغرفه المجاوره حتى اعلمجن على طبيعة عملنه مفهوم*
وراها مشت والكوافيره كالتلنه
*يلا يابنات يلا مثل ماكالت ست لينا الكل يروحن للغرفه اليمنه يلا*
طلعن البنات كلهن واني هم طلعت وياهن الغرفه الثانيه جانت تقريباً فارغه مابيها شي بس جدرانها كلها لونها ابيض وكفنه كلنه واكو بنيه وكفت بصفي مبين عليها بعمري وجريئه اكولج عيني معقوله ينطونه مليون دينار بالاسبوع بس علمود يشغولنه نادلات*
*الله يسمع منج يارب نادلات ولاغير شي*
*اي عيني نادلات مبين من لبسنه راح يشغلونه هيج*
شويه فرحت من سمعت كلام البينه نادلات ولا غير شي يسون بينه بعدين الكل سكت من كامت ست لينا تحجي
