لا تَذْهبي (بالليبي)

الفصل الحادي عشر

إيهاب قعد يفكر شوية ...
إسراء شافلته : خيرك سرحت ؟
إيهاب عقد حواجبه : شي !
إسراء : العناية المركزة ديما هكي يا إيهاب معليشي ! و بما أن الدخول ممنوع توا برا شوف ماما بالك تبي حاجة !
إيهاب هز راسه بالايجاب و قاعد سرحان ،
و طلع بدون ولا كلمة.
توجه للشقة و عقله يفكر في جيلان ، أما قلبه فكان عندها اصلا ،
حاضناته بأنفاسها 😩
وصل و لقي أمه تحضر في طعام العشاء .
سماح بقلق : وينك يا ولدي معاش نشوف فيك !
إيهاب حضن أمه و قعد يضغط عليها بالشوية .
سماح حطت ايدها ع مؤخرة رأسه و مسحتله ع شعره : خيرك يا ولدي؟ تفكر ؟
إيهاب فكها و بدي يشوفلها : نفكر ! و خايف !!
سماح حطت ايدها ع خده : ولدي الغالي خايف ! ما تخافش تو تشوف ربي كيف يفتحها عليكم!
إيهاب جلس على واحد من كراسي الكوجينا و أمامه طاولة صغيرة .
حط رأسه ع الطاولة : خايفها تموت !
سماح حط ايدها ع شعره : رحمة ربي واسعة ما تخافش!
هوا رفع رأسه ،  و هي لما شافت تعابير الخوف على ملامحه ،
حاولت تبتسم له مدعية التفهم !
و جلست جنبه : كان بوك الله يرحمه يقول "الخوف من الحرب أسوأ من الحرب نفسها" !
إيهاب عقد حواجبه و هي كملت : ساندها و كون قوتها خليك ديما متفائل قدامها ، لأنك لو حسستها الخوف ح تخاف حتى هي ، و العلاج معركة ماتخافوش منها واجهوها انتم الزوز !
إيهاب تردد شوية وبعدين قال : اا.. اني ..
سماح قربت منه و حطت ايدها ع كتفه : ايه خيرك وليدي !
إيهاب تنهد : ....اني نبي نتزوجها!
سماح تفاجأت و سكتت ،
تنهدت ، و سألت : به ؟
إيهاب : شنو به ؟ بتخطبيهالي ؟
سماح : شن سبب طلبك ليها توا ؟
إيهاب : اليوم ما خلونيش نخش للعناية ! و اني نكون معاها ، اني ما نقدرش نتفرج عليها من بعيده !
سماح : باه ! أهدى توا ! نبيك تعرف أن مرات بوها ما يرضاش لو حني رضينا ، و بعدين الزواج مش ساهل أنت قاعد صغير !!
إيهاب تأفف : لالا مش صغير !
سماح وسعت عيونها من الدهشة : إيهاب ! شنو شوط كورة و خلاص هوا ؟
إيهاب انزعج ...
سماح : الزواج للأبد ..للأبد يا إيهاب ، يعني مش اليوم ولا غدوة ، و لا سنة ولا اثنين ! أنت اليوم مندفع و مشاعرك رافعينك ! و البنت عندها سرطان و انت ح تمل مع الوقت من المستشفيات!!
إيهاب : امي انتي خيرك ما تبيهاش ؟
سماح بجدية : ما تأولش كلامي لأنه كلام حق ! خليك واقعي ، و لازم تتحمل نتيجة أفعالك ! مش اليوم تقول زوجوني و غدوة تقول معاش نبي انت مش ح تقعد ف العشرينات طول عمرك ؟
إيهاب : و هي مش ح تقعد ديما مريضة !

سماح : هالمرض مش ساهل ، و حني ما نعلموش بالغيب !
إيهاب : تمام ! و لأننا ما نعلموش بالغيب ما نحكموش ع اللي بيصير قبل وقته !
سماح ضحكت : ما أطول لسانك يا كبدي !
إيهاب ضحك شوية ...😅
سماح : اني مش ضد جيلان ، كان تبي عدوة نخطبهالك،  لكن فكر في نفسك راهو ليها حق عليك و أن شاء الله ربي يكتب اللي فيه الخير !
إيهاب باس أمه ع راسها : ربي يحفظك ليا !
و كمل :
غدوة لازم !
سماح : يا لطيف !! هههه
إيهاب : ايه لاني نبي نكون جنبها ف علاجها من البداية ما نبيش تأجيل !
سماح : و امتحاناتك؟
إيهاب : مازال !
سماح رفعت حواجبها : شن مازال ؟ الفترة اللي فاتت كانو قريب وكنت تقرأ ، و توا لا ؟
إيهاب : نقرأ امي اول باول ، مش صعبات عليا !
سماح تنهدت و قالت بعدم رضا : به كويس !