بسم الله
علاء/حاليا اني بسيارة رايح لبغداد اشتغل هنالك...وصافن اباوع على الطريق...
شخص/ عيوني..ابو الشباب...هذا شبيه ما يرد... عليت صوتي شوية...خالي ابوالشباب...
علاء/هاا هاا العفو ما انتبهت...امرني..
الشخص/ما يامر عليك ظالم...بس الكروة لموها الناس...وبقيت بس انت..
علاء/العفو والله ما انتبهت...هاك تفضل اغاتي...
الشخص/خيرك شو الطريق كله صفنات...
علاء/لا ماكو شي بس افكر بدنياي...ودخت بيها...
الشخص/يمعود لا تفكر هواي...كلما تفكر اكثر تحتار اكثر...بس ما تعرفنا على حضرتك...
علاء/واخيرا سأل خلوني اعرفكم على نفسي...اسمي علاء وعمري 27 سنة ...مواصفات جسمي ...اسمر بس قليل...طويل وعلي جسم حلو واذا العب حديد يصير يخبل...بس ما العب بسبب انشغالي... خريج علوم ماجستير كيمياء حيوية...ورغم شهادتي اني ما متعين حالي حال بقية الشباب...عائلتي ميسورة الحال...بيها امي وابوي و2 اخوة واخت...طبعا ان جبير اخوتي...ما عدا اختي اكبر مني ومتزوجة...هسة اني متوجه لبغداد اشتغل بمختبر تحليلات...لان شغل بمدينتي الديوانية قليل مو مثل بغداد...كل فترة انزل لاهلي اشوفهم بس اكثر وقتي ببغداد...صارلي 3 اشهر اشتغل هناك...
الشخص/ما طلبت قصة حياتك ردت بس اعرف اسمك...
علاء/صوجي اصلا حجيتلك قصتي...هااا هذا اسماعيل يتصل بية...الو..
اسماعيل/الو السلام عليكم..
علاء/وعليكم السلام...خيرك تتصل بية...
اسماعيل/ردت اعرف تجي اليوم لو لا...
علاء/اي ولك اجي ونص ساعة راح ندخل بغداد...
اسماعيل/اي بيها الخير...يعني راح انتظرك...وصدك ذيج البنية التحبها..
علاء/ولك يا بنية احبها؟...
اسماعيل/ شبيك ولك قصدي بحر...
علاء/بشرفك اني احبها...اصلا ما اطيقها...شبيها المهجومة...
اسماعيل/ هي مو جانت تشتغل بالمختبر المقابل النا...
علاء/اي بس لا طردوها...خوش خبر فرحتني...
اسماعيل/ولك خليني اكمل كلام كل شوية وتطفر...لا اصلا كامت تشتغل ويانا بالمختبر...
علاء/ لا جذب...انت ناصب علية مو...الله عليك كولي جذب...
اسماعيل/لا والله صدك...واصلا داومت بعد يوم من نزلتك لاهلك...
علاء/لا يالحظ...فوگ المراجعين اللزكة راح تجي هاي...اسماعيل اني منا وارجع لاهلي...
اسماعيل/هههه تحجي صدك تترك رزقك علمودها...
علاء/ولك مو لسانها سم وطويل...ومحد يكدر اله...
اسماعيل/اليسمعك يگول انت الفقير...انت شغلتك اتعس منها...ودومك تبسمر الها...وهي ترد عليك..
علاء/ لا وداعتك هي تبدي اول...يلا وصلت سيطرة راح اغلق...
اسماعيل/ يلا مع السلامة..
علاء/ما عرفتكم على اسماعيل... هو صديقي من ايام الكلية...وهو دبرلي الشغل بالمختبر وياه...ولد حباب واخو اخيته... شكله شلون اوصفه...بالمختصر وجهة عبارة عن خشم وضعيف...بس هو يتعارك هواي رغم شكله... وبالنسبة للبنية اللي نتكلم عنه...اسمها بحر كانت تشتغل بالمختبر المقابل النا...يوم من الايام صار وياها موقف كامت تكرهني واكرها...واكف بباب المختبر وهي هم واكفة بباب مختبرهم...دفعني اسماعيل اروح اتكلم وياها بين قوسين صرت عربانة دفع...رحتلها كلتلها صباح الخير ما ردت تجاهلتني...صباح النور نفس الشي...استغفر الله... good morning...باوعتلي صفح ورجعت نزلت راسها للموبايل...على كيفج ويانا ليش هل الغرور...ردت علية كليشة اكثرها ما فهمتها شنو تتكلم...بس فهمت كم غلطة ومسبة واكو كلمات اول مرة اسمعها...ضجت حيل منها...ولج انتي لو شوية اطول شنو سويتي...كلج نص متر...هي بقت صافنة علية عفتها ورجعت على اسماعيل...لزمته خنگته...وخليته يسولف كلشي...طلعت مرزلتهم كلهم بس اني لا...ورادوها ترزلني وياهم...بس اني الوحيد اللي رد عليه وقلد على طولها...هم بلعو الرزالة ومشو...ومن ذاك اليوم لهذا اليوم كلما اوگف بباب المختبر احجي ويا اسماعيل واذب بسامير الها...وبالمقابل هي تسوي مثلي...لدرجة صارت عداوة بيناتنا....
الشخص/يمعود شبيك صافن وتمتمت وصلنا نريد ننزل...
علاء/العفو اغاتي مو قصدي...
