من طائفة قلبي

البارت السابع

بحر/شلونك حبيبي علاء؟...
علاء/بحر؟..شنو جابج هنا؟...شلون وصلتي؟.. بحر كدامي وما مصدك نفسي... والله مشتاقلج كنت اريد اشوفج..
بحر/يلا حبيبي هاي اني كدامك...واشبع مني شوف..
علاء/صافن بعيونها...ولزمت ايدها...شوية وسحبتها اريد ابوسها بعد ما اتحمل بس هي تقاومني...وتصيح علاء عوفني ولك علاء عوفني...بس الغريب صوتها مثل صوت اخوي سلام...ولج بحر شبيه صوتج...ليش تتكلمين مثل سلام...
سلام/ولك هدني مو راح تگطع ايدي...يا بحر تسولف بيها..
علاء/هاا سلام بحر وينها؟... مو كانت هنا قبل شوية؟..
سلام/بس اني هنا...عفتك نص ساعة ورجعت لگيتك نايم...شو انت لزمت ايدي وبعدها سحبتني تريد تبوسني بحلگي لعبت نفسي وگمت اصيح عليك..
علاء/يعني هذا كله حلم...لا يا الله... والله اشتاقيتلها..
سلام/صار عندي فضول اعرف هاي الماخذة عقلك وتفكيرك..
علاء/ولك تخليه على الجرح يطيب...وعليها طبع وشخصية تخبل...بس لسانها شوية طويل..
سلام/لعد بس هي تفيد وياك..
علاء/شنو قصدك ولك؟..
سلام/ما قصدي شي...يلا اكعد عدل حتى تتعشى..
علاء/عدلت نفسي وكعدت بس راسي احس بيه ثگيل كلش...وكله يوجعني حتى ما اكدر اعرف الجرح وين...اكلك سلام وين صاير الجرح براسي؟..
سلام/اكلك وما تضوج؟..
علاء/ولك خوفتني كلي وين الجرح لا ابتلي بيك..
سلام/ما اعرف شلون اكولها...ادري راح تتأذه..
علاء/غير يكولها جورج قداحي...هسة اكوم الك واطيح حظك..
سلام/على كيفك خوية العصبية تأذيك اكثر... الجرح على طول منتصف راسك..
علاء/اي وشبيه؟.. يعني مو خطير مو؟..
سلام/لو مو خطير ويشفى بس شغلة صغير تبقى..
علاء/سلام انت مو مال احترام ترا وداعتك اخنكك لمن تموت...كول كلشي وبطل دراما وياي..
سلام/خوية والله ما اتحمل اكلك راح يبقى مكان الجرح بدون شعر..
علاء/شنو؟..لا جذب مو؟..شلون يعني؟..
سلام/الجرح صاير على طول المنتصف يبقى بدون شعر..يعني راسك يصير قسمين..
علاء/هذا الكلام من عندك مو؟..
سلام/لا وداعتك الدكتور كال يبقى اثر الجرح...والاضرب ما يكدرون يزرعوه شعر..
علاء/لا ولك خربت حياتي...شنو هاي الصدمات وحدة ورا الثانية...يعني اول صدمة بدولكة كزاز والصدمة الثانية اصير مخطط بنص راسي..لا يا حظي الزفت...ربي شسويت اني...لا خاف هاي الخبلة تسويني مضحكة اذا ما عافتني..ولك سلام اريد ابجي على حالي..
سلام/لا تضوج خوية مو اول اكرع انت ولا آخرهم...اباوع لعلاء شلون وجهة يريد يبجي ولازم نفسي ما اضحك...اليوم الا انصب عليك ههههه..
علاء/ولك بعدني شاب وصغير...ليش يخرب شكلي من هسة..
سلام/خوية اذكر الله... حلق راسك صفر وما يبين بعد..
علاء/لا حلها الفهيم...هسة شنو اكول عليك بوية خربت شكلي ومستقبلي علمود وحدة ما تسوة..
سلام/ولك ليش هيج تگول على بنت عمك؟..
علاء/ولك شنو بنت عمي؟.. الله لا يطيها فوك شكلها تكول عباس جيجان...وخباثتها وطبعها الزفت...ابوك يگلي خوش بنية...والله بالجامعة استحي يعرفون هاي بنت عمي...كانت تسبح بالمكياج وتجي للجامعة وهي زركة...تطلع عبالك جلب ابگع...لا والاقوى كانت مكبلة ويا ثنين حلوين اني اريد اكبل وياهم...من اشوفها تدخل بشارع اني اغير طريقي لغير شارع...ومرة كلمتها وهجيتها بس تورطت طلعت اصلا غريب عليها...وهددتني تكول لاهلها اني اتهم شرفها...وطبعا انت تعرف اهلها واهلي يصدكوها ويجذبوني..
سلام/اذا تعرف كل هذا ليش ما گلت لامي وهي تكلم ابوي؟..
علاء/ابوك قافل على اخوه ويعتبره هو واولاده ملائكة الله وانت تعرف اولاد عمك اكثر مني اخلاقهم سز... وحتى بنته الوحيدة نفس الشي..
سلام/صدك...هسة لو بس اعرف ابوي ليش يحب اخو هيج...واخوه ما شفت واحد كلب مثله...ولو الكلب وفي..تدري مرة قبل لا تجي ابوي تمرض اسبوع بالفراش...وعمك ما كلف نفسه حتى يتصل ويسأل عليه...وابوك يتعذر مكانه..
علاء/سلام اريد اكلك كلمة..
سلام/كول خوية..
علاء/اسمعني اذا صرت مثل عمك...قسما بالشارع اسحلك كدام الناس...
سلام/ههههه لا خوية الله يبعدنا عن هذا الشر..
علاء/صدك موبايلي وين؟..
سلام/موبايلك عندي بس مغلق ما بيه شحن..
علاء/شوفلي شاحنة اريد اتصل على بحر...اعتقد قلقة علية..
سلام/ولك وين تتصل الساعة 2 ونص بنص الليل..
علاء/ولاكة بضلوعك اكو احد يتكلم هيج ويا اخوه الجبير..
سلام/اعتذر حقك علية...بس وين تتصل بالبنية هسة..بس صدك هاي البحر حلوة لو مثل بنت عمي؟..
علاء/شنو تقارنها ببليس...العفو لميس...جيب موبايلي خلي اشحنه واراويك صورتها..
سلام/شلون تراويني صورتها مو عيب...
علاء/قابل اخليك تشوفها بدون حجاب...طبعا لابسة حجاب...خليت سلام يدبرلي شاحنة وشحنت موبايلي على ما كملت عشاي المتأخر...فتحت جهازي...وافففف...لگيت شكد مكالمات ورسائل من بحر..صدك صارلي 3 ايام ما متصل بيها...التهيت ويا اهلي علمود الخطوبة...طلعت احلى صورة الها... تعال سلام شوفها..
سلام/خلي اشوف هاي اللي قبلت بيك على الاغلب زرگة مثلك هههه... اخذت الموبايل من ايده..😨😨😨..
علاء/ها شبيك فاك حلكك؟.. الغبي يباوعلي ويرجع يباوع للصورة...وعادها كم مرة...ولك غبي شبيك انصدمت مو حلوة؟..
سلام/هاي عدنا بالعراق؟..
علاء/شبيك ولك هاي حبيبتي..
سلام/انت جذاب هاي صورة نزلتها من الفيس وتريد تضحك علية..
علاء/انطيني موبايلي... اخذت الموبايل وطلعت صورة ثانية...هاك شوف هاي الصورة اني وياها..
سلام/اي والله صدك...هاي امي بس تدعيلك واني وحامد باقين هيج...لا ويصيح حظي زفت..
علاء/شنو الفايدة راح تعوفني من تشوف راسي صاير فردتين مثل طيز ابن اختك...
سلام/مصبر نفسي من الضحك 😂😂...ردت اكوله بس بطلت من شفته هيج وجهة...يعني اكو هيج بنية حلوة تحبك...خلي اخبث عليه بعد شوية...وهم اروح اخلي امي تدعيلي... مو بس هو...يلا علاء اكلت وشبعت هسة نام وارتاح...
علاء/لعد الدكتور وين مو گلت يفحصني؟..
سلام/يگول للصبح ناخذله اشعة هسة الاقسام كلها مغلقة..
علاء/يلا ولي خليني انام..
سلام/مو صوجك...صوجي باقي يمك الليل...علاء بسرعة نام واني نمت بسرير يمه... للصبح ما احس الا موبايل يدك تركته...رجع مرة ثانية دك...شنو هذا الازعاج منو يتصل على علاء بهيج وقت...كعدت باوعت للاسم..هاي بحر...ولك علاء بحر تتصل عليك..ما يرضا يكعد هذا تمبل مال نوم...ولك علاء بحر تتصل..
علاء/😴😴😴كللها ما موجود طالع...
سلام/البنية تدك عليه وهذا كاتله النوم هلي ارد عليها خطاية...الو..
بحر/الو يالغبي..يالاثول اكو بالدنيا كلها غبي مثلك يعوف حبيبته 3 ايام بدون ما تدري عنه شي...ما يكول هاي الغبية اللي حبته گلبها وبالها يمة...ما ترد شبيك تخورست..
سلام/تريدني ارد عليها وشبعت رزالة من ورا اخوي الاثول...مال هسة اخنكك وانت نايم..
بحر/شبيك ما ترد يالاثول...
سلام/العفو اختي اني سلام اخو علاء...
بحر/هاا اعتذر اخي والله مو قصدي انت...كان قصدي علاء...
سلام/ما صار شي خيتي...ولو هو يستحق كل اللي گلتيه عليه..
بحر/العفو خيي بس علاء وين؟...ليش ترد انت مكانه؟..
سلام/احنا حاليا بالمستشفى..
بحر/خير شنو صار؟..
سلام/لا ماكو شي بس علاء وكع على راسه وهسة اني وياه بالمستشفى..
بحر/يمة... علاء شبيه؟..خيي الله عليك لا تضم علية..
سلام/لا والله خيتي ما عنده شي...بس هو نايم هسة...وما يقبل يكعد..شكد حاولت وياه.. بس ما يقبل..
بحر/اعرفه يحب النوم...بس خيي ارجوك خليه يتصل بيا من يكعد... واني اسفة مرة ثانية لان صارت بوجهك..
سلام/ههه لا تهتمين خيتي...بس لا تقصرين وياه من يتصل بيج..
بحر/تدلل خيي...مع السلامة..
سلام/مع السلامة...والله خوش بنية هم حلوة وهم مرتبة بالكلام...يلا بالعافية عليك علاء...واني هم راح اصير وياك واساعدك باللي اكدر عليه..

بحر/والله عيب.. غلطت على اخوه كدامه... لا وصارت بوجهة...هسة شيگول علية...حبيبة اخوي ما تستحي...اني اعلمك علاء دائما تخليني بهيج مواقف محرجة..

بيت ابو علاء....
ام علاء/يلا ابو علاء تريك خلي نروح نشوف علاء..
ابو علاء/لا تخافين عليه ابني عار واعرفه ما يموت..
ام علاء/لا تگول على ابني عار...وشمدريك ما تأذه منو گلك..
ابو علاء/شبيج يا مرة اخذتيني حاصل فاصل...قبل شوية اتصلت على سلام وطمني عليه..
ام علاء/لعد كمل ريوكك وكوم اخذني اله..الليل كله كاعدة اصلي وادعيله..
ابو علاء/ادري وما خليتيني انام همين..
ام علاء/يعني اني ما خليتك مو انت اللي الليل كله تبجي على ابنك بسكته..
ابو علاء/هاا وشمدريج؟..
ام علاء/ادري ادري يلا كمل ريوكك وراك دوام هم..
ابو علاء/لا طلبت اجازة اليوم..
ام علاء/لعد استعجل..
ابو علاء/ان شاء الله...بس صبيلي جاي بعد..

بالمستشفى...
علاء/أاااخ راسي...ابوي ما صدك يضربني عباله حايط مو راسي هذا...سلام وين راح...كعدت كلش دايخ وعندي الم فضيع... احس غطا راسي يريد ينشلع من الالم...وين راح سلام الغبي شلون يعوف اخوه المريض..بقيت 10 دقايق...يلا اجاني سلام..
سلام/ها صحيت علاء..
علاء/اي صحيت..بس انت وين جنت عايفني لوحدي..
سلام/رحت برا اتصلت اطلب اجازة من شغلي..
علاء/ما خليت امي تجي وانت روح لشغلك..
سلام/يعني من عقلك اعوفك وحدك.. وثانيا اذا طلبو شي من امي وهي مرة جبيرة تكدر تسوي شي؟..
علاء/بكيفك انت حر...بس لا تعصب يمعود..
سلام/صدك بحر اتصلت الساعة 6 الصبح..
علاء/هااا؟؟..وليش ما كعدتني ولك؟..
سلام/كعدتك بس انت ما تقبل...وكلتلي رد عليها..
علاء/ورديت عليها؟..
سلام/اي رديت...وترزلت مكانك...وهسة هي منتظرة اتصال منك..
علاء/انطيني جهازي اتصل بيها..
سلام/هاك استاذ علاء..
علاء/اخذت الجهاز واتصلت ...بقى يدك لحد ما رفعت الخط الو...