علاء/اجت ثاني يوم بحر للمختبر ما بيها شي فرحتلها...بس هل كم يوم قلت نگرتها وياي...وصارت تضحكلي هواي...وكل ما تشوفني تبتسم... يمكن الحرارة أثرت على عقلها...لازم ياخذوها اهلها للطبيب النفسي ويراجعون بيها...يمكن تخبلت البنية...حتى صايرة تحجي وياي بدلع...بس صدك من تحجي بدلع تصير احلى...
سماح/ما اعرف شنو صاير بين علاء وبحر ...متأكدة اكو شي وخاصة بحر كل تصرفاتها ويا علاء تغيرت...ولج ولج..
بحر/ولاكة شبيج..
سماح/شعندج ويا علاء؟..
بحر/شنو شعندي ما افتهمت؟..
سماح/لا تسوين روحج ثولة...قصدي صار شي بينكم انتي وعلاء؟..
بحر/يا ثولة كلشي ماكو...لا تلحين بهاي السالفة...بطليها..
سماح/ان شاء الله...بگلبي والله متأكدة اكو شي بيناتهم نظراتج يا بحر مو خالية...
اسماعيل/علاء لمتة تنزل لاهلك؟...
علاء/الاسبوع الجاي على الاغلب...
اسماعيل/زين وشلون بزواجك من بنت عمك؟..
علاء/والله ما ادري شلون احلها منتظر فرج الله...
سماح/ولج بحر ولج بحر...سمعتي علاء واسماعيل...
بحر/لا شبيهم... جذب سمعت بس ما ابين نفسي متأثرة...
سماح/ولج علاء راح يتزوج بنت عمه...لازم تسوين شي قبل لا تروح عليج...
بحر/واني شعلية يتزوج اللي يريدها...بگلبي اني اعلمك علاء هذا الاسبوع زينة وياك واضحكلك بس انت يابس وقليل فهم..الا اشعوطك..
سماح/هسة شوية واسأل اسماعيل على بنت عم علاء...انتظريني...ورا نص ساعة شفت علاء التها بشغله صحت لاسماعيل... اسماعيل... اسماعيل..
اسماعيل/هاا تريدون شي؟...
سماح/سلامتك...بس ردنا نسألك اني وبحر عن بنت عم علاء..
بحر/بس انتي ردتي تسألين اني ما علية..
سماح/اي بس اني وغمزت لاسماعيل..
اسماعيل/فهمت غمزة سماح تريد تخلي بحر تغار على علاء...كنت شاك بامرها بس هسة تأكدت منها...وحتى ذاك الاثول هم يريدها بس ثنينهم عنودية اعند من المطي...شنو تريدون تعرفون؟..تكلمت هيج قربت بحر كرسيها يمنا على ابو جاي تشتغل...
سماح/سولفلي شنو قصة بنت عم علاء...
اسماعيل/اني اكلج ابو علاء يريد علاء ياخذ بنت عمه...وعلاء ما يريدها...يگول ماكو حب بيناتنا..
سماح/زين بنت عمه حلوة؟..
اسماعيل/اسمها لميس وانتي عندج الحساب..
سماح/صدك؟؟؟؟؟😨...ولج بحر راحت عليج...حتى اذا ما يحبها بس من جمالها يمكن يوافق...
بحر/ولج اني شعلية لا تسولفون بهيح شي يمي يلا سكتو...
سماح/اذا انتي شعليج ليش صرتي عصبية...
بحر/اني عصبية ؟؟..اصلا هادئة كلش...
اسماعيل/طيب الكرسي شعنده وياج...مو راح تكسريه..
بحر/هاا لا ما منتبهة هو هيج طبعي...
إسماعيل/بحر بدون لف ودوران انتي تحبيه لعلاء...بس راسج يابس وعنيدة وهو هم مثلج...احسن الج تعترفين بهذا الشي واحنا نساعدج..
بحر/انتو شبيكم اليوم وياي...ما اعرف منين تجيبون هاي الافكار...
سماح/نجيب الافكار من وجهج الاحمر...وابتسامتج الغريبة...ما مصدكة بنفسج...
بحر/راح اتصل بالدكتور واكله انتو مهملين بشغلكم..
سماح/يلا راح نتركج بس فكري زين واتركي العنودية...ترا اسمها لميس وانتي عندج الحساب...
بحر/استغفر الله...ما كنت اعرف عنده بنت عم حلوة وفوكاها اسمها لميس...ولج فكري فكري...يبووو ما اعرف شنو اسوي...مرت الايام وعلاء نزل يومين لاهله...
سماح/بحر شبيج اليوم ضايجة؟..
بحر/ما بية شي..
سماح/انتي شايفة وجهج... حواجبج لازمة ببعضها...
بحر/وهسة...شوفي مبتسمة...
سماح/رجعي عابسة... صرتي تخوفين ولج...
بحر/يلا كافي رجعي لشغلج..
سماح/حاضر حاضر ست بحر...
بحر/اوووف..علاء ما يروح من بالي...وهسة طلعت عنده بنت عم ابوه يريده يتزوجها...شنو عذره حتى ما يتزوجها...اذا اسمها لميس...ادري تطلع احلى مني...قابل يعوفها علاء ويباوعلي...حتى يكرهني ويضوج مني...غبية بحر المفروض كان تراوينه ضحكتج وابتسامتج اكثر...ولازم تعدلين نفسج اكثر...
