ضَحِيَّةُ الذِّئاب البَشَرِيَّة 3/>

6) مصيري الزنقة

ما خلاتش لي فرصة تا نكمل هضرتي قلبات بزطامي فعلا لقات فيه 500 درهم قالت لي منين جاتك هادي شكون عطاها لك قلت لها ماشي ديالي .. وفهمت بلي حطها راجلها بلا مانعيق حيت كان مخطط لهادشي .. عيت ما نحلف ليها و قلت ليها را راجلك غتاصبني شحال من مرة .. قال ليها هادي راها تاقبها شي حد وباغا تلصق فيا التهمة بقات ليا غي هي فلحساب برهوشة ديال لخلا .. طبعا ماتيقاتنيش أنا تيقاتو هو .. سولاتني واش متقوبة ؟ ضيعتي شرفك ؟ بقيت ساكتة جراتني من شعري وقالت ليا يالاه نمشيو للطبيب .. قال ليها يالاه نوصلكم حيت كان خايف لا يتفرش تا هو .. فالطريق ماخلاش لي فرصة باش نهضر ولا ندافع على راسي .. وصلنا عند واحد الطبيبة غي قلباتني اللون ديال وجها تبدل .. قالت لماما را بنتك فاقدا العدرية ديالها و الجهاز التناسلي ديالها بحال لا مرة مزوجة من شحال هادي .. وباينا نعسات معا شي حد غي مؤخرا .. ماما ما خلاتهاش تكمل هضرتها قالت ليها صافي فهمت و خرجنا .. و راجلها بقا كايقول ليها شتي را ما كدبتش عليك و جاب ربي فيقتك اما كون راكي ما جايبا للدنيا خبار .. ها هيا تفرشات .. عندنا قحبة فالدار وحنا ماعارفينش .. الطريق كاملة وهوا يعاير و أنا غي ساكتا و كانبكي .. دخلنا للدار قال لماما انا مانرضاش تسكن معايا قحبة .. ليوما غاتجمع حوايجها وتمشي تقود لشي قنت .. ماما بدات كاتبكي قالت ليه حشوما عليك اللحم ملي كايخناز كاهزوه ماليه و لا خرجات للزنقة غاتزيد ضيع و عندها لباك هاد العام غانضيعولها مستقبالها .. قال ليها كون كانت كاتفكر ف مستقبالها ماديرش لينا هاد الشوهة ودابا سكتي ولا غاتبعيها .. قال ليها يالاه ختاري واش تمشي بوحدها ولا تقودي نتي وياها .. طبعا ماما خافت و سكتات على ود ولادها الصغار و ما لمتهاش حيت حتا هي مسكينة عانات بما فيه الكفاية من حقها تشوف مصلاحتها .. بديت كانبكي وكانطلب فيه قلت ليه حرام عليك را ما عندي فين نمشي ما عندي لا عائلة ولا صحابات واش نتشرد فالزنقة مابقيتش فيك؟ قال لي سيري عند هادوك الي كاتحواي معاهم هوما يلقاو لك الحل .. صافي أنا ما بقا قدامي غي نجمع حوايجي و نخوي لهم الدار .. بقات فيا حاجة وحدا هي ختي فعمرها 13 عام كانخاف عليها بزاف حيت هي نية كثر مني ..  كنت أنا هيا مها و باها دابا لا مشيت ماغايبقا عندها حد و خفتها يطرا ليها ما طرالي يضحكو عليها بحالي وتبع شي طريق ماشي هيا هاديك ولا يكون مصيرها معا راجل ماما  بحالي يبقا يتعدا عليها .. وانا عارفا غايلقا ليها تا هي السبة ويجري عليها من الدار ويتهنا .. غانخليها عايشة فالعداب ماكرهتش نديها معايا ولكن ما عندنا فين نمشيو اللهم تبقا هيا مستورة فالدار بينما سهل عليا الله ونعتقها   .. جمعت حوايجي و كتوباتي و خرجت .. بقيت كاندور من زنقة لزقة وكانقول فين غانمشي وانا لا حنين لا رحيم و عندي الباك باغا ناخدو بأي طريقة .