ضَحِيَّةُ الذِّئاب البَشَرِيَّة 3/>

10) الخدمة تالويل

بقيت على داك الحال مرا نتحوا ب 500 درهم مرا 200 درهم مرا 1000 و كاين الي كايشبع فيك حوا و مايخلصكش و كاين الي يضربك و حتاقرك .. شفت الويل فديك المدة ومعا لوقت ولاو عندي كليان .. العالم ديال الليل صعيب واخا نوصف ليكم تا نعيا ما غاتحسوش بيا .. كان كايبقا فيا ولدي كتر من راسي .. كانتحوا وهو فكرشي .. كنت كل مرة كانقول لختي كدبة و منبعد فهمات بوحدها و عرفاتني منين كاندَخل لفلوس و تقبلاتها حيت ما عندنا مانديرو .. تا هي قلبات على خدمة خدمات فواحد المخبزة غي حدا الدار كانو كايعطيوها 1500درهم فالشهر كانت كاتعاوني شوية فالمصروف .. كاتبقا واقفا النهاركامل مسكينة على ود جوج دريال ولكن بعدا كادخل فلوسها حلال ماشي بحالي و لكن كون جيت نشوف تانا شي خدمة بحالها را ماغانعيشوش .. وكازا المعيشة فيها صعيبة و غاليا وأنا باغا نخبي شوية لدواير الزمان حيت مانقدرش نخدم فاش تكبر كرشي و أصلا غاتكون لقرايا .. كنت كانتحوى بالليل و بالنهار باش نجمع لفلوس الي نعيشو بيها واحد المدة كنت ناويا تبدا لقراية نحبس هاد الخدمة تالدل ونبدا لقراية  .. فاش خرجات النتيجة تالباك دفعت لواحد المدرسة تالمهندسين دوزت كونكور و نجحت فيهقدامي 5سنين غانصبر و غاندوزها باش ما كان باش نتخرج مهندسة انشاء الله نهز راسي أو ولدي وختي و نخرجو من العيشة تالميزيرية .. كنت كل نهار فاش كانرجع للدار كانبكي وكانطلب سيدي ربي يسمح ليا و يدير لي شي تاويل .. سالا الصيف تحولنا من الدار اللي كنا ساكنين فيها .. وحيت مراد كان كاريها بفراشها سرقنا منها شحال من حاجة وبتنا ما صبحنا .. مشينا كرينا بيت معا الجيران فواحد الحي شعبي .. جات الدخلة تالمدرسة خرجت أنا وختي شرينا لكتوبة اللي غاتحتاج و شريتلها حوايج جداد ما خليتها مخصوصة من تا حاجة مابغيتهاش دخل مبهدلة .. وشريت لراسي تانا تكسينا و كلينا و فوجنا خسرنا على راسنا شوية تلفلوس راجعين للدار بان لينا بابا قدام واحد المحل بقينا واقفين و مصدومين ما توقعناش غانشوفوه ورا هاد المدة قلنا نمشيو نسلمو عليه ماشي موشكيل كيفما كان لحال را بابانا وأصلا توحشناه و حنا محتاجين أب يوقف فجنبنا فهاد الفترة .. تبعناه باش نسلمو عليه دار لينا واحد التسليمة ناقصة بحال لا ماكايعرفناش ما سولنا لا واش لاباس لا والو و منفَّخ علينا جبد فلوس من جيبو يصحاب ليه جايين نسعاوه .. قلنا ليه حنا ماجيناش عندك على قبل لفلوس غي خليها عندك حنا محتاجين أب الي يحن فينا حرام عليك سمحتي فينا هاد المدة كاملة دانا لواحد القهوة وبقينا كانهضرو .. قال لينا نتوما ماعارفينش بزاف تلحوايج .. واش يصحاب ليكم ساهلا أب يتخلى على ولادو .. قلنا ليه وعلاش درتي فينا هاكا .. قال لينا مكم كانت كاتخوني و فضلت عيواض نقتلها سمحت فيها وفيكم .. جاني شلل نصفي بسباب الصدمة وعانيت بزاف و المرا الي أنا مزوج بيها دابا هي الي عاوناتني تا وقفت على رجليا أو وليت لاباس .. خيرها ما ننساهش .. قلت ليه حنا ما فراسنا والو .. الي عارفين هو نتا تخليتي علينا وعلى ماما و مشيتي عند وحدا آخرى .. قال ليا كنتو صغار مافاهمين والو و مكم عاودات ليكم غي اللي بغات .. ماعاوداتش ليكم على لفضيحة اللي دارت .