ضَحِيَّةُ الذِّئاب البَشَرِيَّة 3/>

14) المسؤولية

رتاحيت شوية ورجعت لخدمتي وقرايتي.. ولدي نور لي حياتي و ونسني .. فاش كانكون قاريا كانت كاتقابلو لي لمرا اللي كاريا عندها و كنت كنت كانضور معاها مرا مرة بالي قسم الله و ماكاتقول والو مسكينة حاسباني بحال بنتها .. جابها لي ربي بحال الحسنة كون ماشي هي ماعرف كي غاندير لولدي ومعامن غانخليه .. ولا جيت نشوف مُرَبٍّيَة غاطلب ليا زبالة تلفلوس .. سالا العام نجحنا أنا و ختي وحتا الدراري الي كنت كانخدم معاهم .. لقراية سالات و ماكاين منين نجيب لفلوس حيت تا حد ماكايدير المراجعة فالصيف واخا كنت موفرة شي بَرَكة تلفلوس لدواير الزمان موحال تكفينا الصيف كامل .. فكرت نخدم فسونطر داببيل ولكن فيه الخدمة بالليل أو ولدي محتاج ليا .. بقيت كانقلب لقيت واحد الماحال تالآتاث المنزلية محتاجين بنت تقابل و تبيع داكشي كانخدم نص نهار و كانمشي نخدم شي سوايع فماكدونالز كانسربي تما .. لموهيم مقاتلا معا الزمان و عايشا أنا وعائلتي الصغيرة .. واحد النهار صونات لينا ماما وقالت لينا نمشيو عندها للدار .. مابغيناش قلنا لها فين كنتي هاد المدة كاملة بقات كاطلبنا .. هزيت ولدي ومشينا أنا وختي .. دخلنا لقينا ولادها الصغار مساكن ماعارفين والو توحشونا فرحو بينا فاش شافونا .. ولكن تصدمنا فاش شفناماما لابسا لبيض شادا حق الله .. عرفنا را راجلها مات دار كسيدة .. قلت لها حتى مات عاد تفكرتي را عندك بنات ..بقات كاتبكي قالتلي را كان ساد عليا و قاتلني بلعصا ماكايخلينيش نخرج و محيد ليا التيليفون .. تعدا عليا ولكن ربي را كايشوف دنوبنا خرجو فيه .. دابا راه مات وتهنينا كرهت الزواج و مايجي منو أصلا ما عندي زهر .. سولاتني شكون هاد الدري الي فيدك .. قلت ليها ولدي سميتو جاد .. نهار جرا عليا راجلك وخرجت للزنقة مشيت عشت معا واحد الولد و حملت منو ومشا وخلاني عاودت ليها على مراد باباين ولدي .. بقات كاتبكي قالت لي أنا السباب .. قلت لها لا نتي مادرتي والو .. سولاتنا على حياتنا وشدرنا عاودنا ليها كلشي على فين ساكنين وشنو داز علينا وعلى الخدامي الي خدمت .. قالت لينا دابا هادشي كلشي فات .. غانبداو صفحة جديدة غاتجيو تسكنو معايا نعيشو مجموعين وماغايخصكم تاخير ماغاتحتاجيش تخدمي أو ولدك غايكبر معا خوتك .. راجلها خلالها الدار و الطونوبيل و الفلاحة وشي ديور مكريين وعاد الخلصة اللي خلاو ليه حيت كان موظف .. فالأول قلت لها لا مانقدرش أنا يالاه بديت نبني حياتي مابغيتش نعاود من اللول وأنا قادرة نهز راسي و نصرف على ولدي وختي .. بقات كاطلبنا و حتا خوتي الصغار قالولنا بقاو معانا .. صافي قنعونا ناضت ماما حيدات دوك لحوايج حيت أصلا مايستاهلش تحزن عليه .. مشينا جبنا حوايجنا سلمنا على الجيران ماسخيناش بيهم وحتا هوما أو واعدتهم غانبقا نجي نزورهم .. رجعنا عشنا معا ماما تجمعنا من جديد ولينا بيخير احسن من شحال هادي .. جبدنا معاها الموضوع تبابا قلنا لها را تلاقيناه مرة صدفة و جلسنا فقهوة وعاود لينا شي حوايج ما عرفناهم واش بصح ولا غير كدوب .. قالت لينا بحالاش هاد لحوايج .. شنو قال ليكم ؟