ضَحِيَّةُ الذِّئاب البَشَرِيَّة 3/>

7) ربي ما كايسد باب حتى كايحل بيبان

مازالا ما خرجتش من الصدمة ديال داكشي الي طرالي فالصواري جاتني صدمة آخرا .. تشردت الفزناقي .. و كازا خطيرة لا بالليل ولا بالنهار .. غادا كاندوي بوحدي بحال شي حمقة تفكرت مراد الدري الي نقدني فديك اليلة المنحوسة .. صونيت ليه قلت ليه بغيت نشوفك .. درنا فين نتلاقاو جا عندي لقاني ب صاكي تالحوايج و دموعي فعينيا .. عاودت ليه شنو طرا وقلت ليه ما عندي حد وما عندي فين نمشي عاوني غي بينما سالا لعام وخديت الباك ديالي و ديكساع نخرج ندبر على راسي مانبقاش مصدعاك .. قال لي لا ماتقوليش هاكا انا ساكن بوحدي مرحبابيك داري هي دارك و أصلا انا باغيك تكوني ديالي ودابا جاتنا فرصة نتجمعو و نعيشو حياتنا بلا مشاكل .. قلت ليه هذا ماشي وقت هاد الهضرة .. قال لي صافي نساي عليك الماضي .. دابا غاتبداي معايا صفحة جديدة ..
مشينا للدار قاديت حوايجي سكنت معاه بحال لا مراتو نساني شويا فديك المعاناة و داكشي الي داز عليا .. كان كايديني مرة مرة عند واحد صاحبو طبيب نفساني حيت نفسيتي دمرات وليت كانشوف كوابيس بالليل وديما مخلوعة و ساهيا أثر عليا بزاف داكشي اللي عشت ..شوية بشوية وليت لاباس ورجعت لحالتي الطبيعية .. واخا هاكاك باقين ولاد الناس فالدنيا تهلى فيا نقدني جوج مرات تاق فيا ودخلني لدارو و وفر لي كلشي . عطاني الحب و الحنان لقيت فيه الخير الي مالقيتوش فواليديا تعلقت بيه او ولفتو أو وليت كانبغيه .. كان كايعطيني لفلوس كانخرجو كايشري لي اللي بغيت .. هو باينا فيه دارهم لاباس عليهم حيت واخا كان خدام وبخلصتو كانت كاتوصلو فلوس كل شهر من عندهم .. موهيم عشت معاه .. كانجمع الدار و نطيب ما ناكلو ونعس معاه ما خلينا ما درنا .. كان دري زوين و الله يعمرها دار حاجة وحدة الي خايبا فيه مبلي بالشراب و الحشيش و تبليت حتا أنا .. كنا كانسكرو بجوج أو وليت تانا كانكمي وندمت منبعد حيت فاللول كايجيك داكشي زوين تال منبعد كادخل معاك البلية عاد كاتحس بالقالب .. موهيم كنا بعد لمرات كانخرجو نسهرو برا وبعد المرات غي فالدار .. عشت معاه أيام زوينة ساراني أو وراني معنى الحياة .. واخا هادشي كامل مانسيتش لقراية كنت كانمشي لليسي نقرا و مخصصة وقت للمراجعة وكان كايراجع معايا مرا مرا حيت عندو ماستر فالفيزيك .. بقيت معاه 4 شهور عمر شي حد سول فيا منغير ختي كانت كاتجي عندي مرا مرة كاتبقا معايا كانطيب ليها ماتاكل و نعطيها شي بركة تلفلوس و كاتمشي و كانوصيها ما تقول لتا حد را كاتشوفني ولا عندها عليا شي خبار .. جا الامتحان الوطني دوزت مزيان فرحت منين داز كلشي على خير .. خرجات النتيجة نجحت بنقطة مزيانة جبت 15 نساتني فكاع داكشي اللي داز عليا فرحت من قلبي وصونيت لختي فرحتها معايا .. دازت سيمانة مراد جاتو خدمة فكندا فرح بزاف قال لي هادي شحال وانا كانتمنى نمشي نعيش تما و دابا جاتني فرصة .. بقا فيا الحال حيت غايمشي ويخليني حيت ما عندي حد من غيرو و ماكاينش اللي يحن فيا ولكن ما بينتش ليه درت راسي فرحانة ليه .