ضَحِيَّةُ الذِّئاب البَشَرِيَّة 3/>

16) النهاية❤

خرج تا هوا بالزربة كايقلب عليا ديماريت الطونوبيل و مشيت .. ركب فطونوبيلتو وتبعني .. فاللخر وقفت الطونوبيل وجا عندي غي شافني وشاف ولدو عينيه دمعو حيت خرج كايشبه ليه بزاف .. قال لي سنين وأنا كانقلب عليك ماخليت فين مشيت غبر لك الأثر و أنا ندمت حيت خليتك و عقل الصغر .. قلت ليه اللي فات مات دابا سير بحالك راك جيتي معطل وماباغاش ولدي يسمع هاد الهضرة ديالك .. ركع لي عند رجليا وقال لي سمحيلي .. قال لي نتلاقاو فشي بلاصة وندويو أنا باغي نصلح غلطتي معاك .. عطيتو نمرتي تالتيليفون و مشيت للدار عاودت لماما على شكون تلاقيت .. نصحاتني قالت لي من الأحسن عطيه فرصة .. على الأقل غي على قبل ولدك باش مايكبرش بلا أب .. صونا لي التيليفون لقيتو مراد قال لي بغيت نشوفك نمشيو نتعشاو فشي بلاصة عندي هضرة طويلة معاك قلت ليه واخا .. تلاقينا جلسنا بقينا كاندويو قلت ليه مانقدرش نسمح ليك نتا ستاغليتيني و حملت منك و لحتيني للزنقة و مشيتي سافرتي ماعقلتيش عليا .. عاودت ليه على شنو قاصيت و عانيت و فين سكنت و فين خدمت وعلى قرايتي وكيفاش دوزت الفترة ديال الحمل بولدي جاد و المسؤولية الي هزيت وأنا صغيرة .. قلت ليه أنا بنيت حياتي و سهل عليا الله ماتجيش دابا و تخربق لي كلشي .. لوقت اللي كنت محتاجاك فيه نتا سمحتي فيا و عايرتيني قلتيلي أنا غي دخلتك من الزنقة ودرت فيك خير .. قال لي را مشيت لكندا وندمت بزاف رجعت مورا عام قلبت عليك تا عييت فكازا مالقيتكش .. كنت كل عطلة كانجي للمغرب و كانقلب عليك .. كنت كانتمنى نعاود نشوفك و كنت خايف بزاف لا تكوني طيحتي الولد .. قلت ليه لا ولدي عمري فكرت نسمح فيه قال لي أنا قادر نسيك فداكشي كامل الي عشتي عطيني فرصة غي على وجه ولدنا ماتحرميهش من كلمة بابا واش تبغيه يعيش بلا أب ؟ راكي مجربا الإحساس ديال تكوني بلا أب .. ماتخليهش يعاني بحالك .. أنا غلطت ولكن هانا رجعت نعوضكم فكاع داكشي اللي فات .. قلت ليه نفكر أو نرد عليك .. دازت مدة وافقت تزوجنا درنا حفلة صغيرة فرحنا .. عتارف بولدو طبعا وعطاه كنيتو .. هو رجع لكندا صايب لينا لوراق و دانا أنا و جاد نعيشو معاه .. ولدي دغيا ولفو أو ولا كايقول ليه بابا .. فالأول جاتني صعيبا نتفرق على ماما وخوتي .. خصوصا ختي الي عانينا وقاصينا بجوج ولكن هادي هي سنة الحياة .. هي دارت كلية الطب وبقات عايشا معا ماما و خوتي لاخرين و أنا مشيت عند راجلي و عيشني أميرة أنا أو ولدي .. نسينا الماضي وبدينا صفحة جديدة كايبغيني ويحتارمني ويقدرني و عمرو جبد لي الماضي ديالي واخا عارف شحال دازو عليا .. واخا راجلي بإمكانو يعيشني مزيان قلبت على خدمة مايمكنش نكون ضربت هاد تمارة كاملة فاللخر نجلس فالدار .. شحال تعدبت و سهرت الليالي باش نقرا .. مايمكنش نتخلا على أحلامي .. المرأة خاصها تكون مستقلة ماديا و قادة براسها حيت الوقت مافيها ثقة .. والخدمة كاتعطي للمرأة قيمة كبيرة .. قلبت على خدمة و لقيتها بسهولة حيت عندي قدرات عالية وديبلوم مهنسة دولة ماشي ساهل .. وليت مسؤولة فشركة كبيرة و بصاليغ مزيان .. منبعد فكرنا أنا وراجلي و درنا مقاولة ديالنا وقابلناها بجوج .. الصراحة ماكاينش بحال لحلال كاتعيشي مرتاحة وضميرك هاني .. ودابا كانصلي و كانحمد الله بالليل وبالنهار حيت عفا عليا و سهل عليا .. ربي كبير و عمرو كاينسا العباد ديالو .. كلشي كايفوت وضاروري النهار الزوين كايجي .. شوفو شحال عانيت دازو عليا لمصايب ديال الدنيا و الدين .. كبرت بلا أب تشردت تغدرت و تغتاصبت حملت و فسدت و سهرت الليالي وضربت تامارة فاللخر بقا كلشي غير معاودة .. عمركم تفقدو الأمل فالحياة ديما خليو يقينكم فالله .. ديرو جهدكم قراو و خدمو فاش ماكان لموهيم جيبو طرف تالخبز حلال وطريق لحرام بعدو منها را ماكاتوَصَّل لوالو .. لبنات قراو قراو قراو قراو ماتقولوش لا أنا عندي ماشاكيل ولا حقا غانتزوج ونتهنا .. كلشي عندو المشاكل ولكن لقراية راهي مفتاح الفَرَج .. هيا الي غاتخرجكم من الفقر و العذاب و دير ليكم قيمة بين الناس .. قراي و خودي ديبلومك وعمري جيبك عاد عيشي حياتك ماتكونوش مزروبين را كل حاجة كاتجي بوقتها .. سوى كنتو دراري ولا بنات فهاد الوقت ماتيقو فتا واحد لا صحاب لا صحابات .. نتمنى تكون عجباتكم القصة و شكرا على المتابعة .